كيفكم خواتي عساكم بخير
أنا كنت كاتبة قبل قصة ولادتي واللي يبي يرجع لها هذا الرابط
الحمدلله ولدت بالسلامة ..ثاني يوم العيد 2024/8/20 ( بكرية )
https://forum.uaewomen.net/showthread…4#post39538264
موضوعي اليوم شوصار لي بعد الولادة …
أنا سوا لي خياطة من تحت وقت الولادة وبعدها عطوني معقم (ديتول وكريم وبودره ) وخبروني كيف اعتني بالمنطقة .. وطبعاً أنا كنت خايفه موت من الجراحه حتى ماكنت ألمسه أو أطالع الجرح بالمرايه من الخوف .. بس كنت انظف من برع لبرع وكانوا الدكاتره كل يوم اييوا ايشيكوا لي عالخياطه والحمدلله كل شي تمام ومن أحسن مايكون ..
لما رجعت البيت شريت من المستشفى من المعقم اللي كنت استخدمه 4 دبات كبار والكريم والبودره من الصيدلية وقالت لي عمتي شوتبي كل هذا يوم بنوصل البيت بسوي لج ماي وملح وايد زين وكل حد مدح لي الماي وملح حتى ريلي قال لي كثري ماي وملح … ماعلينا المهم صرت من ادخل الحمام عزكم الله ابدل واتنظف مره اتشطف من تحت بماي وملح ومره بمعقم المستشفى لين يومين .. وبعدين بديت احس ان المنطقة بدل لا تخف قاعده تعورني اكثر .. طبعاً أنا بكرية وماعرف هل هالشي طبيعي أو لا والحمدلله ربي ألهمني كنت رايحه مراجعة لولدي وقلت للنيرس أبي أحد يشيك لي عالخياطة لأني مب مرتاحه وحاسه بألم 
ويوم شافت لي القابلة هني الصدمه تمت اتنظف وتمسح ومب عاجبها اللي شايفته 
انا مت من الخوف أقولها شوصاير التهاب ؟ قالت ألعن عن الالتهاب صاير مثل المد داخل الجرح وقعدت تقول كلام والله من خوفي مافهمت 
.. المهم قالتلي لازم ترجعي بالليل الدكتورة تشوفج ..
يوم رجعت النيرسات خبروا الدكتوره شو شافوا وكيف الجرح والخيوط .. اول ماشافتني بعدها ماشافت الجرح قالت لي بنبرة جادة انا بسألج انتي تستخدمي ماي وملح 
انا كنت خايفه حدي والله ادودهت وقلت لها اذا تقصدي اقعد فيه لا قاطعتني قالت لا لاتكذبي خلينا صريحين قلت لها انا بس اتشطف فيه من برع مثل المعقم اللي عطيتوني اياه …
قعدت تتنازع وتصرخ هيه مب قصدها مسكينه بس قاعده اتقولي ليييييييييييييييييييش ليييييييييييييييش تعملي فنفسك كدا 
.. قلت لها أم زوجي قالت لي … قالت لي هاي الخيوط غير عن اللي كانوا يستخدموها قبل 20 سنة ..هاي اتذوب واطيح من نفسها مايصير اتحطي لها ماي وملح عسب اطيح … يوم كشفت علي والله قعدوا ينظفوا لي المكان وتراويني بالمرايه صاير صديد ووصخ حتى الخيوط متآكله وملتويه على بعضها ولونها مصدي .. والله اني شفت العذاب والويل وكنت اصيح بسبب اللي صار من صوب وخوفي وصدمتني من صوب والألم اللي لايحتمل من صوب وخايفه يرجعوا يخيطوا لي … كان يوم من افظع ايام حياتي .. حليلها الدكتوره تمت تحضني وتهديني
وصفوا لي مضادات وتحاميل ومسكنات قويه لان قالت مابتعرفي ترقدي ابد بدون مسكنات وعطتني حقنه ومعقم جديد للتنظيف فالبيت ولازم اروح لهم يوميا يسون تنظيف ويشوفوا كيف التطورات اذا الجرح يحتاج خياطه بعد فتره او لا وعلموني بالمرايه يوميا كل مره ادخل الحمام اسوي تنظيف من داخل وبرع والله اني شفت الويل فالمستشفى وفالبيت كنت اطالع الجرح فالبيت واصيح من الألم ومن اللي اشوفه والله حسيت اني تشوهت واقعد اقول حسبي الله ونعم الوكيل سامحوني على هالتشبيه بس والله كأني كنت أشوف شفرتين ثانيات من كثر ماالجرح مفتوح
المهم صرت انظف زين مازين من الخوف واطالع بالمرايه ويوميا ادويه ومستشفى لين الخميس اللي طاف شافتني الدكتوره والحمدلله قالت استجابة جسمج للجرح وايد زينه تسكر من نفسه باقي شوي بس وان شاء الله مش محتاجه خياطه ولازم يشوفوني هالخميس عسب يتاكدون اكثر
الدكتورة قالت لي هاي مب اول مره وحده تيينا جي بسبب الماي وملح ونحن بنبتدي انحط تبيهات بالمستشفى من هالشي … فعزيزاتي اذا فكرتوا اتسوا هالشي اسالوا الدكاتره قبل لان معدات الحين تختلف عن قبل وربي يعين ويسهل الامور …سامحوني عالاطالة
ولج الشكر الجزيل عالتنبيه ربي يكتب لج الشفاء
والحمدلله عالسلامه
الف سلامة عليكي ومبروك المولود الجديد
و مشكووره عالنصيحه ما قصرتي
الف الحمد لله على سلامتج ما تشوفين شر بارب
و مبروووووووك المولود اليديد ^_^
هالمرة اكتفيت بالتعقيم والتنظيف وبس
الله يعافيج حبيبتي