تفريج الكروب وابعاد العين والحسد وحل لمن تاخرت زواجها ويارب الكل يستفيد

وأقسم بالله إن كل اللى هاقوله ليكم حصل معايا وسبحان الله

فى يوم من الأيام كنت قاعده باقرى فى مجلة ( زهرة الخليج ) والمجله دى بحبها جدا وهيه نمره واحد عندى وفضلها كبير عليا قوى وطبعا ده بعد فضل الله تعالى

لقيت موضوع عن لقاء مع ساحر بس الساحر ده تاب عن اللى كان بيعمله وبقى معالج بالقرآن الكريم والرقيه الشرعيه وكان بيتكلم عن اساليب السحره

وقال إن الشئ الوحيد اللى يمنع أى ساحر إنه يأذى أى شخص هوه ( سورة البقره )
طبعا مع المحافظه على الأذكار

وحكى قصة واحد جه ليه بيعانى من عدم توفيق فى حياته وخاصة فى شغله وكل لما يعمل مشروع يفشل فنصحه بقراءة سورة البقره لمدة 21 يوم كامله

وفعلا الشخص ده عمل بالنصيحه وقرأ سورة البقره وفى اليوم ال21 بعد ما خلص قراءتها ونام
حلم إن فيه جن وعفاريت وحيوانات من كل نوع ( أسود – كلاب – قطط – حشرات – تعابين ) وغيرها
موجودين فى البيت ولقاهم بيكلموا بعض وبيقولوا إنهم خلاص هايسيبوا البيت ده لأنهم مش قادرين يقعدوا فيه عشان صاحب البيت بيقرى سورة البقره

وفعلا شافهم طالعين من باب البيت

فراح للساحر اللى اصبح معالج وراقى وحكى له الحلم فقال ليه الحمد الله كده الأذى اللى كان موجود فيك وفى بيتك خلاص أصبح ليس وجود وتم شفاءك بفضل الله وبفضل سورة البقره

وفعلا بعدها الشخص ده احواله إتحسنت جدا وربنا وفقه فى حياته وخاصة فى شغله وفى مشارعيه

ففى الفتره دى كنت حاسه إنى محسوده فقلت لما اقرى أنا كمان سورة البقره لمدة 21 يوم
وفعلا بدأت قرايتها وكنت بقرآها مره واحده يوميا فى جلسه واحده والوقت اللى كنت بقرآها فيه كان فى الغالب بيكون بعد العصر وقبل المغرب

والحمد الله ربنا قدرنى وقدرت أكمل ال21 يوم

وفى آخر يوم بعد ما قرتها كنت مستنيه أنام بالليل عشان أشوف حلم وأعرف إذا كان هايحصل معايا زى ما حصل مع الراجل ولا لئه ولا هاشوف حاجه تانيه

وكانت المفاجـــــــــأه وغير متوقعه خالص تفتكروا إيه اللى حصل يا احلى فتاكيت ؟؟؟؟؟؟؟؟؟؟

كنت فى الوقت ده قاعده فى الأوضه ولقيت جرس الباب بيرن ( ترن – ترن – ترن )

فماما او حد من اخواتى راح فتح الباب وطلعت مين يا ترى ؟؟؟

طلعت جارتنا فى الشقه اللى جنبنا على طول ودى بقى صاحبتى قوى وبتحبنى قوى

لقيت ماما جيه بتقولى فلانه ( جارتى وصاحبتى ) عيزاكى فقلت ليها مش عارفه هيه عيزانى فى إيه أنا كنت فاكره إنها عيزانى أروح اقعد معاها شويه

فماما قالتلى مش راضيه تقول عملاها مفاجأه
هه

المهم طلعت لقتها واقفه على الباب وبتقولى أنا جيبالك ( عريس )
هههههههههه

طبعا فرحت وقلت ليها طيب ادخلى ونتكلم فى الموضوع على راحتنا وتقوليلى التفاصيل

عارفين قالتلى إيه لا مش هاينفع إنتى تدخلى حالا تلبسى عشان العريس معايا وموجود فى الشقه عندى

واحنا شقتنا وشقتها جنب بعض على طول بينا وبينها حيطه

راحت أختكم عملت كده من هول المفاجأه

عشان دى كانت أول مره يحصل فيها الموضوع ده

لأن أى عريس كان بيتقدم إما بيتصلوا بالتليفون أو يبعتوا حد يكلمنا ويحددوا ميعاد للمقابله قبل ما يجوا يشرفونا

المهم اختكم دخلت لبست اللى على الحبل هههههههه
والعريس شرف بعد حوالى ربع أو نص ساعه
بس مش حصل نصيب يا فتاكيت
المهم فى الموضوع إنى كنت قاعده مستنيه إنى أنام عشان اشوف حلم تخليوا بفضل سورة البقره والقرآن الكريم
نزل عليا عريس من حيث لا أدرى وفى اليوم ال21 من بداية قراءتى لسورة البقره

بقيت طبعا بعد كده أواظب عليها واقرآها لمدة 21 يوم

وكل مره بفضل الله لازم عريس يتقدملى ويجى البيت أو حد يكلمنى بره البيت سبحان الله
وعلى فكره مش كان لازم ال21 يوم يخلصوا ده حتى اثناء القرايه كان فيه عرسان بيتقدموا ليا يا فتاكيت
وفضلت على كده فتره طويله

إضغط هنا لرؤية الصورة بحجمها الطبيعي.

وفى يوم وأنا قاعده بتفرج على ( قناة الناس ) وكان فيها الشيخ ( سالم أبو الفتوح ) ربنا يباركله ويجازيه كل خير ويجعله من السعداء فى الدنيا وفى الآخره
يارب آمين
وكنت باحب أتابع البرنامج بتاعه وأسلوبه فى الحوار

لقيته بيقول ( الآنسه اللى متأخره فى الجواز ) تقرى سورة البقره مره واحده يوميا لمدة 6 شهور كامله

فقلت فى نفسى هو انا لازم أكون متأخره فى الجواز عشان أعمل كده

وفعلا قررت إنى أقراها لمدة 6 شهور كامله

والحمد الله ربنا وفقنى وقرتها بس آخر يوم فى ال6 شهور كنت عند واحده قريبتى عشان هاتتجوز وكان يوم حنتها وكنت رحت معاها الشقه نوضب ونرص حاجات

وبعد ما الحنه خلصت كنت فعلا تعبانه قوى وكنت هاكسل عن قراية سورة البقره

فقلت فى نفسى ده آخر يوم فى ال6 شهور قومى إقريها وبلاش الشيطان يضحك عليكى

خت بعضى وطلعت البلكونه وقفلت على نفسى الباب وقرتها وخلصتها بفضل الله

على فكره قريبتى دى كانت قرت سورة البقره وفى اليوم الخامس من بداية قرايتها إتصلت واحده من قرايب جوزها او والدته بوالدتها وطلبت إنها تخطبها لإبنها
والحمد الله تم الجواز على خير

إضغط هنا لرؤية الصورة بحجمها الطبيعي.

أكمل ليكم بقى إيه اللى حصل بعد 6 شهور

بعد حوالى شهر أو أقل من شهر إتقدملى جوزى وتمت الخطوبه والجواز على خير فى حوالى 3 شهور
ولله الحمد وطبعا كل شئ بأمر الله وقدره وبفضله سبحانه وتعالى

إضغط هنا لرؤية الصورة بحجمها الطبيعي.

وعلى فكره لما كنت بقرآها كان الخير بيعم على كل البيت وحتى على أخواتى

فى مره كنا نايمين والساعه كانت حوالى 8 الصبح

لقينا خبط جامد على الباب فاستغربنا مين اللى جاى فى الوقت ده وبيخبط كمان بالطريقه دى

تخيلوا لقينا مين واحد جارنا جاى وجايب عريس لأختى بس مش كان معاه العريس المره دى كان معاه أبو العريس هههههه

والله العظيم هذا حصل وطبعا دخل وإتكلم عن إبنه وعن شغله ومميزاته وعن طلباته فى العروسه
وأعتذر عن إنه جاى فى الوقت ده بس قال إنه كان بيكلم جارنا على عروسه لأبنه فقال ليه عندى طلبك وخده من إيده وجابه عندنا
بس مش حصل نصيب يا فتاكيت

وطبعا من ساعة اللى حصل معايا من اول مره ( 21 ) يوم وانا قلت لكل أصحابى وجيرانى على سورة البقره

والحمد الله كل واحده فيهم دلوقتى متجوزه وفى بيتها حتى اللى كان سنهم كبير ربنا كرمهم بجوازات زى الفل
وربنا يهنيهم ويسعدهم ويبارك فى حياتهم جميعا
يارب آمين

ولله الحمد ولله الفضل
اللهم لك الحمد ولك الشكر كما ينبغى لجلال وجهك وعظيم سلطانك

إضغط هنا لرؤية الصورة بحجمها الطبيعي.

وفيه كمان واحده قريبتى كان باباها بخيل مع إن حالته الماديه كويسه جدا
بقت تقرى سورة البقره هيه ومامتها وبتحلف ليا إن كل اللى كانوا عايزينه باباها جابه ليهم واكتر كمان
وحياتهم إتغيرت 360 درجه وبقت تمام
وبتقولى لما نبقى عايزين حاجه من بابا بنقعد انا وماما نقرى سورة البقره قبل ما نطلب منه والحمد الله بيوافق على طول

وفعلا هموا دلوقتى فى مستوى تانى خالص غير اللى كانوا فيه ربنا يباركلهم يارب آمين

شفتوا قد إيه فضل سورة البقره والقرآن الكريم ليس قبله ولا بعده أى شئ

ارجو من كل فتوكه إنها تقرى ( سورة البقره ) مره واحده يوميا لمدة ( 6 شهور ) بدون توقف حتى لو كان عندك العذر الشرعى إقريها من على الكمبيوتر أو البسى جوانتى واقريها من المصحف

ففضلها عظيم ولا يستطيع احد أن يحصر بركات سورة البقره

فقد قال رسولنا الكريم صلى الله عليه وسلم :
( إقرؤا البقره فإن فى اخذها بركه وفى تركها حسره ولا تستطيعها البطله ) بمعنى السحره