جامعة أبو ظبي ولا جامعة الجزيرة؟

السلام عليكن ورحمة الله وبركاته

خواتي أنا بغيت أدرس علاقات عامة واعلام
والصراحة أنا اواجه صعوبة في اللغة الانجليزية
ومادياتي مقبولة يعني مب لين هناك بس انا موظفة وأقدر أدبر أموري

بغيت المجربة تعطيني من خبرتها
أسجل ف أي جامعة ؟ الجزيرة ف دبي ولا جامعة أبوظبي فأبوظبي؟
وين الانجلش أسهل ؟ وهل مطلوب علي التوفل ف الجامعتين؟
وكم تكاليف الدراسة في كل جامعة ؟
وكم السنة يبالي اخلص تخصص علاقات عامة في كل جامعة؟
وهل اقدر انظم جدولي مع دوامي؟
وأي الجامعتين فيهم اخلاط؟ وأبغي توضيح بالنسبة للاختلاط يعني كيف بيكون؟
لان أهلي يمكن ما يوافقون بس لو حاولت أقنعهم بيوافقون؟ بس أبغي شرح عن مدى الاختلاط في كل جامعة؟

اللي تدرس فأي جامعة تجاوب على أسئلتي

و عليج السلام و رحمة الله
مممم و الله مب متأكده من الهنتين و لكن أعتقد إن الموضوع واااايد أسهل فجامعة الجزيرة فـ دبي
بس فيه اختلاط فالكلاسات إذا ما خاب ظني
اما جامعة بوظبي ماأعتقد شي اختلاط فالكلاسات الاختلاط في اماكن معينه بس صوب الإدارة و هالسوالف و عند الأساتذة
لكن فالكلاسات ماظني و من ناحية التكاليف و المدة الدراسيه بعد مب تأكده
بس عطيتج فكرة عن اللي أعرفه بشكل عام عن هالجامعتين أجووف الانجلش مطلوب أكثر فجامعة بوظبي
فالجزيرة فدبي حسب ما وصلني الأمور واايد أسهل و لكن الاختلاط موجود فالكلاسات

الله يوفقج يختي

مرحبا اختي .. شحالج الغاليه
انا اقدر افيدج في موضوع جامعة الجزيره لاني ادرس هناك وتخصص علاقات عامه واعلان بعد ..
شوفي الدراسه لهذا التخصص بالعربي طبعا .. بس لازم تاخذين انجلش 1 وانجلش2 وهذا اجباري لكل الكليات اللي في الجامعه .. بس تراه وااااايد سهل .. يعني سوالف مدارس يعني مب شي معقد ينخاف منه ..وطبعا التوفل مب مطلوب لانه دراستج اساسا بتكون بالعربي .. وعن موضوع التكاليف يحسبون لج كل ماده ب 2850 وفيه تسهيل في الدفع لانج تقدرين تحطين شيكات .. اممم شو بعد .. هيه مدة الدراسه للبكالريوس طبعا 4 سنوات بس يعتمد اذا انتي بتنزلين مواد اكثر بتخلصين اسرع او اذا دارسه من قبل في جامعه يعادلون لج المواد اللي درستيها .. طبعا جدولج اكيد تقدرين تنظمينه .. سواء تدرسين مسائي او حتى ويكند .. وعن الاختلاط .. هيه فيه اختلاط وهالشي اللي كنت متردده فيه قبل لا ادخل الجامعه بس صدقيني الامور طيبه .. في الكلاسات الشباب بصوب والبنات بصوب وصدقيني في النهايه يعتمد على البنت .. دام الوحده محترمه عمرها وواثقه من نفسها محد بيقولها شي .. بس اللي تبا ترى هالشي واضح للشباب .. واي استفسار ثاني انا موجوده .. بالتوفيج ان شاء الله

نسيت اخبرج ان الاداره والدكاتره واااااايد يساعدون ومتفهمين لوضع الطالب اللي عنده التزامات من شغل وبيت وعيال ومسافه طويله .. يعني هالشي لاتحاتينه موليه