حزينه بهالعيد

1. عيد الزواج .. أو مثل ما يسميه البعض (يوم زواج )
أول شي بقوله .. إنه احنا مسلمين .. وديانتنا الإسلام
والمسلمين ما عندهم غير عيدين ( الفطر .. والأضحى )

نشوف البعض قبل هالمدة .. يتجهز وترتب وتدور على أفكار وتحتار في الهدية ..
وتبي تسوي مفاجأة حق زوجها .. وتحتفل معاه في هاليوم !!!!!!!

المودة والسعادة والهدايا تكون طول السنة, وما تقتصر على يوم معين
بتقولون .. الحمدلله فيه سعادة وفي حب .. طيب ربج حرم الاحتفال بهالأيام ..
ما تعرفين انه تقليد أعمى .. لما الغرب سوى شي رضتي وراه
افتحي عينج شوي …

تقدرين تتعدلين وتتزيين للزوج .. وتحجزين في مكان حلو وتسوين أجواء رومانسية .. من باب التغيير فقط مب من باب كملنا …. من زواجنا

في ناس تقول .. احنا ما نسويه في نفس اليوم .. خل عنج ..
اوكي ما تحتفين في نفس اليوم ,,, بس الفكرة وحدة والمقصد واحد

2. عيد ميلاد .. وفي من يسميه بيوم ميلاد
للأسف وايد ناس يسون هالحفلات .. ويأيدونها ويحضرونها من باب المجاملة ..!!!

ليش تربين عيالج على هالشي …
ربي على الاسس الصحيحة اللي علمها لنا دينا

للاسف في ناس واعيين وفاهمين ودارسين وعارفين انه ما يجوز . ومع ذلك تشوفون فلانه تيب هدية حق ولدها, وطرش هدة حق بنت اختها أو بنت ربيعتها أو ما شابه لك

طيب ليش تسوين كل ها ..
صار حوار بيني وبين وحدة وقالت تباني أطرش عيالي عسب يفرحون الطفل بيوم ميلاده ..
بصراحه كلمتها وقلت لها: اسمحيلي .. ما بربي عيالي على هالسوالف وعادات الغرب.. ولا بخليهم يحضرون .. عقب تفاجأت مطرشين كيكة شقتي عسب عيالي ياكلون منها

بصراحه … شليت الكيكة وعطيتها لفقير ..
عيالي بيشوفون الكيكة أكييييد بيسألوني .. منو وين .. وليش
شو تبوني أقول لهم .. هذي عشان فلانه كمل سنة من عمره !!!!!!

3. عيد الحب (الفالنتاي)
هل الحب ينحصر في يوم معين .. ولأ الحب يكون طول السنة وما يموت
معقوله نخصص يوم للحب .. ونلبس أحمر تعبير لهالشي
وين عقولكم سارت .. فكروا شوي .. اللي احنا نسويه هذا شو
تقليد للغرب ولأ سنة من سنن الاسلام !!!!!

4. عيد الأم
للاسف وايد ناس أشوفهم صار يهمهم هاليوم .. ويجهزون له قبلها بفترة .. ويشترون الهدايا
الأجنبي .. يشوف أمه في هاليوم .. وطول السن ما يشوفها.. وسوا هالعيد على قولتهم عسب ما يقطعون امهم
الحمدلله ديننا . أمرنا بصلة الأرحام ,, ووصانا بالام خاصة أمك ثم أمك ثم أمك ثم أبيك
وما خصص لنا يوم محتفل فيه .. الايام كلها للام وصلة الأرحام وما تتحدد بيوم معين

في وايد أعياد مثل ما قاموا الناس تسميه .. بس لو تكلمنا لين باجر ما بنخلص

هذي رسالتي .. وأتمنى وصلت
وأتمنى تصحون شوي ..
تربون عيالكم على المنهج الاسلامي الصحيح