حف الحواجب اشلون غير حياتي

بنات بخبركم بصراحه وبأمانه تجربتي مع حواجبي

انا معرسه قبل 5 سنين ونصف اول سنه من زواجي كنت اشقر حواجبي دوووم

حق الدلع ولا انا حواجبي حلوه والكل يقولي انتي تحفين وانا اقولهم لا بس اونه ابيهم يترققون بزياده

بس والله صارت حياتي عذاب من عقب التشقير قام شعري يطول بشكل مو طبيعي وصار ابيض وووو

تعرفون التشقير واهواله على الحواجب

لين ما اضطريت اني اقصه <<<<الابيض طبعا

وطبعا هاه حرام

وعقب تجرأت وحفيت حواجبي
والسبب الرئيسي كان ريلي يتم يلمحلي كل فترة ليش ما تسوين كل شي الحريم يسوونه في الصالون ومن هالكلام ويوم اقوله حرام يقولي انتي تسوينه عشاني ومن هالكلام

المهم حفينا وخلصنا وتميت 3 سنين وانا احف طبعا حواجبي صارت تخوف اذا خليتها شهر بدون حف لانها عرضت وايد وصار صعب علي اتحمل ويهيي بدون حف

والله يا بنات ع كثر ما ريلي كان خاطره اني احف وعلى كثر ما طلعت حلوة وكنت ابي ريلي يفرح فيني
مع هذا كله ما عشت براحه كل يوم مشاكل وريلي حسيته بعد عني اكثر اذا تصالحنا اول اسبوع ما يجي اخره الا ونحن متهاوشين لدرجه ريلي يقول بوديج عند شيخ انتي مو طبيعيه وانا اقول انت اللي تحتاج لشيخ مو أنا

تخيلوا ان ريلي ولا مره مدح حواجبي مع ان الكل كان يقولي شكلج روعه واول كان ريلي دووم يمدح عيوني ورموشي وكان يقول مو ناقص الا حواجبج تخلينها خيط ومن عقب ما حفيت ما سمعته ياب طاري عيوني ولا رموشي ولا غيره
واتم دووم ادعي ربي يهديني ويهدي ريلي ويبعد عنا المشاكل وعيال الحرام

لين ما فكرت اني كيف ابي ربي يهديني ويعطيني السعاده الزوجيه مع ريلي ويستر علينا ويبعد عن عيال الحرام وانا اقوم واعصيه هو ورسوله الكريم

يعني معقوله اطلب من ربي اشياء كثيره في الدنيا من راحه وسعاده ومال وغيره وبعد الجنه في الاخره وهو يطلب مني انا ما اشيل هالشعرتين اللي في حواجبي وانا اعصيه واشيلهم !!!!!!!!!

واذكر الحريم اللي اشوفهن في الصالون والله مداومات شهريا بالصالون ما يخلون شي الا ويسونه وما شاءالله عليهن ملكات جمال في كل شي ما اقدر ارفع عيني من عليهم ومع هذا يشتكون من الخيانه الزوجيه

واغلب اللي في الصالون يوم اشوفهن اقول يا بخت رياييلهم فيهم اكييييد انهم خواتم في اصبوعهم بس اول ما يتكلمون يبدأون يتكلون عن خيانه رياييلهم ومشاكلهم اللي تشيب الراس ولا وحده فيهم شفت ريلها يدق عليها الموبايل مع انهم يتمون في الصالون 4 ساعات او اكثر
وكلهم يا معهم الدريول او انها تسوق او بالتاكسي ماحد ريلها بيي ياخذها

طبعا انا ما اعمم بس تقريبا كل اللي يشيلون جسمهم كامل بالحلاوه واللي يحفون حواجبهم حياتهم تعيسه مع رياييلهم
اصلا اتعمد اتكلم وياها عن حياتها عسب اعرف هي مرتاحه ولا شو

طولت عليكم بنات المهم اني بطلت حف الحواجب وقلت ربي اولا واخيراا رضاه وبعدين يجي رضاي ورضى ريلي والناس بس اهم شي ما يتعارض مع رضى ربي وما اقولكم اول 4 اشهر كنت كارهه ويهي وكرهة حياتي وما لي خلق للميكب احس تشويه وكل اقول ها تأديب لي ولازم اتحمل علشان ربي يسامحنا على السنين اللي عصيته فيها والحينه الحمدلله احس حواجبي صارت حلوة ومتقبله ويهي اكثر واشكر ربي اللي خلاني ارضى بحواجبي ويحليهم بعيني وبعين ريلي

حتى ريلي رد يعاملني مثل اول صح يبيني احف بس فهمته انه حراام وقلتله ييبلي نص حديث سني او أيه قرأنيه تحلل النمص وانا ما بقصر وفهمته ان اللي يرضى حرمته تخون ربها وتنمص حواجبها عقب يعرف انه حرمته بتسوي خيانه وجرم اكبر وبيكون هو اللي ساعدها على هذا الشي

وقلته طول هالفترة يوم كنت احف ما مدحتني ابد بالعكس كانت حياتنا كلها مشاكل
عقب اقتنع ظاهريا اما باطنيا ما اعرف بس ليومكم ما ياب طاري الحف ولا شي وحياتنا ما في احلى منها غير المشاكل البسيطه

ولي الحينه سنه ونصف تقريبا بدون نمص ولا تشقير والحمدلله اللي ابيه رضى ربي وكل شي ابيه بعدين بيتحقق باذن الرحمن

بس نصيحتي للمتزوجات ابعدوا عن الحرام من نمص وكشف الوجه مع التبرج حتى لو خفيف غسلي ويهج بالصابون عقب اكشفي ويهج ما قلنا شي بس ميكب مع الكشف نونونو
والله يضحكوني اللي يكشفون ويقولون نحن ما نحط ميكب اللهم شوي فونديشن وشويه كحال مع ماسكرا وكلوس وبس !!!!؟؟؟؟ والله تييني ضحكه هذولا يضحكون على اعمارهم
وان شاءالله ربي بيهديني واكون ملتزمه بكل شي

السموحه طولت عليكم