حملة لقيام الليل (خلي الهم يتكدر و تتحقق امانينا)

كلنا نعرف انه لصلاة قيام الليل فضل كبير و عظيم للمسلمين ..

وهي شاهدة ( لجفاء الجنب عن المضجع ) حينما دعونا ربنا خوفا وطمعا ..

[]

فما أعظم ان نقف في جوف الليل بين يدي الله متضرعين باكين … متذللين خاشعين … نناجي رينا ونستغفره من الذنوب التي اقترفناها في النهار … ندعوه ونتوسل اليه ان يرزقنا مانريد ..

فصلاة الليل من المستحبات والسنن المؤكد …

وقال صلى الله عليه وسلم : " من خَتم له بقيام الليل ..ثم مات فله الجنة "..؟!

حبيت أسوي حملة نشارك و نشجع فيها بعض و نكسب ثواب و أجر و بإذن الله ستبدأ من تاريخ 01/10/2017-15/10/2017..

ممكن ان تصليها بأي وقت من بعد صلاة العشاء الى قبل صلاة الفجر

ويفضل تأخيرها ..

طريقة صلاة قيام الليل بقولها اول شي بشكل عام وبعدها بقولكم اللي راح نسويه بالحمله :

صلاة قيام الليل تكون اما بصلاة ركعتين او 4 او 6 او 8 او 10 او 12 ركعه و بين كل ركعتين نقول التشهد و نسلم ..

ونختم صلاة قيام الليل بركعتين الشفع و ركعة الوتر

وبجذي نكون خلصنا

المهم ..

صلاة الركعتين اللي اول شي هذي مثل ماشرحتها قبل عاديه نفس صلاة الفجر .. تصلون ركعتين و بعدين التشهد و تسلمون و ترجعون تصلون لو تبون اكثر من 2 ..

بعدها تصلون ركعتين عاديين بنية انه بتصلون صلاة الشفع و اهيا ركعتين عاديه نفس صلاة الفجر .. بس يسمونها صلاة الشفع ..

لكن في اضافه احب اقولها انه من الافضل في هالركعتين تقرين:

في اول ركعه : سورة الاعلى "سبح اسم ربك الاعلى …. "

وفي ثاني ركعه: سورة الكافرون "قل يا ايها الكافرون…."

بس عادي لو تبون تقرون اي سور ثانيه .. لكن هذا اللي كان رسولنا الكريم عليه الصلاة والسلام يقرأه في صلاة الشفع ..

يبقى الحين عندنا خاتمة صلاة الليل وهي ركعه وحده و يسمونها صلاة الوتر ..

وهذي الصلاة ركعه وحده يفضل انه نقرا فيها سورة الاخلاص مثل ما كان يسوي الرسول عليه الصلاة والسلام .. لكن فيها اختلاف شوي
انه بعد ما تقرين فاتحة الكتاب و سوره صغيره (يفضل الاخلاص) وتركعين بعد ما تقومين من الركوع تقولين دعاء يسمونه دعاء قنوت الوتر وهذا اهوه:

" اللهم أهدني فيمن هديت ، وعافني فيمن عافيت ، وتولني فيمن توليت ، وبارك لي فيما أعطيت ، وقني شر ما قضيت ، فإنك تقضي ولا يقضى عليك ، إنه لا يذل من واليت ،[ ولا يعز من عاديت ] تباركت ربنا وتعاليت "

" اللهم إني أعوذ برضاك من سخطك وأعوذ بمعافاتك من عقوبتك ، وأعوذ بك منك لا أحصي ثناء عليك ، أنت كما أثنيت على نفسك "

" اللهم إياك نعبد ، ولك نُصلي ونسجد ، وإليك نسعى ونحفدُ ، نرجُو رحمتك ، ونخشى عذابك ، إن عذابك بالكافرين ملحق ، اللهم إنا نستعينك ، ونستغفرك ، ونثني عليك الخير ، ولا نكفرك ، ونؤمن بك ونخضع لك ، ونخلع من يكفرك "

اللي مو حافظه الدعاء تقدر تمسكه وتقرا من ورقه عادي مافي اي اشكال .. بس طبعا يكون احسن لو الواحد يحفظه

بعد ما تقرين دعاء قنوت الوتر ممكن تقرين اي دعاء بخاطرك ..
وبكذي تكونين خلصتي من صلاة قيام الليل ..

الحين بقولكم طريقة القيام:

رح نبدأ بقيام الليل 3 ركعات حتى نضمن عدد أكبر من المشاركات وماثقل عليكم يعني حبة حبة ..

و ياريت بعد ما تصلين وتخلصين قيام الليل تمسكين المصحف وتقرينلك شوي لو صفحه وحده ..

الي تقدر بعد صلاة العشاء تم لين آذان الفجر تصلي القيام و تدعي و
تم تقرأ قرأن ليما يأذن الفجر (الاذان الاول) بعدها ابدو ادعو كل اللي بخاطركم ابكو و طلعو اللي في قلبكم كله كله لانه بهالوقت بين الاذان الاول والاقامه وقت استجابه ان شاء لله ..

وبعدها عشان ترتاحوووون عدل عدل عدل صلو ركعتين سنه قبل الفجر و صلو الفجر و نامو .. وبتشوفون الراحه

وانشالله الله بيعطي كل واحد على قد نيته ..

اما اللي ماتقدر تسهر لي اذان الفجر .. ممكن تصلين قيام الليل قبل لا تنامين او مباشره بعد صلاة العشاء

تصلين 3 ركعات اللي قلنا عنهم

و تدعين شوي و لو تقرين اي شي من القران لو صفحه وحده او سوره وحده صغيره

و تنامين

و ممكن تقومين قبل اذان الفجر بفتره لو نص ساعه وتصلينها و بعدها تصلين الفجر و تنامين هم وايد حلوه هالطريقه

لكم الحريه في الاختيار..

و الله يثبتنا و يوفقنا لما يحبه و يرضاه ..