https://forum.uaewomen.net/showthread…1#post25664098
هذا موضؤؤعي الاولي ..
مرحبا خواتيه
همسه لبعض الاخوات الى ناقصهن عقل وماعندهن اسلوب ف الرد : انا ابغي اعرف شي واحد ليش تجذبون قصتيه وفوق هذا كلامي مافيه سب ولاتجريح عسب بعض الاخوات يردن بكلاام هب منطقي
.
.
.
خطب بعلي العزيز واشترطت عليه العروس انها تسكن ف شقه
وافق ع شرطها بدؤن اعتراض
يمكن هالشي اريح لها ولنا
لاننا هب مرتاحات لهاا
وايد شايفه عمرها ومتكبره
سوالها عرس وخسر فيه خساره عمره ماخسر ف عرسنا نفس جذي
وقتهاا الغيره كلتني اكل
حسيت انها بتقلب حياتنا
مر شهر وقرب عرس بعلي العزيز ووقتها حملت ام احمد
ماتوقعت انهاا تحمل وولدها ماكمل ثلاث شهؤر
انشغلت بغلامين لان ام احمد وايد تتوحم ومتعبنها الحمال
استغلت العروس انشغالنا وكوشت ع بعلنا
فرت راسه وبدت توسوسله اننا نحن نتصل فيهاا ونهددها
عصب علينا ونحن ماندري شو السالفه
ابتعدعنا فتره وماصار ايينا الا نادرا
حتي فونه هي الى ترد علينا وتصكر بويهنا
انا فرت مارمت اتحمل
قالتليه ام احمد خليه ع راحته مرده بيردلنا
سمعت كلامها
فاجاأناا ناوي اييب حرمته عندنا ف البيت << البيت كان مقسم اقسام ايام ماكانو خوانه عنده بس الحينه كل واحد طلعله بيت
عدل قسمها بعد ما أخذ راينا ف الديكور والاثاث
تخيلوو بعد كل هالتعب قالت بكل بروده هب حلو
لولا احترامي لريلي ولا جان طحت فيها
عاشت عندنا كملكه
يالسه تهتم بعمرها وبشكختها وبطلعاتها
لدرجه انها ماترتب غرفتهاا
معتمده ع البشكاره
حتي الطباخ ماكلفت عمرها تدخل وتسوي شي
استلمت انا شغل المطبخ عسب اخفف عن ام احمد
مر شهر وشهرين لحد هني وخلاص مارمت اتحمل
تحملت مسؤليه البيت والعيال والحرمه اليديده الى يالسه بدون شغل
رمست بعلي العزيز بكل صراحه
قالى اوكي بكلمها
دخلو القسم وتمينا انا وام احمد ف الصاله
فجأه تبطل الباب وطلعت وهي تسحب شنطتها وتصيح
هالشي الى توقعته
لان بعلي مايحب الحرمه الى ماتقوم بواجب بيتها
كلمناه عسب يردها بس ماطاع
حرام تطلق وهي ماكملت السنه
ربت ام احمد ويابت بنوته حلؤه
دخل علينا بعلنا العزيز وقال لام احمد اطلبي الهديه الى تبينها
طلبت انه يرد مرته ع ذمته
رفض بالبدايه وبعد محاولاات ردها ع ذمته
الحرمه الى دخلت هالبيت من سنه مو نفس الحرمه الى دخلته
تغيرت 180 درجه
حتي بعلي انصدم وماتوقع انها تسكن ويانا بعد الى صار
بدت تشاركنا بكل شي
ودخلت المطبخ وقسمنا الشغل
وحده عليها الريوق ووحده الغدا ووحده العشاء
وصار عندي بدل الاخت اختين
تقربنا منها اكثر ووايد متفاهماات
صح مرات نتزاعل ونعصب ع بعض بس مايمر من الوقت الا ونرد نتصالح
حملت الحرمه الثالثه ويابت ولد وانضم لخوانه الثلاثه
اما انا بعد ماربيت حمد ماحملت من عقبه
فحصت وكل شي سليم بس كل شي بايد الله
صح قلبي يحترق وانا اشوفهن كل سنه وحده تربي بس ماشي بييدي عسب اسويه
ومر ع زواجي من ابو حمد خمس سنوات وهالسنه بمشيئه الله حملت بتؤم بنتين
والحرمه الثالثه ام عبدالله يابت ولد ثاني
من فتره رحنا لعرس حميتي وشفنا بنت دخلت مزاجي
تمنيت لو عندي اخو عسب ازوجها له
فاتحت بو حمد بالموضوع جان يمسك ع راسه وقالى انتي وشلتج متفقات انكن تزوجني
هههههههههههه اثريهن فتحن له الموضووع
ملاحظه : ريلي يحب تعدد الزوجات واحسن شي سويناه اننا خطبنا له وحده ع ذوقنا ولا انه اييب وحده تطيح ع كبدنا
ملاحظه للاخوات الى تتخبرن اني كيف ما اغار ع ريلي << اكيد كل وحده فيها غيره ع ريلهاا وانا عن نفسي وايد اغار بس قبل كل شي انا وافقت عليه ورضيت بهالعيشه
والحمدلله معيشنا احسن عيشه بيت واكل وشرب وطلعات وسفرات وحفلات ومعوضنا عن كل شي حتي الحب << عمره ماحسسنا انه يحب فلانه اكثر من فلانه
وهب مقصر عليناا بشي من كل ناحيه وكل الى نباه نحصله مؤجؤد
والاخت الثانيه الى قالت كيف رقصت ف عرسج وهو يالس حذالج << اختيه مافيها شي وايد حريم يرقصن ف اعراس رياييلهن ووحده حرمه اعرفهاا عزمت اهلها لعرس ريلها وهي الى قامت بهالعرس
حطن شي ف بالكن << ارضي ان ريلج يعرس عليج ولا انه يسوي الى يباه بالحراام
وترا الحرمه الى تتفهم ريلها وترضي انه يعرس عليهاا بوحده او ثنتين صدقني والله انه يحطها فوق راسه وتكبر بعينه
اما الى بتزعل وبتقوم الدنياا << بالنهايه مابتسفيد غير انهاا مثل ماطلعت من بيت اهلها بترد مره ثانيه
واشكر كل وحده ردت عليه برد محترم وجزاها الله خير والله يسامح الى ردت رد هب مناسب
وسمحوليه ع الاطاله كانو عنديه اليهال ويلست اسبحهم ومافضيت
واوصل سلامي لضراتي الى يتابعوني من خلف الكواليس
وبث
الله يخليكم لبعض
ويحفظكم من عين الحساد
ويدييم المحبة
لو مب معرســة جان خطبـــت ريلكم حقي 
اســولف لحد يشن هجومـــه :]
يـــاريت إذا ريلــي عدد يكونن طيبـــات وشرات خواتي 
حبيتكــم أحسكــم خوات ومثـــال حي إن كلام رب العالميــن وعدلـه
وتشريعــه لتعدد الزوجـات مب ظلم لنـا بالعكــس
نحــن الي نظلــم أنفسنـــأ
ربي يسخرلكم ريلكـــم وصراحـة احترمتـه لإنـه انسان عادل رغم الهفوات لكـن الكمال لله
ربي يحفظكم لبعض ويسخرلكم عيالكـم
ويــزاج الله خير أختي على تجربتــج لعل حريمنـــا يقتدون ^_^
مــاشاء الله تبارك الرحمـــــن
.gif "12 (43)")
قصتج احلى قصه قريتها
ياااااااااااااااااارب يسعدكم سمي لي على جريجاتج وااااااااااااااااااااااااااااااااااااااااااااااااا اااااااايد
وربي حبيتهم وحبيتج وياهم
لنكم عاقلااااااااااااااااااااااااااات الله يثبتكم بعقلكم يارب
سبحاان الله الذي الف بين قلوبكن وماا شي كبير ع رب العالمين 0
لكن ماا خبرتيناا عن مغامراات الحرمة الراابعه 00العروس !!
الله يسعدكن ويعطيكن ع قد النيه الطيبة الي في قلوبكن
ملاااحظه 00ريلكن امه دااعيتلة ^_*
تحيااتي حبوبة
ما شا الله عليكم عن الحسد ختفووووووووو
ربي يسعدكم و يهنيكم
موفقه ان شا الله ^^