خبز الخمير بالمكينه

المقادير 6اكواب اطحين رقم 1 /6اكواب طحين رقم 2/4فنايين قهوه شكر /3ملاعق طعام خميره/ 8بيظات/ملح حسب الذوق/للوجه بيض سمسم اوزعتر / الطريقه/ تعجن جميع المقادير بالماءلازم اتكون طريه مثل عجينه خبز الرقاق لاتكون يابسه ولاطريه اتكون وسط وتترك حتى تختمر بعدين اسخنين المكينه تمسحين ويه المكينه بالزيت علشان ماتلزق تاخذين كميه من العجين وتحطينه فوق المكينه تفرشينها تتركينها اشوي بعدين تمسحين على الويه قليل من البيض والسمسم بعدين تقلبين الويه الى الداخل حتى يحمر هني وعافيه

يعطيج العافية حياتي من زمان ابا اسوي خبز خمير بس ماعرف الطريقة بس فديتج الكمية جنها وايد عسب انا وريلي وععيالي 4 صغا وبعد بسألج وين احصل مكينة الخمير؟؟؟؟

اشكركم عالمرور اذا الكميه وايد بامكانج اسوين نص الكميه المكينه شريتها من عند الايرانيه او محلات المواعين تشتغل على الكهربه

شو اسم الماكينه

يعني شو نقول لهم

ماكينة خبز الخمير؟

هيه.. امي عندها هالمكينة من زمان..
شرات الجدر جي..
انا ما اعرف اعين خمير بس اعرف ان امي ما تحط 8 بيضات..
وماشاءالله عليها تعين منين طحين وتوزع..
امي تحط حبة حلوة وزعفران في العيين.. وساعات تحط حليب نيدو شوية..
بس الصراحة احلى الخمير يوم تسوينه ع اليمر.. امممممممممم لذيذ..

مشكورة