خبيرات تركيا عندي بعض الاسئلة

السلام عليكم خواتي العزيزات …. طبعا يوم قررنا انسافر قلت مالي غيركم اتساعدوني و تنصحوني انا ان شاء الله بسافر من 18/12 الين 4/ 1 اذا الله راد ..
ابا رايكم في الجدول الي رتبته من عقب البحث …
من مطار دبي الى اسطنبل و من ثم الى طرابزون حجزنا لمدة 3 ليالي في فندق نوفنتيل و بنسير يوم واحداوزنجيل بدون مبيت .وعقب بنسير بورصه 4 ليالي في بورصة في فندق الميراو منها بنسير يوم يلوا و بنرد و يوم الجبل و منها 3 ليالي ل ابانت و السكن في الاكواخ و عقب على اسطنبول باجي الايام في فندق مرمرة او تايتنك ….
الحين خواتي الغاليات ممكن اسال بعض الاسئلة …
1/ شو رايكم في الفنادق ؟
2/ ابا اعرف الطريج من طرابزون ل اوزنجول كيف و من بولو ل ابانت كي يعي مب خطر؟
3/ شو احلى الاماكن الي في بورصة و اتناسب اليهال ؟
4/ شو المناطق الجريبة من اسطنبول ممكن انسيرها ابسهولة واتكون حلوة ؟
5/شو الجو ؟
الملاحظة الاخيرة من فترة شفت وحده حاطة تقرير هي حافظتنه عن تركيا و الاماكن الي فيها من محلات و مطام و حدائق والله احتاج ها التقرير ….

و مشكوووووووووووووووورين

وينكم اهل تركيا

حشى بتتيمدون هناك هالوقت … مول ما يسوى .. بورصه 4 ايام شو فيها غير اليبل و التلفريك ؟

أختي بحكم اني وايد اقرى عن تركيا ومسافره لها شهر 12 ان شاء لله الياي

بخبرج من الاشيا اللي استفدت منها من خلال قرائتي ..

طربزون وازونجول في نهايه شهر 12 بتكون ثلوج يعني انتي يمكن تبين تروحين عشان الطبيعه بس شهر 12 وايد بيكون بارد في هالمناطق يعني توصل درجه الحراره لين 3

اما لو استقريتوا على هالجدول من ناحيه المواصلات ممكن تستاجرين سياره من اسطنبول الى طربزون بس بيكون متعب جدا لانه تبعد تقريبا عشر ساعات .. أو انج تاخذين طيران داخلي من اسطنبول الى طربزون ..

أما من طربزون الى ازونجول تستاجرين سياره او تكسي يعني ما اعرف كم المسافه بس قريبات من بعض..

أنا من وجهه نظري تقسمين المده بين اسطنبول ويلوا وبورصه وابانت ..
يلوا وبورصه وابانت مناطق ريفيه يعني طبيعيه مب مثل اسطنبول اللي هي مدينه ..
بشكل عام الجو بيكون بارد في كل المناطق بس اتوقع ابانت بتكون ابرد …

أنا صراحه اقترح عليج هالجدول خصوصا انه وياج اطفال واحس الجدول وايد مرهق لهم :
3 ليالي اسطنبول .. 2 يلوا .. 3 بورصه .. 3 ابانت .. 5 اسطنبول ..

في النهايه اتمنالج التوفيق ورحله سعيده ..

وأتمني من اللي رايح تركيا في الشتا يعطينا رايه ..

دشي منتدي العرب المسافرون وحطي استفسارج في قسم تركيا وان شاء الله يردون عليج ..

مشكورين حبايبي و ما قصرتوا انا عيالي في خاطرهم يشوفن الثلج و يلعبون فيه في البداية ما كنا بنسير طربزون و بنكتفي اب ثلج اليبل الي في بورصه بس حرام غمضونا بنخليهم يشبعون من الثلج هناك و يلوا من قرايتي للي زاروها ما عيبتني اما بورصه فحسيت ان في مناطق جريبه منها اقدر اني اسيرلها و ارد

بالتوفيق

فندق النوفيتيل فطرابزون رووووووووووعه حجرتنا كانت تطل عالبحر وهادي الفندق وااايد استانست عليه وقريب الفندق في الاوت لت حلو تقدرين تمشين مشي 5 دقايق من الفندق والفندق عنده جدول توصيل لمول اسمه فورم كل ساعتين طبعا مجانا وااايد استانست عليه وبوفيه الفطور الذ شئ
طرابزون حلوه كلها طبيعه انا وريلي تمينا 4 ليالي هناك طبعا طيران داخلي ومن طرابزون ففندق النوفيتيل حجزنا كل رحلاتنا يوم لاوزنجول من غير المبيت فيها يوم كامل تقريبا بباص مع جروبات
ويوم سرنا مزارع الشاي وسميلا
ويوم سرنا منطقة ايدر روووووعه كانج فرسوم هايدي الدنيا خضار والجو بااارد وروعه وشلالات والخ

اما فبورصه ليلتين ويا ليتني قعدت اكثر حلوه صراحه واحلى شيء الجبل وركوب التلفريك وارخص عن اسطنبول

واسطنبول قعدت في منطقة السلطان احمد ليلتين وليلتين فتقسيم

وسفره موفقه يا رب ^^