خيانة زوجي أفقدتني الرغبة فالعيشه معاه! افكر فالانفصال!

بدخل على طول فالموضوع ،،، قدلي معرسه من سنه وخمس شهور ،،، وقبل ماعرس قالولي أن الريال "راعي بنات" !!! بس قالولي هليه أن الريال يتغير عقب العرس واني جميله واقدر أغيره ،،، المهم عرست وسافرنا شهر العسل وكنت ألاحظه يطالع البنيات "الظاهر مدمن مطالع" المهم كنت أشوف عنده تيلفون وفيه 200 وشي مب مقروءة!!! ولا كان يستعمله! وبعد فتره بنده وفره فالسيارة!! وبعد ثلاث أسابيع ماعدت أشوف التيلفون مول وكان يحب دوم يطلعني وتعلق فيه وصارحني انه عرف بنات بس ماحبهن إلا أنا اللي خذت قلبه!!! قلت له "ويا ليتني ما قلتها": كذاااااااب ،،، وهو قالي إياها من قلبه وأنا كسرت قلبه بردي !! المهم في يوم كنا طالعين سوى وهو نزل محل وأنا حاطه مدخن صغير فالسياره ومتعوده أدخنها ،،، المهم ما حصلت المدخن!! دورته فالكرسي اللي وراي حصلته في كيس معاه التيلفون المشؤوم هههههههه ،،، المهم بطلته وكانت الصاعقة!!! لقيت مسجات بنات وصور بنات وبلاوي الزمان كلها فيه!!! المهم طلع زوجي من المحل وخشيت التيلفون فالشنطه من الربكه،،، وكنت متغشيه طبعا ودموعي عشر عشر !!! المهم لين هديت سألته : وين تيلفونك الرصاصي؟ قالي فالبيت! بغيييييييت اموووووووت ! طلعته من الشنطه وأعطيته إياه بدون متكلم!!! وهو بغى يمووووووت ومب عارف هل أنا فتحته وشفت اللي فيه وإلا لا!! المهم حس أني مب طبيعيه ،،، وخلصنا مشوارنا وردينا البيت،،، وفالليل تم يسألني شو فيج ،،، ما قدرت أمسك عمري وقلت له أني فتحت التيلفون وشفت كل شئ فيه!!! قالي هذا ماضي وهذيل قح…… وانتي زوجتي جدام الناس وانتي المبدايه !!! اسمع وأنا قلبي مكسووووور وكنت أقول فخاطريه كذااااااب!!! المهم قلت له إذا كشف انك تخون بخليك وبرد بيت هليه وخلك ويراهن!! تخيلن دمعت عيونه وسكت ورقد!!! المهم مرت الأيام وأنا الصراحة فيني طبع خاااايس ،،، زعوله ! وإذا زعلت ما أرضى ! المهم بعد ثلاث شهور كنا سايرين نأخذ أثاث للبيت ونحن رادين نزل زوجي يطلب عشا وفجاه فضى تيلفوني ودورت الجرج ورا وخشيت يديه في جيب الكرسي ولقيت واير سماعه وسحبتها ولقيت التيلفون المشؤوم ههههه ،،، المهم فتحته ولقيت مسجات وصور بنت بغييييييييييت اموووووت ،،، وعلى فكره زوجي مب وسيم ،،، المهم صحت بصوت عالي فالسيارة والله من القهر،،، وخشيت التيلفون فالشنطه! وهالمره ما عطيته إياه،،، قالي يعان بطلي السندويشات ،،، وبطلتها وأنا ابكي ومختنقه ،،، عطيته قالي تعشي وبطلت سندويشتي وكلتها والعبره خانقتني وكلت وكأني اكل حصا ولا رمت أبلعها ولا أحس بطعمها!! المهم وصلت البيت وهو توضأ وصلى وأنا كنت فالحمام منهاره وأبكي واقرأ المسجات واقرأ ردوده !!! اااااااااه ،،، المهم هو طلع اتصلت عالخدامه وقلت لها هاتي شنطتين كبار ،،، وهي داخله شاف الخدامه وياني يركض وويهه ازرق من الخوف قالي شوفيج ؟ قلت له وانا ابكي: أنا نبهتك وقلتلك لو أكشفك بخليك!! المهم يته حاله هستيريه ويحب راسي ويقرأ عليه يتحسب حد صكني بعين هههههه ،،، قلت له خلص دوري معاك،،، المهم طلع ودق عالوالده وقالها أني بطلع من البيت ومعانده وراكبه راسي، طبعا أنا اتصلت عالسايق وخليت الخدامه تحط الشنط فالسيارة وفي هالفتره كانت الوالده تتصل وأنا مارد، رجع ودق عالوالده وسألته شو السبب وشو اللي صاير قالها أني لاقيه تيلفون جديم وفيه مسجات بنات ،،، جذاااااب المسجات يديده ،،، المهم وهو برا يكلم الوالده ظهرت من الباب الثاني ورديت بيتنا!!! وكان كل يوم يتصل عالوالده يشوف شو صار وبعد اربع أيام اتصل بي وبكى وتعذر وقالي اتجهزي بعد يومين بخطف عليج خذي أجازه من الدوام بنسير نغير جو،،، المهم سرنا وطول الدرب ما نرمس! ما كنت أحس بوجوده! والعبره خانقتني واحيانا ادخل الحمام أصيح لين تتفطر عيوني! ويلاحظ أني كنت ابكي وكنت أحاول ما أكون فالمكان اللي هو فيه! وعقب ثلاث ردينا البيت وطول الفتره هاي كأني إنسانه فاقده الإحساس وشعور غرييييييب ماعرف أوصافه! ومرت الأيام وكنت ما افتح معاه مواضيع ،،، وأشوف وأسكت! يمكن من الصدمة قمت ما اعبر عن اللي في داخليه !! وذيك الفتره كان هو يوصلني الدوام ويردني لانه طفش السائق وكان يشك في كل شئ حتى في ثيابه! ماعرف هي غيره وإلا شك! المهم يا موعد ميلاده والأصيل أصيل سرت خذت له هدايا وسويتله باقة ورد ويبت له كيكه "7 كيلو والله حتى لو اوزعها عالفريج بتسد وبتزيد" وييت البيت الظهر لقيته فالحمام على طول حطيت الهدايا وحطيت الكيكه ورتبت الصحون وشغلت الشموع وعطرت الغرفة وطفيت الليتات وظهرت وسكرت الباب ويلست فالصاله "سويت كل هذا من ورا قلبيه والله كنت بلا شعور" ،،، تفاجأ وشكرني وأعجبته الهدايا! وعقب فتره كنت ألاحظه دوم ماسك البلاد بيري، وفي يوم دخلت عليه الحجره وفجاه خش البيري في مخباه! ما قلت شئ ويوم ظهر طرشه له مسج قلت له: إذا في خاطرك حد وتبى ترمسهن عادي رمسهن جدامي وانته كبير على هالتصرفات ! كتب لي أني اتوهم وانتي الشك لاعبج!!! وطول هالفتره وأنا ماعرف شعوري تجاهه! وتعبت نفسيتي وفكرت استقيل من دوامي وسرت قدمت في وظيفه ثانيه وهو اللي كان يوديني وسويت المقابله وشاف رياييل هناك ورفض اداوم هناك وتميت مصره على قراري لان هو وضعه المادي اقل عني ولا اقدر اعتمد عليه وكنت أقوله يوم انك ما تباني أداوم في هالمكان عيل دورلي وظيفه! قالي تمي في وظيفتج! وذيج الفتره كرهت دوامي الجديم وأصريت استقيل واستقلت! وقبلوني فالوظيفه اليديده وسوالي سائق وداومت! وعقب شهر من دوامي قررنا انسير العمره،،، للعلم عقب عرسي بكم شهر سار الحج ويا ربعه عشان ياكدلي انه تغير وانه اهتدى!!! المهم سرنا العمره وردينا،،، وعقب فتره لاحظته متغير وطنشت وما حبيت افتح مواضيع لأني صدق تعبت من المشاكل،،، وفي يوم نسيت شنطة المكياج في السياره وكانت الساعه 11 الظهر وقلت فخاطريه اكيد ذاب المكياج، ومفتاح السياره عنده وسرت أدوره في جيبه ولا لقيته ولقيت مفتاح سيارته الثانية قلت أكيد حاط المفتاح فيها خذته وسرت أدور ولقيت تيلفون فالسياره! فتحته ولقيت مسجات وأرقام المهم نسيت سالفه المفتاح وأخذت التيلفون ووعيته وسألته قالي مب مالي مال ريال!!!!! طبعا فريته عليه وأخذت ساماني وسرت بيت هليه وتميت اربع أيام وفاتحت خويه أني أبى أطلق لأني مب سعيده معاه! سألني عن الحاصل ولا قدرت أقوله ! قالي اتحملي وادعي ربج والناس لو تطلقتي ما بتخلينا وبنستوي علج فحلوجهم والحرمة تتحمل وفكري تيبين عيال بتنسين وبيتغير الأحسن !!! قالي تعوذي من الشيطان وردي بيتج ورايلج! ورديت البيت خواطري مكسوووور متحطمه من الداخل، وطرشت له مسج وقلتله رجعت عشان خاطر خويه وبالنسبه اليه انته ولا شي في حياتي! ورقدت فالحجره الثانيه يومين، ولين اليوم مب مرتاحه وأريد أطلق وخويه خايف من كلام الناس! وماعرف شو أسوي ! تعبت تعبت من الوحدة ! والثقه معدومه! وهو حاول يكلمني أكثر من مره لكن أنا مخنوووووقه منه ولا ودي أشوفه ! دخيلكن انصحني ،،، مب عارفه أخذ قرار،،، وإدري الطلاق مب شئ هين لكن أنا أحس ما تم شئ أبقى عشانه،،، وهالفتره كله اتجاهله والمكان اللي يكون فيه هو أنا اظهر منه،،، وقمت اطلع من دون ما أشاوره لدرجة انه اتصل عالسايق يسأله أنا وين أروح! وقاله أي مكان مدام تروحه اتصل وخبرني!! وأمس اتصل عالسايق الساعه 12 يسأله أنا فالدوام وإلا ظهرت مكان!! تعبت والله تعبت،،، دلوني أي نوع من الرياييل هو؟ على فكره هو أكثر وقته فالبيت وعالساعه 10 يسير يسهر عند ربعه لين الساعه 2 فالليل ! وتيلفونه إذا رن يرد عليه جدامي! ماعرف شو هالتناقض في حياته!! أفيدني الله يرحم والديكن!