دلوني شيروا علي كيف أصارحهم بالحقيقة!!!!!

الله يعلم علاتكم ومعزتكم عندي ..

والله يعلم إني يوم أنصح نصايحي تكون لوجه الله … والله يعلم إن مالي مصلحة عند أي وحدة في المنتدى .. الكل ربيعاتي في النت وأشوفهم شرات خواتي ..

مشكلتي يا بنات إني ما أحب الخداع ، ولا أداني حد يطيح في خطأ أنا طحت فيه قبل .. أنصح وأنصح وأنصح .. ما أريد حد يتعرض لأي موقف كان ممكن يتجنبه لو نصحته ..

الحين بتقولين اش عندها العذوب اليوم مستويه هذربانه ..

اللي عندي هو الخوف عليكم .. الخوف على خواتي ..

حبيباتي ..

أنا لاني تاجرة ولا يخصني في التجارة .. بس فيه أشياء قاعدة تصير في القسم التجاري .. أشياء ممكن تمر على البنيات اللي ما يعرفن وايد لخبايا الانترنت .., بس .. أنا ما أزكي نفسي على الله .. لكن أعتقد وحدة تطقطق ع النت من سنة 1997 أكيد بيكون عندها خبرة كافية في سوالف الانترنت الخفية ..

أول شيء .. فيه رجال في المنتدى ..؟ مختفين ورا أسماء بنات .. وبعضهم حصلوا على خاصية التاجرات بعد ..

كيف عرفت أنا هالمعلومة ؟

أولا: بعضهم مشاركين في منتدى أنا مشاركة فيه بأسماء رجالية ويحطون نفس الاعلان المحطوط عندنا بنفس التنسيق والألوان !!! وحتى بنفس الأخطاء الاملائية!!!

ثانيا: البضايع اللي يعرضونها صعب تعرضها حرمة في منتدى بنيات يشترن فساتين وميك أب .. يعني غريبة تلاقين عرض عن فندق للبيع في منتدى بنات .. أحس ولا وحدة مننا عندها تشتري شقة موب فندق!!

ثالثا: بعضهم شيكت على رقم الآي بي مالهم .. وتأكدت إن الاسم النسائي هنيه … يدخل بالنك الرجالي في المنتدى الثاني .. من نفس جهاز الكمبيوتر ..!!!

الحين .. وين المشكلة؟

المشكلة إني موب رايمة أقول للشخص إنت ريال موب حرمة .. ولا رايمة أقول للادارة شوفوا هالشخص ريال .. !!

مالقيت حل غير إني أكتب هنيه .. احترسوا يا بنات .. دوروا في الاقتباسات اللي يحطونها في المواضيع عن آراء الزباين .. إذا لقيتوا اسم تعرفونه طرشوا رسالة خاصة تأكدوا ..

الشيء الثاني أو المشكلة الثانية ..

هذي عاد الطامة .. ما أعرف كيف أكتبها ..

شوفوا بنات ..

من زمان أول ما دخلت المنتدى شفت إعلان وحدة حاطة عن دخون تقول خالتها تسويه وعندها كم غرشة تبا تبيعهن وحاطة في إعلانها ألف يمين إن الريحة غاوية وشيوخية وكم اقتباس كلهن مدح في دخونها وعطورها والمخمرية و,,

ذيج الفترة كانت أختي تتزهب للعرس..

فتشجعت أشتري من عندها ..

راسلتها .. وطلبت الطلبية غرشة من كل نوع .. وسرت اروحي لين قريب بيتهم أستلم ..

دفعت مبلغ يزيد عن 800 درهم .. حول الألف تقريبا .. وأنا أقول لعيون مناير أختي كل شيء يهون ..

يوم وصلت البيت ..

فتحت الغراش .. بس موب كلهم .. كانت فيه غرشة عود معطر ما هانت علي لأنها مغلفة ببلاستيك ما بغيت أفتحه ..

خذت من الغرشة الأولى "تناتيف " الدخون اللي لاصق في الغطاة .. وحطيته ع الفحم أباأجرب .. طلحت الريحة حكرة!! دقيقة وحدة بس كان فيه ريحة دخون عقبها ولا شيء!!!!!
جيمة الغرشة هذي حول 300 درهم!! الصراحة اغتظت ..

جربت الثانية .. حطيت "طشووووونة" من الدخون اللي فيها … ونفس الشيء .. لا و( بق) يعني اشتعل ع الجمر..! يعني فيه كحول …

والمخمرية اللي كاتبه فيها قصايد البنت .. ما اتيي ربع عقلة الصبع!! والمصيبة سعرها فوق 100 درهم ..ريحتها موب واضحة شو بالضبط .. أنا متعودة ع المخمرية من سنين .. مخمريتي ملكية اتم في شعري اسبوع وأغسله مرتين وريحتها تبقى أشتري التولة بخمسين…. وللي ما يعرفون في العطور مستحيل سعر المخمرية يكون أكثر عن 100 درهم للتولة هذي المخمرية الفاخرة جدا جدا .. موب ربع تولة سعرها فوق الـ 100 .. أنا يوم دفعت 100 ع بالي 3 تولات .. ما دريت إنها نص ربع تولة !!!

عمري ما حسيت إني مخدوعة .. إلا ذيج اللحظة ..

اتصلت فيها ..

أول شيء ما ردت ..

طرشت لها مسج كتبت لها " الله يسامحج" .. كيف أهدي أختي هالدخون وهي عروس!!!

جان تتصل .. وهي الله يشهد بنية اسلوبها مهذب .. قالت أنا ما أرد اللي أبيعه .. قلت لها بس أنا موب مقتنعة .. وما أريد أحط فلوسي في شيء موب مقتنعة به .. حرام .. هالدخون ما يسوى 200 درهم .. جذيه أحس إني مخدوعة …

سكرت وردت تتصل .. قالت خلاص أوكي.. بس ما تكون البضاعة حد استعملها .. قلت لها لا تطمني …

ورديت لها البضاعة ثاني يوم العصر وخذت فلوسي..

أول ما وصلت البيت اتصلت بي ..

وقالت كلام بايخ :إن البضاعة ملعوب فيها والله يعلم إني ما فتحتها .. حتى المخمرية ما فتحتها .. قلت لها شوفي حبوبة .. أنا أفهم عدل في الدخون والعطور .. واللي تبيعينه موب من النوع اللي أنا وأهلي نحبه .. يعني يمكن يعجب حد غيرنا .. بس أنا لأ.. وقلت لها .. أنا ما فتحت بضايعج المغلفة .. أما المفتوحة نعم خذت منها شيء ما يغير في شكلها أبدا..

جان تقول أنا الحين ما أريد الدخون .. برده عليج .. قلت لها ليش السالفة لعبة .. بضاعتج وصلتج وانتهينا .. أنا ما عجبني الدخون والناس أذواق .. والفلوس ما بعطيج اياهن ..

قالت عفانا الله عسب 870 درهم .. قلت لها: هيه لأني موب لاقطتنهن من الشارع ..

جان تصك الخط ..

عقب ربع ساعة .. ياني رقم غريب 3 مرات .. المرة الرابعة رديت .. واللا حرمة مصرية تسبني من خاطرها .. وتقول : انتو ناس حرامية .. أخذوتوا بيزاتنا وسرأتوا أغراضنا .. !!!!!!!!!

أنا إنصدمت .. قلت لها : حووووه !! منو انتي؟

جان تقول أنا أم فلانة( تعني صاحبة الدخون اللي تحلف إن خالتها تسويه… عشنا وشفنا مصريات يسون دخون اماراتي!!! )

جان أقول لها: هلا خالة .. آمري..

ردت: أنا ما أمرشي ولا شيء.. نحنا نبغي حقوقنا .. انتي خزيتي الدخون من عند بنتي بعدين خربتيه وحطيتي بداله شيء تاني .. والحينه يايه تقولين دخونكم موش حلو!!

قلت لها : خالة عيب تغلطين في حقي .. أنا لاني حرامية ولا هذي أخلاقي .. أنا مربايه .. واللي صار إن دخونكم ما عجبني .. والناس أذواق..

ردت بعصبية: وعلشانو ما عجبك تروحين تكبين المعمول:!!! ( والله إني ما فكيته من البلاستيك) .. وتخربين الدخون !! أنا بشتكي عليكي في الشرطة

جان أرد عليها بعصبية هالمرة: أعلى ما بخيلج اركبيه .. ودخونكم موب غاوي .. وفلوس ما بعطيكم .. وانتهينا !!!

ساعتها سكرت الخط في وييها واتصلت لبنتها .. قلت لها أنا ما غلطت على أمج لأني احترمتج .. بس لو شفت رقمها مرة ثانية بموبايلي .. بعلمها إن الله حق…!!!

البنت وحليلها اعتذرت وسكرت …

الحين وين المشكلة وليش أنا أقول لكم هالسالفة ..

لأن البنية صار لها فترة مسوية حشرة باعلانات دخونها ومنتجاتها .. وأنا أعرف إن أغراضها ما تسوى .. ويحز في خاطري أشوفها تسرح وتمرح .. لا ومسجلة بكم اسم .. عسب تمدح بضاعتها بس..

يعني وحدة عندها 13 مشاركة … 8 من مشاركاتها تمدح في صاحبة الدخون ودخونها ومعاميلها وأسلوبها .. هذي بالله شنو ؟؟؟ متفيجة حق البنية!! لا هذي إلا هي نفسها راعية الدخون ..

أنا ماأريد أقطع رزقها .. بس مبالغتها في العرض تقهرني وااااااااااايد .. خص إن التعامل موب ذاك الزود أبدا ..

كفاية إني مرة دخلت موضوع تاجرة تبيع شيء بـ 120 وأنا شارتنه بـ 35 من محل في بوظبي.. كتبت لها موفقة .. أنا جربت هالشيء من المحل الفلاني !!!

عقب طرشت لها ع الخاص إن السعر وايد مرتفع وإني ماخذتنه بـ 35 درهم بس!!

ردت علي بذوق وانصدمت من السعر وقالت إنها متفقة مع مندوبة اتييب السامان والظاهر المندوبة قصت عليها ..

ثاني يوم والا مطرشة لي رسالة .. أرجوج غيري ردي عسب ما ينقطع رزقي!!! .. يعني أنا لو أبا أقطع رزقها بطرش لها ع الخاص.. والا بحط السعر ع العام ..!!!!

احترت والله في عقول البنات …

دلوني .. شو أسوي ..

كيف أقول للي أحس إنها ريال مختفي ورا اسم بنت انه ريال ؟؟؟

وكيف أقول للبنية عيب عليج الكذب وحلفان الأيامين الباطلة في مواضيعج علشان التجارة .. في كل موضوع خمس أيامين غموس .. وفي النهاية الدخون ما يسوى لا القيمة ولا الرمسة ولا الذنب اللي تاخذينه!!!

عاد استرخصته قلت ابا عشر قراش .. يوم وصلن الله لا يراويكم ما ادري شو خالطة مقطعه الهمبا وصابة عليهن فلفل دقوس مادري فلفل بو شاهين الي عند الدكان ينباع أنقرهت يعني شي ما ينكل .. ودعيت عليها جزو عن هالغش الي يغشون فيه الناس ..

السمووووووووحه

انا اتمنى منج اللي شاكه انهم رياييل تراسلين الاداره و هم بيتاكدون بطريقتهم

ويمكن الغاليه يمكن تكون صدق بنت و مسجله باسم ريال في المنتدى الثاني عشان انه المنتدى فيه رياييل و تخاف تسجل باسم بنت و حد يزعجها و يتحرش بها…او انه حد من اخوانها يدش هاك المنتدى و هي تستخدم اسمه…كل الاحتمالات وارده…

انتي خبري الاداره او انتي راسلي البنت بطريقتج او عل ىانج زبونه و بتعرفين ان كانت بنت ولا ريال..

والله المستعان

لي لي .. ما أدري والله شو أقول لج عوضج على الله في فلوسج وفي احباطج من الأجار .. أسوأ شيء إن حد يخرب متعتج ..

الدلع العيناوي ..

تدرين أنا من سجلت مطرشة للادارة كم اسم مستعار لرياييل .. طبعا حاطه لنك على مواضيعهم في مدونة ثانية في الرسايل .. والرد الالي ياني من المشرفة .. بنراجع الادارة ..

عقب شفت ماشي فايدة هذا شيء ما ترومين تثبتيه .. هذا شيء يباله تأكد على طريق ايميل التسجيل في هالمنتدى والمنتديات الثانية من الادارة …

أمسااات أخبر وحدة من بنات المنتدى عن بنية مسجلة من فترة قريبة شكلها ريال .. لا وأبشرج لها موضوع واحد تشكي فيه حزنها وتعبها النفسي ووحدتها وتدور ربيعات !!!!!

وراعية الدخون يزاها على ربها ..

مشكورة غناتي