ربيــــــت بالسلامة بس شوفوا شو صار في المستشفى!!!!! قصة ولادتي

سرت موعدية حق الطلق الصناعي يوم الجمعه الظهر وقالولي مانقدر نعطيج التحميلة الحين لأن غرف الولادة فل وشي اربع حريم عاطينهن طلق وإذا ياهن الويع ماشي مكان حقهن :S

فقالتلي الدكتورة بتيج عقب طبعاً اتنقعت في المستشفى من ثلاث لين 11 يوم شرفت الدكتورة ولو دريت إني بتأخر جان رديتلهم عقب..

المهم يوم يت اتشيك عليه قالت الرحم فاتح عندج يادووووووب سانتي حتى هب سانتي وأنا قالتلي الدكتورة اللي عطتني موعد الطلق انه الرحم فاتح 2 سانتي المهم عطتني التحميله من هني.. وغفلت عيني الساعة 11 ونص ونشيت 12 حاسة بويع في ظهري شي خفيف وقالتلي لاتتحركين لين تكملين ساعتين عالفراش عقبها نشي وامشي المهم يوم يت الساعه وحده ونص سرت الحمام الله يعزكن ومارمت اسوي شي وخفت الياهل يفرط في الحمام 😛 ..

ظهرت ويلست احاول امشي في الممر وباموووووووووت من ريولي احس انهن مثلجات ومن كثر البرودة بيتكسرن عليه كأنهن قوالب ثلج وظهري يعورني يلست اطلب من الدكتورة تعطيني مسّهل أو شي قلت يمكن لأني مارمت اسير الحمام حاسه بويع قالتلي الصيدلية مسكره مانقدر نفيدج رجعي غرفتج وارتاحي هب لازم تمشين رديت الغرفة مارمت اقعد وماحسيت الا دمووووووع تصب مني وبعدني متشككه اقول ليش اصييييييح ماشي ويع في بطني!!!!!

رديت ابا انسدح وعقبها انبطييييييييت صيااااااااااااح تقولون ياهل خخخخخخخخ

ودقيت الجرس يتني النيرس قالتلي صبري بزقرلج الممرضة مالتج وظهرت وبدا الويع يزيد وارد ادق الجرس ويتني نفسها قلتلها انزين شو فرقت انتي بعد نيرس شوفي شو بلاني مستويعه يوم فحصتني اونه الممرضه مالتي داشه واسمعها تقولها فاتح عندها 6 او 7 سانتي ولادة ويربعون يودوني غرفة الولادة وعند الإستقباال قالوا مانقدر نستقبلها الغرف فل وشي غرفه خاليه وبينزلون مريضة بتربي الحين راحت النيرس قالت وهذي بتربي والرحم فاتح 7 سانتي ويدخلوني..

وطبعا اخت ريلي كانت عالخط نسيتها ونسيت اني كنت اسولف معاها لأني فجأة تميت اصيح واتدق حق ريلي عشان اييني لأنهم قالولي الصبح بتربين وصل ريلي وانا عالولادة وعقبها حايلني اخليهم يفتحون الماي عشان افتك لأني بديت استويع بالقو ظهر عني وفتحت الماي بدا الطلق يحمى المهم وقلت في خاطري هالولد بيظهر من ONE PUSH خخخخخخ لدرجة اترجيت ريلي يوقع عمليه طاعوا الخبال خخخخخخخخخخخخخخخخخ

المهم ومن قلة الستاف عندهم الممرضات يعني ….. اللي تولدني تولد وحده عدالي وطول الوقت انا الا دمووووع وبس ويوم حست الراس بيظهر يلست اصرخ هيييييييز كااااااامينج اونه وووصل عشان يفهمن وريلي يقولي لاتصرخين اقوله لا ازقرهن خخخخخخ ربعت نيرس عادية واللي تولدني يالسه تقول انه الحرمه اللي هي عندها الراس ظهر بعد فقالت النيرس انها بتقعد عندي ربينا انا والحرمة مع بعض ورجعتلي اللي تولدني وضربتني ابره حق المشيمة وانه وحده بتربي وتربع صوبها وتخليني وترجع عشان تظهر المشيمة وجرس ثاني بعد وحده تربي في نفس وقت ظهور المشيمه عندي..

وصل طويل العمر بالسلامه فديته فاااار صغير.. فديت اللي متعبني وهب طايع يظهر خخخخخخ بس الحمدالله الولادة كانت سهله..

نوصل لتعامل المستشفى الخيااااااااااااااااااااس.. رحت الغرفه الفجر وقالولي ماشي غرف في أي بي قلتلهم انزين اجنحة الكرنيش قالوا فل والرويال بس حق آل نهيان أو المفروض كنت اييبلهم كتاب قبل لا أربي.. قالولي اسمج أو اسم في الليسته اليوم الثاني بننقلج

طبعا ستاف النهار تعاملهن خاااااااايس ومالهن خاطر على شي ولازم تزقرينهن حق كل شي.. وبعد مايبن.. والياهل مابيشلنه عنج لأي سبب يعني أول يوم قلتلهن ابا انا توني مربي ومارقدت من يومين ماطاعن وسبحوه في الغرفه عندي والغرفه بااااااااردة موووووووووووت ويبدلونله بامبرز عندج المهم ثاني يوم يوني حق غرف الفي أي بي عشان ينقلوني قالت الدكتورة لا هذي مرخصة اليوم بتظهر!!!!!!!!!!!!!!!!!!!!! نعم شو طرررررررده هي؟؟؟

قالت ماتحتاج تقعد ماخيطناها عشان تقعد!!!!! وأنا كنت حاسه بألااااام تحت فخبرت النيرس ويوم شيكت قالتلي عندج جرح من ولادتج القبليه اتبطل وتحتاجين خياطة لأنه شكله ملتهب!!!!!!!!

وعقبها رجعت الدكتورة قالت لا ماتحتاجين استخدمي كمادات ثلج وهالكريم "عطتني كريم وكمادات" وقالت بتصيرين بخير حسيت انهن صدق خيااااااس ويبون الفكه لأنهم عاطيني غرفة هب مشتركه بس صدق حسيت عقب الإدارة اليديده المستشفى اختس والعنبر اللي كنت فيه ماشي غير ممرضة وحده ومسؤولة!!!!!! اتخيلوا الظغط كيف وكله كوم واللي يبدلن الفراش مالهن خاطر طاف يومين عالفراش اللي كنت راقده عليه وزقرتها تبدله والفراش نظيف .. قبل لاتبدله شو قالتلي ……. مداااااااام نيكست تايم وير 3 بااادز وججججججججع قهرتني اونه البسي مره ثانيه ثلاث فوط!!!!!!