بنوتي فديت روحها كملت الـ 3 شهور.. ورقادها معتفس ومتعب ومن عمرها 3 أسابيع عندها مشكلة فالرضاعة..
هاي بجري الله يحفظها وبخبركن بالتفصيل عسب اعرف ها طبيعي ولا لا.. ابا اطمن.. لان وديتها اكثر عن دكتور قالوا ما فيها شي..
اول شي بالنسبة للرضاعة .. انا ارضعها طبيعي..
وقت ايي ارضعها اتم تصييييييح تبا ترضع بس ما تقدر.. ادوّر تبا ترضع من اقربها مني واحطه في ثمها يزيد صياحها من اشلها تسكت..!
وبترد ادوّر تبا ترضع تمص ايدها ولا رقبتي او ذراعي اي شي جدامها ومن ارد ابا ارضعها نفس الحالة صييييياح مب طبيعي.. اللي مستغربة منه من ايي برضعها تصيح مع انها تبا وتكون فعلا يوعانة ومن اشلها تسكت..
فالنهار احيانا تسوي جي واحيانا عادي بس فالليل لازم هالحالة.. والوقت اللي ترضع فيه عادي ما يزيد عـن 5 دقايق.. احين هي كبرت المفروض تشرب كمية اكبر.. هي لا نفس الشي..
وبعد وايد تشرق سواء وهي ترضع ولا هي راقدة..مول ما امن اخليها لازم تشرق واحسها بتختنق وما تروم تتنصخ..وديتها اختصاصي اذن وانف وحنجرة وقال مافيها شي..
انيي لرقادها..فالليل مول ماشي رقاد.. هاه حال كل اليهال.. بس هي سهرتها متواصلة..
ترقد 4 ولا 5 الصبح لين 11 الضحى امبينهم نص ساعة اوعيها عسب ترضع من تعبها ما تروم ترد ترقد ابدللها واخليها راقدة..
بعدين خلاااااص ما ترقد..اتم تصيح تبا ترقد.. ارقدها وما يواحيني احطها في سريرها الا وهي ناشه.. ونتم على هالحال للصبح..
فالليل اخلي بس الاباجورة تشتغل ومول ما الاعبها اتم ساكتة عنها وماشي فايدة..
ينهد حيلي وياها .. مب انها واعية وساكته لا بتم تصيح شليني وخليني واقفة.. في ايام يكون بطنها يعورها وينعرف من صياحها بس ايام ثانية بس صياح عـ الفاضي..
احس جي وايد تعب عليها ولازم تاخذلها فالنهار مرتين او 3 مال ساعتين متواصلة رقاد عسب تكون مرتاحة فالليل وترقد.. بس ما اروملها ارقدها ترد تنش على طول..
اسبحها الظهر ترقد ثلث ولا نص ساعة وترد تنش..مع انها قبل لا تكمل الشهرين من اسبحها ترقد وطوّل..
وايد متعبتني مول ما اروم اتحرك من حذالها ولا بتذبح عمرها من الصياح.. حدها لو بتلعب بروحها 3 دقايق ومن تحس انها بروحها ومحد يلاعبها بتصيح..
وايد اعاني وياها وابدا مب محصلة وقت حق عمري واللي متعبني اكثر انها تغمضني وهي تصيح فـ حضني ومب عارفة شو اسويلها..
وااااايد رمست.. المهم بغيت اعرف ها كله طبيعي..؟ وشو اسوي وياها عسب ترتاح وارتاح وياها..؟
بس لا تحاتين حبوبه ها شي عادي بس لانه اول بيبي لازم بتتعبين شوي
لا تعودينها عالشل ابدا ترى بتتعبييييييييييييييين خليها بتصيح شوي وبتسكت …
وبالنسبه للرضاعه حاولي تنظمينها بالوقت لا تخلينها لين تصيح وما تعرف ترضع …
من عقب الساعه 8 لا تخلينها ترقد لاعبيها بتتعب عقب بترقد فليل…
اهم شي ريحي بالج لا تحاتين ….
اول فتره جي عقب كم شهر بيتغير الوضع حبوبه ….
انا بنتي كانت جي اتسوي من احط صدري في فمها اتم اتصيح مع انها يووعانه ليييين تركت صدري وفطمتها وقمت اعطيها الرضااعه وان شااء الله بنتج مااتكوون شراات بنتي ..
انا اقوول يمكن بنتج فيها غازات وحليبج يزيد غازااتهاا..
امسحيهاا دووم على بطنهااا وحطيها على بطنهاا..
وعقب الرضااعه لاازم اتجدينها عدل لين اطلع صووت من فمهااا ,,,
وعن الرقااد اغلب اليهال جي وان شااء الله تكبر وينتظم رقاادهااا
حطي حليبج في المرضعه شوفيها تشربها اذا شربت معناته هي رافضه صدرج
والله يعينج^_^