السلام عليكم و رحمة الله و بركـآته
كيف حالكم بنــات ؟؟
ممكن مساعدتكم ..
من بدا رمضان و أنا آآآكل كل شي .. و زآد وزني
و خاطري أسوي ريجيم فرمضان ..
ممكن تنصحوني ؟
شو الوجبات اللي تاكلونها في رمضان ؟؟
و تنفع للريجيم ؟
ابغي شي سهل و بسيط و نقدر نلاقيه في كل بيت ..
يعني وصفات بسيطة و سريعة ..
أتمنى تساعدوني و تشجعوني ..
أخاف ايي العيد و أستوي دبدوبة و ما أقدر أكشخ ..
أنا مشكلتي اني ضعيفة العزيمة .. أبا تشجيع .. ممكن يا حلوات ؟؟
خاطري انزل 5 كيلو بس
حتى أنا يا ريت أنزل 5 كيلو لين العيـــد ..
بسوي حفلة لو ضعفت
اكلي من اكل البيت بس بحدود .. بقولج جدولي والحمدلله قاعده انزل عليه .. باستشارة دكتورة التغذية اللي اتابع عندها ..
يوم تيين تفطرين ابدي بالتمر وعقب اللبن .. وعقب اشربي شوربة بس خفيفة .. واذا شي مقالي كلي بس حبتين .. انا هنيه اكتفي واقوم اصلي ..
عقب يعتمد على نظامكم اللي متعودين عليه .. في ناس تاكل الوجبة الرئيسية على طوول ونااس لا .. واحنا مرات جيه ومرات جيه .. يوم بيي اكل اخذ لي بصحن واستخدم الخاشوقة .. يعني اغرف لي بصحني بحدود سبع ملاعق عيش .. ولازم السلطة .. قبل كنت اغرف شكثر ولا اشبع .. بس الحين الحمدلله سبع خواشيق واحسها تشبعني .. ومرات اخلي شي بالصحن .. ولا تشربين سوائل على طوول اتريي ساعة او اكثر .. عقب الفطوور بساعة سووي رياضة المشي .. واايد بترتاحين .. وعالسحور كلي شي خفيف يعني ربع خبزة ويا صدر دياي وزبادي او سلطة .. وان شاء الله بتنزلين .. ^__^
إن شاء الله بيخف وزنج .. ولو مآ ضعفتي ما بزيد وزنج