ريلها بعده ع حبه الجديم

السلام عليكم ورحمة الله وبركاته

شحالكم سيدات وبنات الامارات الغاليه وخواتنا الباجيات كلكن والله غاليات

المهم بدخل بالموضوع

ربيعتي متزوجه وصار لها مده لكن اكتشفت ان ريلها
كان يحب وحده ثانيه قبل لا يتقدم لها لكن خانته مع واحد
غيره وتزوجت هذاك وربيعتي حاولت انها تنسيه لكن للحين هو يحبها
ومره سالته اذا ردجعت لك البنت بترجع لها قال لها اكيد برجع لها
ربيعتي زعلت وخذت بخاطرها لكن ما بينت له..

المهم حالتها وايد تعبت ماتعرف شو تسوي هيه ماتبا تتطلق لانها تحب ريلها
وودها تساعده لكن ماتعرف كيف كل اللي تقدر عليه سوته عطته قلبها
وكل شي يباه تسوي له تدور على رضاه هو يحبها بس قاسي قاسي
وايد وبنفس الوقت يحب هاذيك ودوم يهديها اشعار لكن هالاشعار
مكتوبه لهاذيك…

بنات دخيلكن ساعدوها قولو لها كيف تتعامل معاه لانها خلاص تعبت
ودوم تصيح هيه تحبه وهو يحبها لكن بعده ع حبه الجديم وهيه من النوع
اللي يغار وايد وانا اقول لها هاذيك البنت خلاص تزوجت وراحت بحال سبيلها
تقول لا عادي يرجع لها وهيه عادي ترجع مادري كيف جي صارت توسوس
وايد … وربيعتي بعد كانت تحب واحد قبل وريلها يدري ودايما يقول لها خلاص انسيه مابتردين له( يغار عليها) وهو مب راضي ينسى وحالته النفسيه شوي
تعبت لان الخيانه شي مب سهل ونحن ندري بهالشي لكن ربيعتي نست حبها الجديم
عشانه وتراضيه واذا غلط عليها هيه اللي تراضيه ماتقدر على زعله حتى لو هة الغلطان لكن هو ما يعتذر ويكلمها ولا كانه مسوي شي وفار قنبله توه على راسها
لكنها تسكت وتصبر لكن لين متى….
بنات ادعو ان الله يهديه وينسى هاييك واللي عندها حل ياليت ماتبخل علينا وهيه
ماتبا تتطلق تحبه وهو بعد يحبها (الله يهديهم ويوفقهم) لكن تعبت
وبكون شاكره لهاااا

السلام عليكم الغاليه و الله أنها مسكينه الغاليه نصيحتي ليها تستوي ثجيله شوي عليه و عن أنه يوم يزاعولن هي دووم أتراظيه هذا غلط لأنه هو بهاي الطريقه ما بيحس بغلطه و بعد بيسوي نفس المشاكل ولا بيفكر في عواقبها لأنه هوحاط في راسه و عارف أنه هي بتراظيه قوليلها تستوي شوي ثجيله و يوم يغلط خليه تحسسه بغلطه و مب بسرعه ترضى عليه .. و عن أنه ما نسى هاذيج البنت إلي يحبها في طريقه يمكن تكون قويه بس نصيحه كل ما تكلم عنها بحب و حنان و انه مشتاق و مب قادر ينساها قوليله دوم أتذكره بخيانتها لأنه هو خلاص عرس و هي حرمته مش هاذيج إلي ما قدرته و الخيانه أصعب شيء عالريال يعني خليها تيود نقطة الظعف عنده إلي هي الخيانه … و قوليلها دووووم تتعدله و تكشخ دووووووووووم و ما تتريا منه كلمه عالمديح أو شيء و كثر ما تقدر ما تكون سلبيه وياه لو ذكرها بس أنه ترد عليه بالمثل أنه تقوله أنت معرس و أنا حرمتك أنت كيف ما حبيت أنا بعد حبيت بس أنا في حياتي مافكرت أكسر قلبك أو أذكر طاريه جدامك بشوق بس أنت ما تراعي مشاعري و تذكرها و هي إلي ألحين مرتاحه و عايشه حياتها و باعتك كيف تفكر أنك ترجع إلها …. أنا بعد أقدرأفكر نفس تفكيرك بس أنا ما أسمح لنفسي أني أفكر في واحد غيرك لأني خلاص أعتبرك ألحين أول و أخر حب في حياتي و أني أوفيلك و أكون حبيبتك و زوجتك و ربيعتك و أمك و أختك ….

أعرف الغاليه طولت بس قليله جي و شوفي و أتمنى أتردين علينا شو صار وياج …

الله يهدي ريلها

و خلها اتعطيه وقت عشان ينسى ما رده بينسى

لان خلاص البنت اتزوجت و راحت في دربها

خلها تهتم في حالها و اذا صار بينهم مشاكل اهي تبدا بحلها

و اكيد مع الايام راح ينسى هذيج و يقتع نفسه ان مرته الي بتكون رفيجه دربه

و بعد شكلهم هم توهم اتزوجوا و ان شاء الله يوم بتيبله العيال ما راح ايشوف لحياته السابقه

و ان شاء الله الله يجمعهم بالخير

الله يعينها ويصبرها..
ما لها إلا الصبر
كثر ما تقدر خليها ما تطريها جدامه وتحاول تكون الأحسن تسأله شو تحب وتحاول تسوي اللي يباه
خلى أطول بالها عليه
ذا بغيتي استشاريه نفسانيه يمكن عندها طريقه للتعامل مع هذي المواقف عندي رقم سلطانه العثماني
الله يهون عليها

اذا يحبوووووووووون بعض ماظني شي يفرق مبينهم
لا حب جديم ولا يديد
الله المستعاان

هيه تسوي كل شي عسب ترضيه
لكن للاسف ماتقدر تذكره عن خيانة هاييك تقول قلبها يعورها
ماتبا تكسر خاطره زياده لكن انا معاج يمكن اذا ذكرته يمكن يطلعها من باله
لكن ربيعتي الله يهداها مب راضيه ماتبا تكسر خاطره لانه وايد يتعب نفسيا
وبعده للحين مصدوم وهاييك حامل بعد وهو اللي خبر ربيعتي
ماتدري كيف يعرف عن اخبارها والله تعبت غامضتني ربيعتي
والله يصبرها يارب ويهدي الريال آمين يارب
ومشكوره حبيبتي ع النصيحه تسلمين وربي يعطيج ع قد نياتج
وان شاءالله بخلي ربيعتي تقرا ردج

آمين يارب الله يسمع منج ادري صعب انه ينسى بسرعه
لكن البنت شو ذنبها يعذبها معاه هو تعبان وتعبها معاه
والله غامضتني
ومشكوره الغاليه ع الرد تسلمين والله فديتج