ريلي الخاااااااااااااين قتلنـــــي وانا حيـــــه!!!!!

اول شي احب اشكر كل وحده راسلتني على الخاص او ردت على موضوعي وساعدتني بافكارها يزاكم ربي الجنه وربي يفرج همومكم كلكم يارب ويحفظ رياييلكم ويبعد عنهم بنات الحرام (تعددت القصص والخيانه وحــده)

https://forum.uaewomen.net/showthread.php?t=937407
هذا موضوعي القبلي

تبووون تعرفون التطورات؟؟؟

شو اقول لكم يا خواتي غير اني تعبانه اكثر من قبل واحس انه يومي قرب على ايد ريلي المصون..والله احبه بس احسه مايستاهلني احس اني من بعد ماكشفته ما اصدقه احس انه يمثل علي..فنظري كل الرياييل خونه صرت ما اثق في احد ابدا ابدا لانه الي صار فيني مب شويه غير عن التعب النفسي

كله اسأل نفسي انا ليش معوره راسي عسب ريال مب حاس فيني واذا صار علي شي لاقدر الله مابيهمه امي بس الي قلبها بيحترق علي؟؟
كل ماتشوفني امي تسألني شخبار فلان اتيني الغبنه شو اقول لها كله ابين لها اني مرتاحه ودي احضنها واطيح على صدرها واصيح واصييييييح واخبرها عن كل شي مضايجني يمكن مثل ماهي خافت علي من كل شي وحاولت تحميني وانا فبطنها يمكن تقدر تشيل الهم الي فقلبي..مابيها تشيله كله ابيها بس تخفف عني شوي ابا حد يحس فيني يلمني يرفع معنوياتي..يالله فرج همي هذا اختبار منك وانا تعبانه استغفرك يارب..اللهم لك الحمد حتى ترضى ولك الحمد اذا رضيت ولك الحمد بعد الرضى ولك الحمد على كل حال..

رحت العمرة وياه ودعيت من كل قلبي انه الله يهديه ويسخره لي ويبعد عنه بنات الحرام..حسيت انه تغير للاحسن صار قريب اكثر من ربه وصار هادي اكثر بس من رجعنا احسه مفتقد شي الله يعلم شو هو معني كله اسولف وياه واضحك واكون تعبانه وحالتي حالة بس ما ابين له

الي كان يحبها خلاص ودرته لاني قبل ما اسير العمره وياه خبرت اخته الاكبر مني هي قريبه مني وتفهمت الموضوع وقالت انها كانت شاكه بتصرفاته لانه متغير على الكل مب بس علي سارت رمست البنيه وهذيج قالت انها ماتحب ريلي وهو الي قاط روحه عليها ومايصبر عنها وكله يفضفض لها عن مشاكلنا ويلجأ لها اذا صار شي بيني وبينه مع العلم يا خواتي المشاكل الي بينا استحي اسميها مشاكل هي خلافات بسيطه تصير بين كل زوجين بس اكتشفت انه يفضفض لها عشان يصير قريب منها وتعطيه ويه والله يعلم منو يقط روحه على الثاني..

المهم حميتي ادبتها ووقفتها عند حدها وهذيج طلعت خوافه قالت كل شي ..كل شي!!!! اشياء حسيت انه بيغمى علي كل ما اتذكرها كانت تصير جدامي وانا مب حاسه..صرت اكره العزايم لانها كانت تستغل وقت العزايم لما تشوف الحريم بمكان والرياييل بمكان..
كانت تتعمد تطلع وقت ماتشوفني بروح مع ريلي تحاول تلفت انتباه شباب العيله المتزوجين وعلى فكرة مب بس ريلي الي تلعب عليه طلعو نص شباب العيله (المرتبطين) تلعب عليهم الي يخاف ربه ماعبرها والي مايخاف ربه وايمانه ضعيف قام يركض وراها!! وتعلقت في ريلي اكثر لانهم كانو يحبون بعض قبل مايتزوجني

وكل الي في العيله عارفين قصة الحب بين قيس وليلى بس ماكان عندهم دليل قوي !! وحتى لو عندهم دليل كيف بيخبروني يمكن يتريوني اكتشف بروحي

في تفاصيل ثانيه ما احب اذكرها المهم هالبنت احس انها فرحانه لانها انتصرت علي صح انها ماقدرت تاخذ ريلي بس قدرت تسوي شرخ كبيييييييييير في علاقتي معاه واستولت على تفكيره وعلى قلبه

تذكرت قبل يوم يحلف انه مسح رقمها وتذكرت انه في اسم كانو خواته يدلعونها فيه يوم شفت تلفونه شفته مغير اسمها لهالاسم يعني بالعربي مامسح رقمها بس غير اسمها ماشاءالله عليه بس هي غيرت رقمها وكنسلت البطاقه هالجبانه..

بعده يفتعل المشاكل معاي يستفزني باسلوبه ويقط علي رمسه تجرح!!صار يطلع فجأة ويرجع متضايج احسه افتقد صوتها الي تعود عليه ليل نهار وكله سرحان ويفكر وانا ماصرت اجادله كله ساكته عقب يحس على دمه وايي يعتذر صارت حياتنا كلها اتهامات وتجريحات..صرت الهي نفسي بتجهيزات البيبي وببنتي فديتها الي يوم اشوفها انسى الدنيا ومافيها ماصار ريلي اكبر همي بس غصب عني اتضايج من حركاته واكتم واكتم وعقب انفجر واصيح بس جدامه ما طاحت دمعه من عيني

هذي هي تطوراتي حبايبي

وادعو لي ان الله يصلح من بينا ويبعد عنا عيال الحرام

ونصيحة لكل بنت تحب واحد متزوج خافي ربج ترى هذا المتزوج الي انتي متعلقه فيه عنده حرمة وعنده عيال مب كل الحريم بيصبرون شي حريم بيهدون البيت على راسج وعلى راسه وبتنفضحين جدام الناس يلي ماخفتي من ربج..الشباب المغازلجيين مكودين سيري اختاري واحد شراتج لاتحطين عينج على واحد مرتبط..واذا حقي ماخذته في الدنيا باخذه منج في الاخره وما بسامحج ابدا ابدا وبطالبج بحقي يوم القيامه..وادعي انه الله يرزقج بالزوج مابقول الصالح لانج ماتستاهلينه اخافه يبتلش فيج..الله يرزقج بواحد شراتج من طينتج يراويج الويل والدنيا دواره وكما تدين تدان وربج يمهل ولايهمل..

والسموحه على الاطالـــه فضفضت وقلت كل الي عندي