سؤال للي تركت وظيفتها عشان عيالها

السلام عليكم ..
خواتي اللي متزوجات وكانوا موظفات عندي سؤال لكم .. بصراحه انا وايد محتاره بالشي اللي ابا اسويه … وابا اعرف رايكم …

انا موظفه والحين حامل وبآخر شهر وبربي قريب ان شاء الله وافكر اطلع من وظيفتي عشان البيبي لاني ما احب اخليه عند الشغالات ,, وبنفس الوقت ما ابي اليوم اللي اندم فيه اني طلعت من وظيفتي ,, فأبا اعرف حسيتوا بالندم او بالملل لانكم طلعتوا من الوظيفه اللي كنتوا فيها ..
والله راسي عورني من كثر التفكير لاني حرام اخلي ياهل عمره شهرين عند الشغاله والمشكله اني ابد ما اقدر اعتمد عليها لانها للاسف ما تفهم بسرعه واذا في شي ما تتكلم اتم ساكته هيه وايد هاديه ومن شهرين وانا ادور على شغاله ثانيه بس للاسف اللي اشوفهم ما ارتاح لهم
فأبا اعرف تجربتكم بهذا الموضوع ….

شوفي عزيزتي امك او ام زوجك اذا بتقدرين تحطين عندها البيبي واذا ماشي مجال طفلك اكيد بحاجتك ما يتأمن هالشغالات ابد

ربي يسهل لك امرك

والله نفس تفكيري والقلق اللي عندي…ابني الاول بحطو بحضانة وكتير مرتاحة فيها وعمرو سنتين…بس هادا البيبي اللي جاي ان شاء الله مابقدر اتركو وهو عمرو شهرين ولا بأي مكان …واحنا كمان مغتربين يعني ماعنا حد حتى نأمنلو….ومافي احسن من حضن الأم والرضاعة الطبيعية…وانا فعلا بفكر أترك شغلي لحتى يجمد ابني…الشغل بيتعوض وبلاقي غيرو بس صحة ابني واحساسو بالحنان مابيتعوضو….الله يقدم اللي فيه الخير يارب

لو محتاجة للوظيفة وماديتكم تعبانة استمري
ودخلي ولدج حضانة او حطيته عن امج او عمتج مع توفير خادمة تسااعدهن فيه

لو مب محتاية بيتج اولى – وانا روحي موظفة وإن شاء الله قريب بودر الوظيفة لاني مب محتاااية ماشاء الله تبارك الله
وولدي مأمنه عنده بحضانة في مدرسة ماماتي عني فداها
بس احس بيتي وريلي وولدي ابخس بوقتي ^_^

أمي ساكنه بعيد شوي عني وأم زوجي ما شاء الله ما تطلع وجيه ،،. ومب هذا بس أنا من اشتغلت صرت وايد مضغوطه ويا ساعات الدوام والمذاكرة لليهال وغير الأنشطه والامتحانات اللي لها بداية وما لها نهاية
ومع البيبي بكون مضغوطه أكثر وبكون طول الوقت متوترة ..

لولا البيزات ما اشتغلت

وانتي ادرى بظروفج
واذا تحسين ان الياهل ما عندج حد تحطينه عنده غير الشغالة
فعيالج اهم
والشغل ترومين تعوضينه عقب