سالفتي ويآ هالليسـن / وسواقتي اللي بتدخلني موسوعة غينيس!

انا اطالعه وفاجه حلجي من الخوف: وين هاي بعد

الشرطي : انتي اول تراي؟

انا : هيه

الشرطي : واضح واضح

<< انا انجرحت مشاعري بس تميت سااكته لاني حساسه وايد

ورسبني طبعا :: ثالث تراي طبعا مر عادي والثالث والرابع لين وصلت الخامس

كالعاده عطوني رقم وكان فالأخير وابوي دقلي قلت له رقمي 22 قال لا وايد بعيد
وخلاهم يغيرونه لي وعطوني رقم 4 يمكن وليتني ماااغيرته ..

مرت الاولى والثانيه والثالثه ويا دوووري وركبت السياره

الشرطي يسولف ويايه وحالته حاله وانا خايفه طبعاااا ( على فكره لو تلاحطون كل الشرطه
فالمرور جيه لازم يسولفون ويا البنت عشان تحس براحه اكثر وتنسى الخوف)

المهم مشت الامور عاااادي لين وصلت عند الدوار … الشرطي ما قالي اغير الاتجاه
الا لما قربت من الدوار قال لا تدشين الدوار لفي يمين وانا كنت ماشيه بسرعه فلفيت
بسرعه وزين ما انجلبت السيااااره
وهنيه عاااد سمعت جمله من الشرطي جرحت مشاعري اكثر واكثر

قال : يالله بالستر .. اليوم بسير اذبح على عمري لاني ما متت بعد هاللفه

لما علمت ابوي نقع ضحك والله كل ما ايي حد يعلمونه بالسالفه ..

ونسيت السالفه قلـت برد اقدم واذا ربي كاتب لي بنجح .. مر التراي السادس والسابع
وواخويه رأف بحالي وقال انا بعلمها لانه المدربه شكلها ماتعرف شي وقالي يالله
بنسير نتدرب في مكان فاضي واناا ما ادري شو صارلي وقتها قلت له انت مب واثق ف سواقتي
ولا ما بتوديني مكان فاضي قال لا مب جيه قلت له اذا مب جيه ابا اسوووق من البيت لين
نوصل هناك قال اوووكيه … ولييييييييييييييته مااااقال لانه صارت كارثه وقتها

تصورووا توني قلت بسم الله وشغلت السياره بعدني ما ظهرت من البيت الا اطير سيارات
ابوي كلها وزين ما طاحت مظلة السيارااات بكبرها وطبعا باب البيت تكسر واخوووي
لعن السااعه اللي وافق فيها ( لانه سيارته يديده كان توه مظهرنها من الوكاله واناا
كسرتها له في ثانيه) وحليله ما قال شي تحمل السالفه كلها….

وعقب مرت الاياام ونجحت في عاشر تراي ..

( ذكرت لكم السالفه من اولها عسب تكونون على الخط ويايه وتعرفون معاناتي
وشكر تعبت )

بس المشكله مب هنيـــــــــــه

ابوي اشترالي سياره عقب ما خذت الليسن على طوول .. خلااني اسوق مره وسرنا السوق
انا ويااه لما وصلت يم الدوااار صاار شي يمكن خلاه يغير راااايه في موضوع سواقتي

وصلنا الدوار وانا كنت مخففه السرعه بس يت سياره ثانيه وتجدمتنا وتم يطالعناا يبا
يشوف منو يسووق ولما شاف انه بنت فالسياره زاد سرعته وسار ..( شكله قال دامها
بنت يعني ماعليهاا حرج هي وسواقتها) .. وانا انحرجت طبعا بس مشيتهــا عادي

وصلنا مكان معين فالعين الا اشوف كل السيارااات يسوون اشاير وحاله واعتفس المكان
كله بسبب سوااقتي وابوي طبعا منحرج لدرجة انه كان بينزلني وبيسوق بداالي واخوووي
يقولي انتي لما تظهرين مكان ( المفروووض نعطي الدوريااات علم عسب يفضون الشااارع )
اونه عسب ما تصير كوارث ..

والحين موقف سيارتي فالبيت من لما اشتراااهاا ومب مخليني اسوقها … حاولت وياه بكل الطرق
وماشي فايده … واخر مره رمسته من اسبوع تقريبا ورد عليه برده المعتاد
( الريال ما يأمن لما تظهر البنت بروحها وانا شفت سواقتج واخااف تسوقين ويصيرلج شي )
قلت له مابا اسير مكان بعيد بسوق يم البيت بس لين اتعود واقدر اتحكم فالسيااااره
قال لا حتى يم البيت مااشي ( وطبعا ذكرني بسالفة اخوي لما دعمت بسيارته الباب )

وانا بعد كل هالتعب والمعاااناه اللي عانيتها فالمرور ما اقدر اخلي الليسن مجرد زينه
عندي . .

مختصر هالسالفه الطويله :