شفاه ممتلئه وصحيه وجذابه بدون تشقق أو جفاف

خاص للبنات اللي يشتكن من تشقق الشفاه وأكيد تجربه شخصيه على نفسي وبناتي وخواتي

رقم 1
شرب الماي طول اليوم وهالشي كل البنات اتطنشه مع انه عامل رئيسي ومهم للحفاظ على الجسم والبشره والشعر والشفايف… يعني كله مرتبط ببعض ولا تقولين لي بس في الصيف ..لا حتى في الشتا برودة الجو تاثر على وضع البشره والشفايف

رقم 2
الاهتمام بالترطيب الخارجي بالمرطبات المناسبه للشفايف وعندنا في البلاد ممكن كذا ماركه تفي بالغرض وخل نشوف

قبل كل شي ابتعدي عن الفازلين لانه مب مخصص للشفاه

طبعا فيه منه أنواع مخصصه للشفاه بس مب هذا اللي في الصوره
الفازلين عباره عن ماده بتروليه بشكل هلامي عشان جيه تتفاعل ويا الجلد في الاضاءه وتسوده

================

البنات الصغار اللي مايستخدمن المكياج والارواج وهالسوالف يحبون ماركة لابيللو

خفيفه ومتوفره بعدة نكهات وبما ان شفايف البنات الصغار مافيها مشاكل جفاف وتشقق وايد فهالمنتج يناسبها وايد ومافيه لمعه تقريبا بس ترطيبه يدوم فتره طويله

بعد منتج ثاني من بودي شوب

بعد شي منه عدة نكهات بس هذا سايح شوي ويعطي لمعه بشكل أكبر بس بسهوله ينمسح ويحتاج اعادة ترطيب مره ثانيه
اللي ما يعجبني فيه انه لازم ينحط باليد يعني مره على الثانيه ممكن يتلوث واذا ماكانت البنت تحرص على نظافة ايديها قبل استخدامه

=========================

اني للأنواع المتوسطة الترطيب

هذا المرطب من لوكستيان ترطيبه حلو وايد ومايترك لمعه أو أثر والحلو فيه انه قاعده ممتازه للروج يعني بعد دهن الشفايف به نمرر البودره عليها وخلاف نحط الروج ولايسيح ولايتغير لونه
يفيد البنات اللي ما عندهم مشكلة تشقق يعني محافظه على الشفايف ومب علاج

=====================

الحين مرطب قوي لشفايف تعبانه من التشقق والجفاف وكل أنواع المصايب

كل البنات يوم اتيهن حمى لازم يستخدمنه لانه فعلا قوي ويساعد على منع تبخر الماء من الشفاه بالتالي ما تتشقق وبعد في الشتا يقاوم البرد بشكل كبير
فيه لمعه حلوه وطبيعيه
في العلبه يكون قوامه سلب بس أول ما تمسحين منه بصبعج على طول يسيح من حرارة الجسم…نفس الشي بعد مشكلة وضع الصبع فيه ممكن تحمله بالجراثيم

أنا عندي هالعلبه الصغيره كانت دعايه ويا العلبه الكبيره واحنفظت بها كل ما يخلص اللي فيها أرجع اعبيها من العلبه الكبيره بالطريقه هاي أحافظ على العلبه الكبيره ماتنفنح وايد بالتالي ما يخترب المنتج وبعد ممكن أحط العلبه في شنطة يدي
==============================

للصبايا الحلوات اللي عدن الثلاثين لازم يستخدمون المرطبات اللي تحتوي على كولاجين
عشان يزيد على الترطيب اعطاء الشفاه مظهر الاكتناز والمحافظه على حدود الشفاه من التجاعيد

أيدد شي ظهر في السوق بهالمجال من لوريال

لين الحين مب متوفر في كل مكان بس أكيد أول ما ينزل بشتريه …أنا خذت البروشور ومخليته عندي في الشنطه وكل ما سرت كارفور واللا الصيدليه ارزه بويه الفلبينيه :متى بتيبونه تعبنا اعلانات

ترطيب الشفاه جزء لايتجزء من جدول عنايتج ببشرتج فلا تهملينه أو تتناسينه عشان يوم تستخدمين الروج تكون شفايفج يبان عليها صحيه بهالروعه

أخيرا نقطه مهمه عودوا نفسكم عليها …خففوا من استخدام الارواج مسح الشفاه باللسان لان العاب مفيد داخل الفم لكن سبحان الله على الشفاه يتفاعل ويا الاكسجين ويحرقها يعني يسودها وهذا أخر شي تتمنين الحصول عليه صح؟؟

يعني اذا كنتي موظفه أو طالبه ولازم كل يوم تستخدمين المكياج والروج من تظهرين من الدوام على طول امسحي الروج وحطي من المرطب طول اليوم عشان تعوضين ساعات استخدام الروج طول النهار
وحطي في بالج في أنواع من الارواج تتفاعل ويا الشمس بشكل مضر بحيث انها تعمل على اسوداد الشفايف

مشكووووووره الغلا

بس استغربت من الفازلين ؟؟؟

انا كل ما ادور شي اوكي حق الشفايف << اشوف البنات كاتبين عن الفازلين

وانا الصراحه استخدمته هالفازلين بس صدقج موووووول مافادني

ممكن تخبريني اي فازلين المخصص للشفايف ؟؟

لاني استخدم انا هالمنتج اللي من بدي شوب بس بعدها شفاااايفي غااامجه ماعرف ليش

بالتوفيج الغالية

هالنوع أحيانا أحصله في سبينيس أو أبيللا
=======================

هالنوع بعدني ما تشرفت بمقابلته في البلاد عشان جيه ما حطيت صورته واكتفيت بالانواع الموجوده عندنا ومتوفره في كل مكان …العلب هاي كلها أنواع من الفازلين للشفاه ويوم أسافر بره بس أحصلها

الحلو في هالانواع من الفازلين انها بتركيبه مخففه فيها مادة الجل البتروليه مزيدين كمية الزيوت الطبيعيه أو شمع العسل وتتغلغل في الشفايف بسهوله مب شرات الفازلين العادي يتم يالس ع الشفايف تقولين مركبه كشافات عليها

حالتنا حاله من عقب مركز تحميل الصور الخاص بالمنتدى
دقي بالماوس على المربع ال x باليمين وخلاف على show the picture

اناااا بعد استغربت من الفازلين . .

مس جوكوليت يعني الصوره الاخيره مالت الفازلين مابحصلها اهنيه ؟؟ عيبني والله

ممم انا شفايفي صح جافه لاني اخذ حبوب عسب جيه والله اتكاسل اشرب ماي

احط عليهااا مرطب لي معطتني ياه الدكتوره والحمدالله اوكيك . .

بس ابااا اجرب هالفازلين اخر واحد جان بلاقيه اهنيه