شهر عسل noonoo la – الجزء الثاني – روما

وصلنا مطار روما في حدود الساعه 9 ونص او عشر الصبح .. وكانت التكاسي وقتها واقفه تنتظر زباين بس نحن حصلنا سيارة تنتظرنا طلع زوجي مرتب حق كل شي ووفر علينا بصراحه الهم والوقفه بس مانسيت أصورلكم المطار وهذي بعض الصور له

المطار برع

المطار صورة السيارات

علم ايطاليا ونحن طالعين من المطار

وصلنا المكان الي بنيلس فيه وكان زوجي حاجز في فندق وااايد حلو ومرتب وهذا موقع الفندق للي حابه تعرف أكثر عنه

https://www.starwoodhotels.com/westin…_westin_121008

وهذي صور الفندق الخاصه فينا

الفندق من برع

هذي لافتة الفندق

وهني مثل ماتشوفون اللوبي

هذي غرفتنا

وهذي صوره ثانيه

الحمام

وصلنا الفندق وكان استقبالهم واايد حلو وطلاعنا الغرفه ارتحنا وتسبحنا ونمنا شوي ونشينا الظهر عسب نبدا مشاويرنا الي تمنيتها من كل قلبي تكون حلوووه ..
زوجي كان مأجر سياره هناك بس أول يوم ما استخدمناها إنما استخدمنا باص السياح ركبنا على الباص التابع لشركة 110 لأنها أفضل شركه وسعر التذكره الوحده 13 يورو = 75 درهم .. بس يستاهل المشوار
لأنا رحنا لمناطق أثريه طبعآ ونحن في الباص كنا حاطين سماعات تشرح لنا معالمهاوهذي صورة مبنى الكولسوم

يتبع

وهني صور ثانيه يوم وصلت الباصات

وهني صورة المدخل أول مادخلنا وبدينا ننتشر في المكان

وهني محلات ومقاهي صوب الكولسوم

وهذي وجبتنا الي طلبناها من واحد من المطاعم

تمشينا في الباص السياحي وتعرفنا على المنطقه عندي صور واايده من هناك بس اختصارآ للوقت نزلت أهم صوره وبنزل موضوع منفصل عقب عن المنطقه هذي بصورها ..

عمومآ خلصت الجوله في حدود الساعه 9 المسا ردينا الفندق تعشينا وسولفنا ونمنا

اليوم الثاني قلنا بنتفقد المنطقه من داخل لكن هالمره بالسيارة الي أجرناها وفعلآ سوينا وهذي صورة سيارتنا

وهني صور الشوارع من السيارة وطبعآ شايفين كيف الزحمه

قلنا بسنا من الآثار وهالسوالف بنسير نتشرا شو فايدة روما بدون تسوق ؟؟

وسرنا هالمول بس طلع شكله بعد تراثي ههههه

هذا شكل المول من برع زترا هو متحف ومول في نفس الوقت يعني من صوب متحف ومن صوب مول !!!!

وهذي صور متفرقه له من داخل

وهذا مطعم في المول

بصراحه كنت يوعانه وطلبتلي بيتزا بس أكيد في روما الطعم الأصلي ولا أروع

تشرينا إلي نباه من هناك عقب قالي ريلي بنسير نشوف محلات ثانيه وطبعآ أنا بدون تردد أوكي أوكي .. ليش أقول لا .. السالفه فيها سوووق أي حرمه بتقول لا !!!

وشوفوا شو حصلنا

محل لويس فيتون بس الأصلي .. يا سلااام وناااسه تشرينا من هناك وفي موضوع ثاني بعرض مشترياتي من ايطاليا وبراويكم شو خذينا ..

على فكرة الي مو حلو في ايطاليا عمومآ أنه أغلب الناس هناك ما يتكلمون أي لغه ثانيه غير الإيطالي ويالله يالله نحصل حد يرمس انجيزي وهذي بتكون فيها صعوبه للي ما يعرفون ايطالي لأنه الناس هناك يبونج أنتي ترمسين مثلهم مب هم يغيرون لهجتهم عشانج وهذا شي حلو ومب حلو في نفس الوقت

خلونا في موضوعنا ..

بعدها كملنا حواطتنا في شوارع روما بصراحه اليوم استانست فيه أكثر عن أمس شفنا مناظر وتشرينا وجي

وشفوا تيلفونات الشوارع مالهم

وهذي صور لشوارع روما

حتى الشرطة صورناهم

ويلسنا نتمشى ليييين بالليل

بالليل عالساعه 10 تقريبآ يعنا ودورلنا مكان نتعشى فيه وحصلنا هالمطعم الغاوي وتعشينا فيه رومانسي صراحه

ردينا الفندق في حدود الساعه 12 بالليل وكنا تعبانييين من الحواطه يادوب تسبحنا وسولفنا مع بعض شوي ورقدنا

اليوم الثالث نشينا الساعه 9 الصبح تريقنا وقال ريلي بنطلع نتحوط شوي وبنتسوق بعد فعشان جي لبسنا وطلعنا في حدود الساعه 11 الصبح

وبصراحه البلد دومها زحمه زحمه زحمه ما أدري لييييششش؟؟

المهم تمشينا شوي في شوارعها ويلسنا نشوف المباني والمحلات وجي وهذي صورة محل يبيع أشياء ترثيه لزوم المسرحيات والكرنفالات والمهرجانات وجي

وعقب قال ريلي بنريح شوي ويلسنا ندور مكان حلو نيلس فيه طبعآ وااايد عندهم مطاعم وكوفيات في كل مكان والخيار يكون صعب بالنسبه لسايح طبعآ ايطاليا معروفه بلد الأكل الحلو يعني أي مكان تدخلينه تكونين عارفه إنه الأكل بيكون فيه ولا أروع بس نحن ما أدري ليش اخترنا مكدونلدز !!!

وهذي وجبتنا

كملنا بعد الوجبه حواطه ودخلنا هالمول

وهذا شكله من داخل

طلعنا من المول وماخذينا منه شي بس اتمشينا عقب ظهرنا وكملنا حواطه أنا وهو عقب الحبيب مادري شو طرا عليه وقف السياره وقال بنركب باص سياحي هاه الي مفتوح من فوق أحلى قلتله براحتك وركبنا

هو ليش يحب الباص السياحي أول شي لأنه مب هو إلي يسوق فيكون مرتاح أكثر ثاني شي عشان الشرح يباني أسمع تفاصيل المناطق أكثر لأنه يوزعزن علينا سماعات فيها شرح بالانجليزي عن المناطق الي نزورها وطبعآ دومه يحب يركبنا فووق عسب مافيه سقف فنطالع براحتنا أكثر

نزلنا من الباص وركبنا سيارتنا وردينا الفندق اتسبحنا وخذنا غفوة صغيره ونشينا نكمل مشوار وشوفوا شو حصلنا …..

محل برااااداااا الأصلي .. واااي قلبي دق وإيدي حكتني ماسمعت بو الشباب إلا يقول شو رايج ندش نشوف وااااي ماصدقت قلتله أوكي أوكي .. دخلنا وتشرينا وبعرضهم مثل ما قلت في موضوع منفصل

كملنا تمشيه وتصوير وعندنا واايد صور تقريبآ 500 صوره عن روما بس أغلب الصور راازين ويوهنا فيها هههه وهذي الصور الي اخترتها لكم ..
ردينا الفندق بالليل بعد ماتعشينا ويلسنا نسولف وخذانا الوقت وسهرنا للصبح ونمنا الساعه سبع تقريبآ

آخر يوم في روما راحت علينا بصراحه نومه ونشينا في حدود الساعه ثنتين الظهر نسينا الوقت من سهر الليله إلي قبلها وما كان عندنا واايد وقت نتمشى يادوب نشينا وسبحنا وصحصحنا ويلسنا للساعه خمس العصر ما ظهرنا من الفندق عقب ظهرنا وأستأنفنا حواطتنا ولأنا نشينا ما أدري ليش مالنا نفس ناكل سرنا كوفي وشربنا كابتشينو بس بالطعم الأصلي

تحوطنا في شوارع روما ساعه أو ساعتين تقريبآ

ومر الوقت بسرعه وما حسينا إلا إنه يت الساعه سبع ونص وكنا يوعانين لأنا ما كلنا شي من وعينا لين ذاك الوقت فجدمنا موعد العشا ودخلنا هالمطعم وعلى فكره ترا الشمس تغرب عندهم الساعه ثمان فعشان جي الوقت شوي عندهم غير المهم فلا تستغربون الوقت وأختار زوجي هالمطعم عشان نتعشا فيه واسم المطعم La Rustichella وهذي الصور

مطعم La Rustichella من برع

داخل المطعم

طاولات المطعم

بوفيه المطعم

عقب ما تعشينا ظهرنا من المطعم وألا الشمس غربت وصار ليل طلعنا من المطعم في حدود الساعه 9 تقريبآ وما بقى لنا شي من الوقت وبيني وبينكم في روما تملين بسرعه لأنه كل شي يم بعض حتى في أماكن تقطعينها بريولج مشي وبعدين كل شي ستايل واحد تراثي قديم أوكي حلو بس ما أنصحج تيلسين فيها أكثر من 5 أيام – أسبوع لأنج بتحسين إنج تبين تغيرين المكان

ردينا الفندق بالليل مستانسين ويلسنا نطالع صورنا كالعاده قبل ما نرقد ونضحك على بعض شوي .. وعقب رقدنا عشان نقوم نتجهز للرحله الثانيه ووجهتنا هالمره 4 أيام فنيسيا – ايطاليا ..

وموعدكم معاها في جزء ثالث من رحلة شهر عسل نونولا .. إلى اللقاء

ماشاء الله

رووعة احب الاماكن التاريخية

الله يهنيكم يارب