شهر عسل noonoo la فنيسيا

طلع علينا نهار ثاني يوم وبدينا مشاويرنا نستكشف فينيسا وهذي صورة خذتها الصبح

الحلو في المكان إنه وين ما نروح نلاقي مكان للراحه أما مطعم أو كوفي وهذا واحد من الكوفيات الي على الطريق

وبعد وين ما تروحين تلاقين محلات صغيره تبيع كل شي وأي شي في كل مكان وهذي صوره توضح هالشي

هذا غير إنج تشوفين ناس من كل الجنسيات عرب عجم أفارقه أجانب يعني نشاط غريب من الصبح لليل وكنا أحيانآ نقطع الأماكن بالجسور الموجوده هناك وأحيانآ بالقارب وهذي صور القارب

هذا القارب الي أجرناه عشان يمشينا ذاك اليوم وهذا السواق ماله

القارب من قدام

القارب من جنب

السواق يسوق فينا

وهذولا نحنا في القارب

انتهت الجوله ونزلا من القارب عند واحد من الكوفيات ويلسنا نرتاح شوي وطلبنا اثنين اكسبرسو وطبعآ شو الأكسبرسو هاي وشو الي عدنا هذي طعم ولا أروع وهذي الصورة

ونحن نشرب الكوفي ياناعلى غفله ضيف حلوووووو استانسنا فيه وريلي قال زيارته هذي فال حلو لنا أونه عاااد ههههه
وقلت لازم لازم أصوره

هههههههه عصفور صغييير حتى ماطاع يقوم من على الكرسي حليييله يلس يغرد صوبنا ونحن مبسوطيييين عاالآخر

هيه صح نسيت أخبركم إنه هم عندهم كل شي يسوونه في القوارب لأنه ممنوع أي سياره تدخل المدينه والتنقلات فيها تتم أما بالقوارب أو بالجسور

هذا مثلأ تابع لشركة تصليحات ويالس يعابل في جدار هذا المبنى

وهذا تكسي مائي

وهذا باص مائي

وعلى فكره ترا تذاكرالباص أرخص من التاكسي بوايد وهم الإثنين أرخص من القوارب الخاصه وجي لكن القوارب أحسن ليش إنج تضمنين الخصوصيه بعكس الباص زحمممه موووت ساعات وما أنصحكم فيه

ونرجع لجولتنا ..
مر يومنا جي نستكشف في المناطق حوالينا ونصور الي يعجبنا هذا كله مثل ما قلت إما في القارب أو على الجسور وعلى طاري الجسور هذي صورة أشهر جسر في فنيسيا جسر الريالتو صوب ساحة سان ماركو وطبعآ شفتوه قبل ورا سواق القارب بس هذي صورة ثانيه له

ويقول زوجي إنه كل الي يروحون فنيسيا لازم يمرون على هالجسر ؟؟ وفيه ناس يصممون إنهم يحجزون في الفندق الي يطل على الجسر بس زوجي قال الفندق هذا دومه زحمه عشان جي ما حجز فيه وهذي صورة للفندق واسمه على نفس اسم الجسر

تعشينا برع وسرنا مطعم بس شو رووعه بس ما صورت كان واايد زحمه و الحريم الي فيه مب متسترات .. بس صورت الوجبه وكانت كالاازوني وهذي الصوره

استمتعنا في جولتنا وكان صادق ريلي إنه أحلى شي تشوفين المدينه من الصبح لليل ومو بالعكس لأني مثل ما قال خذت انطباع حلو عنها واستمتعت وااايد في هالمشاوير الي قضيناها

ردينا الفندق في حدود الساعه 9 المسا وخذنا شور ويلسنا نسولف ونطالع الصور ونضحك ونعلق على بعض فيهم ومر الوقت بعد بسرعه ونمنا

ثاني يوم نشينا شوي متأخرين لكن هذا ما منع إنا أكلنا وجبه خفيفه وتجهزنا عشان نكمل مشاويرنا وهالمره خذاني زوجي حق ساحة سان ماركو وكنا مرينا عليها أمس بالقارب صوب جسر الريالتو بس زوجي قال الساحه هذي يبالها بروحها وقت فأجلناها حق اليوم الثاني وفعلآ الساحه حلوووه كل شي فيها خباااال وما أعرف صراحه كيف أوصفها أول شي فيها الناس مثل ماقلت قبل من كل الأجناس ثاني شي مترووووسه من طيور الحمام بصراحه شي حلوووو

وهذي بعض الصور

هذي ساحة سان ماركو

وهني الطيور في ساحة سان ماركو

هذا غير المحلات المنتشره فيها محلات تبيع كل شي مجوهرات راقيه.. ملابس .. وأحلى شي فيها المحلات الي تبيع التحف الزجاجيه خبااااال وهذي بعض الصور

هذي لمبات زجاجيه أشكالها روووعه

وهذا ببغاء زجاجي حلو بعد صح ؟

وهذي بعض التحف الزجاجيه

وهذي صحون وأكواب ديكورات زجاجيه بعد

وهذي بالونات من الزجاج

هذي تحف واكواب وعصافير ومشغولات زجاجيه

ههههههه ضحكني مهرج زجاجي

وهذا محل يبيع الماسكات والأقنعه حق المسارح والفلكلورات والمهرجانات

هني من برع

وهذي صوره من داخل

وهني منظر من شباك المحل

وهذا القناع الي اشتريته منه

وطبعآ الغريب إنه حتى محلات الخضرة والفواكه وحتى اليسكريم موجوده في هذي الساحه لأنها مثل ما قلت مترووسه من العالم والناس

وهذي صور توضح هالشي

وهذا الأيسكريم إلي طلبته شوكولا يم يم

هلكنا من المشاوير وريحنا شوي في واحد من المطاعم الموجوده في الساحه وخذينالنا سندويشين كلوب مع كولا وماي غازي وطلع حسابنا 60 يورو = 300 درهم !!!!!

وهذي صورة للوجبة

على فكرة كل شي غالي في فنيسيا وخاصه في ساحة سان ماركو يعني في المقاهي عادي تدفعين من 60 – 80 يورو لشخصين لأشياء بسيطه مثل كوبين كوفي أو عصير مع ماي او ايسكريم أو ماي غازي يعني في حدود 300-400 درهم تقريبآ لأنه اليورو يساوي خمس دراهم حسب السوق أحسه شوي استغلال للسياح على فكره هم شوي شعب طماع يحبون الفلوس !!!!!!!!

وشوفوا الطمع كيف .. حسب ماشرحلي ريلي ترا صوب كل كوفي فيه فرقه تابعه للمطعم أو الكوفي وأحيانآ ريايل يعزفون فردي ومتفقين مع الكوفي أو المطعم وأنتي تاكلين يكون عبالج إنج تدفعين ثمن الوجبه بس تراج تدفعين ثمن الموسيقى الي تنعزف مع االوجبه حتى لو طلبتي كوب عصير تدفعينه مع الموسيقى حتى لو ماكنتي تسمعينها لأنه الي يعزفون شغالين عزف طول ما الكوفي او المطعم فيه زباين وشغال غشششششش ؟؟؟؟؟

وهذي صوره من المطعم نفسه توضح المقصود

وهذي صورة العازفين الي كلمتكم عنهم والي متفقين مع الكوفي نص بنص سعر الوجبه بس هذولا من عند مطعم ثاني غير هالمطعم

طبعآ إختصارآ للوقت بشرح لكم رحلتنا بأقل قدر من الصور عشان عندي حوالي 500 صورة بس لها المدينه لكني اختصرت الصور واايد وقلت بنزل الي تناسب الموضوع وما تاخذ صفحات واايد

فبخليكم مع هي الصور المتفرقه من فنيسيا

هذي صورة مبنى هناك

وهذا الكنال

وهذي بعض المحلات في المنطقه

هذي صور لبعض القوارب واقفه في الرصيف تنتظر زباين

وهذي صورة بلكونة واحد من البيوت

وهذي صور فينيسيا بالليل

وشوفوا شو حصلنا بعد فرع مكدونلدز

خلصت أيامنا في فنيسيا يلسنا فيها أحلى 4 أيام في حياتي ورجعنا منها للبلاد بذكريات قمه في الروعه عن أيام قضيناها مع بعض ونتمنى أنها تتكرر في أقرب فرصه ..

وهذي كانت سفرتنا .. 12 يوم قضيناهم مع بعض وكانت بالنسبه لي أحلى أيام حياتي وعقبال الكل إن شالله

ونفرح فيكم يااارب وكل العزابيات إن شالله

ماشاء الله مهنايين يارب حلوة الرحلة