خواتي انا متزوجه من حوالي 20 سنه …..اذكرن الله
الحمدلله حياتي الزوجيه ماشيه ,,زوجي يحبني والحمدلله وانا احبه اكثر
عندي خمس عيال الله يبارك فيهم ويرزقني برهم
مشكلتي
ريلي وايد يحب يتعلم …وانا مامنعته فيوم …
درس برا وعيالي صغار وعادي رحت وياه وازرته مع ان الغربة صعبه
عقب يتم يدرس بروحه واوفرله الجو من كل النواحي ووقت الامتحان يسافر ويمتحن …
عمري ماوقفت بدربه مع انه كان يختار مجالات صعبه نسبة النجاح فيها قليله ..
واستمر بمحاولاته ..
عقب يتم يسجل بمعاهد ويدرس او من خلال النت ….المهم الحمدلله شهاداته نفعنه بانه يكون مميز
بمجال شغله ….وانه يكون مطلوب بكل مكان …..قولن ماشاء الله
المهم ان العبأ كان معظمه على وخاصة بانه عسكري مااشوفه الا آخر الاسبوع
طبعا هالشي سوالي وايد ضغوطات …بس 
مااقدر اقول غيرها
اللي كتبت موضوعي بسبته ان عيالي الحين كبار يعني من الابتدائيه للجامعه ..وحملهم زاد
واكبر عيالي ولد ……وتعرفون يعني قريب على سن زواج!!!!
المهم******
ريلي الحين معزم يسافر فترة يمكن توصل ل4 او 6 سنين يدرس!!!!
شو اسوي
طبعا انا حاسه انه بيسافر ويودر الحمل كله علي انا فحاسه ان الدنيا ضايقه فيني
وهو مب من النوع اللي اقدر اجبره مايسافر…ولا اقنعه بهالشي دامه عزم عليه
مع انه يتمنى اني اسافر انا وعيالي وياه ….بس وايد صعبه
الحين العيال بالجامعه ولا بالمعهد وخلهم الصغار على صوب …..يعني التزامات مااقدر اودرهم
احس انه مالي طاقه للغربة ….واودر بيتي لمنوه؟؟؟؟
اودر اهلي واروح اتغرب ….انا هنيه ممشيه عمري اروحي
بس برا مااقدر ,,وانا ادري ان كل شي بيكون على لانه مابيكون فاضي لنا….
شورن على فديتكن
بغيت افضفض وياليت القى نصيحه تنفعني ,,لاني اكبر خواتي ومب متعودة أخذ نصيحتهن
متعودة اعطي بس ….ومحد يدري عني
وادعي ربك يلهمك الرشد ويصلح شأنك كله..
والله يكون في عونك..
استخير الله هي احسن نصيحه لج
وربي يقدم الي فيه الخير لج ولاولادج
والله يساعدج
غاليتي 
استخيري أول شي قبل لا تكلمين ريلـــج ..
واذا حسيتي قلبج مطمـــن أختي كلميه
ماشاء الله هو تعلم وتثقف وانتي صبرتي ونلتوا مع بعضكم
هو ماشاء الله مستقر في دوامـه وانتي مستانسة بلمـة عيالــج ^_^
بس يرد يسافر من يديد وهالمدة كلها ,, صعب عليج أختي
حتى الدين يقول لا تخلون حريمكم أكثر عن 6 شهور ..
انتي بعد انسانـة ولج حق عليه
كلميه بالهداوة وخبريه انج بعد تتمنين تشوفينه في العالي
بس يتعلم داخل الدولـة
ويستهدي بالله ويوقف وياج ومع عيالــه
المسؤولية مب سهلــة ,, والأب لازم يكون له دور فعال في تربية عيالــه ^^ !
اذا ماقدرتي تقنعينه كلمي حد له كلمـه عليه
مثل أبوه أو مــه أو أي حد هو يسمع كلامه حتى لو حد من دوامـه أعلى رتبـه عنه !
بس لا تنسين تستخيرين قبل كل شي
وادعي رب العالمين يحنن قلبه ويغير له رايه
وربي يسخره لج ولعياله
انا معاج انها وايد صعبة المسؤليه كلها عليج وخصوصا ولد في مثل سن ولدج الله يبارك فيه
اختي لاتوقفين عائق في ويه ريلج خليه يحس انج ورا كل نجاح ينجحه علشان تكبرين في عينه واخر شي هذا كل لصالحكم حبيبتي واذا علي العيال الكبار خلي عمومتهم يساعدونج عليهم اذا حسيتي بتقصير لان العم مكان الاب اذا غاب وهاالشئ بيسوي كنترول عليهم باتفاق مع اخوهم الي هو زوجج واذا قدرتي انتي والعيال تسافرون وايد افضل علي الاقل الدراسة برع مفيدة حق مستقبل العيال والله يوفقج