يشهد الله أني صادقه في كل كلمه بقولها لكم الحين و الله أني عشت هالكمن يوم أمور غريبه عجيبه و مستحيل مستحيييييييييييييل تصير هالأمور بدون رضى ربي علي من بعد قرايتي لسورة البقرة و لله الحمد و المنه
أنا اشتركت في حملة قراءة سورة البقرة و هذ الرابط
https://forum.uaewomen.net/showthread.php?t=346021
و حابه أشكر صاحبة الموضوع و ادعيلها أن الله يكتب الها كل خير
الحمد لله أنا صارلي يمكن أكثر من اسبوعين مواضه على سورة البقرة و كنت قبل لا أقرها أعاني من ألم في ظهري و ما كنت أقدر أيلس على الأرض من دون ما أحط مخده تحتي و إذا ركعت و لا وخيت ما قدر أوصف كيف كنت أتألم مع أني مب عوده توني 27 سنه يعني هذا اللي أحسبه مال وحده عمرها فوق الأربعين بس الحمد لله الحمد لله راااااااااااااح الألم كله و الله يا بنات أن الألم كله راح لا بيلسه و لا بركوع و لا بغيره أحس بألم … يا رب لك الحمد و الشكر ….
و هذا شي مب غريب بالتداوي بسورة البقره لكن الغريب اللي بقوللكم اياه الحين …
أنا ولدي يوم كان عمره 10 شهور طاحت صينيه حديد على ويهه و طرتله ما بين عيونه و الحمد لله سلمت عيونه و كان الجرح غزير لدرجة أن حولونا لجراح لأن الدكتور العادي ما يقدر يخيط الجرح و تعتبر عمليه و الجراح قال أن من عمق الجرح يقدر يدخل صبعه تخيلو ريال طول بعرض صبعه يدش في جرح ياهل عمر 10 شهور … الحمد لله.. المهم ربنا ستر و اداركنا الموضوع و خاط الجرح مع أن فديته نزف وايد … و مب هني السالفه … السالفه أن بعد ما كمل ولدي سنه و شي قامت تطلع من خشمه و حلجه ريحه خايسه ما تحتمل حتى أنا أمه أنفر منها و ما خلينا طبيب ما سألناه عن هالريحه ألا و قال هذا شي عادي لين ما كمل 4 سنين و نص عمي أبو ريلي ما سكت دور طبيب أنف و أذن معروف و قال لازم تودونه لين متى بتم هالريحه و الله حرام …. فوديناه و قام الدكتور يدخل حدايد في خشمه و يسويله أشياء بااااااااربي كيف تعبوه فديته و عقب هذا قال لازم نسوي اشعه و سويناله أشعه و قالو أن فيه لحميه عووووووووده و لا زم عمليه بس تعرفون كيف قلب الأم ما طعت و قلت ما أقدر أخاف ياهل و بيسون له بنج كامل و الله زغت و ما طعت و مرة فترة لين البارحة أمس فليل قتله حبيبي سير برش ريحة حلجك مب حلوة و تميت أفكر عقب و أنا أتوضى و قلت ما باليد حيله شكلي بوافق عالعمليه حرام أكيد الناس يبتعدون عنه عشان هالريحه و توكلت على الله .
و البارحه كنا طالعين و نزلت المكتبه و كان ريلي و يا عيالي في السيارة و يوم ركبت قالي بقولج شي ما بتصدقينه و ما بتتخيلينه آآآآآآآآآآههه طااااح قلبي في ريولي أنا أطالعه و أطالع عيالي و تميت مبهته و أقوله شو مستوي شوي قام و طلعلي كلينكس و قالي شوفي هذا بنات و الله أنها ربله ورديه قد الريال و الريحه خيااااااااااااااس و عفن قتله شو هاي قالي هذا طلع من خشم فلان >< انصعقت و ما عرفت شو أقول و صديت على ولدي و قتله حبيبي أنت بخير شي يعورك قال لا ماما ما فيني شي
قتله كيف طاحت قال كان ينفخ النفوخه و فجأه قال لأبوه بابا يبلي كلنكس مخاط و يوم يا بيمخطه شاف شي وردي في خشمه يوم سحبه انصدم طلعت هذي الربله
تخيلو يا بنات أن تطلع قطعه شمتنها من خشمه مستحييل استحاله أن يكون هو حاطنها في خشمه .. في خشمي أنا ما تدخل كيف في خشمه .. و أتوقع أن الجراح نساها في خشمه الله لا يسامحه جانه بهدل ولدي أكثر من 3 سنوات لا و لا هذاك يقول لحميه الله المستعان …
و الحين أنا وديت القطعه المختبر عشان يحللونها … أدعولي بنات أني أقدر آخذ حق ولدي من الطبيب اللي سواله العمليه جان طلعت من الأدوات الطبيه
شفتوا يا بنات هذا اللي استوا و أنا ما كملت شهر من قراية سورة البقرة عيل شو بيستوي لو قريتها طوووووووووول عمري؟؟؟
مب بس جي حتى ريلي صارتله أمور من بديت القرايه بس ما يمديني أكتب الحين إن شاء الله في وقت ثاني..
وصدقوني أنا ما كتبت هالكلام الا عشان أفيدكم و أشجع كل وحده حتاجه على قراية سورة البقرة و ما بتحصل ألا كللللل خير
و الله تعالى أعلم
الله يثبتج ياقلبي
وو القرآن بشكل عام فيه شفاء و رحمة .. وو الله يقدرنا يا رب إن ما نهجر كـــتابه ..
أشكرلج موضوعج و مشاركتج الكريمه لنــا لتجربتج العظيمـة .. جزاج الله ألف خير
الله يثبت
و ان شاء الله راح اشارك ف الحمله و راح اقرأ سورة البقرة يوميا
والله شجعتيني
الحمدلله ع سلامة ولدج
والله ييسر امورنا واموركم
صدق الصادق الامين لما قال عن البقرة ( اخذها بركة وتركها حسرة ————————-)