أمس ريلي الظهر بطل الكبت وحصل قطعه لونها اخضر مثل ليفه المواعين الخضرا ملفوفه بخيط أسود في الويه خواتي يعني مب داخل تحت الملابس
أنا على طول سالتها قالت مدام مااعرف وهي اونه حصلته في الكبت وتحسبته شي من اغراض دوامه؟؟؟؟؟؟
طبعا محد يدخل الحجرة غيرها وعيالي صغار مستحيل ايبون هالشي ويحطونه في الكبت استغربت ورديت سالتها قالت ماتعرف المهم بطلت اللفه ماشي داخلها بس مربوطه وداخلها فاضي طبعا وديتها بيت اهلي خلاص حسيت انها اعوذ بالله ناويه على الشر
الطامه الكبري يابنات فتشت فالليل لقيت تحت الكاب اللي في ويه الكبت حبل اسود صغير ومعقود يعني فيه كذا عقده وداخل في بعضه
وهي اندونيسيه هل يا خواتي مرن عليكم اندونيسيات عندهم مثل هالسوالف
والحين شو اسوي هي من امس في بيت اهلي وريلي مب مقتنع يوديها
هي كملت عندي ثلاث شهور وعمري ماعصبت عليها وسبحان الله قبل اسبوع غالية الروح مفسره حلم لي عن هالبشكاره وحذرتني منها والحمدلله ربي كشفها
بس اللي مستغربه منه ليش مادستهم مكان ثاني ولا يمكن هي مارامت لانا نحن كنا فالصاله وهي كانت فالحجره وماحصلت فرصه لانه ريلي فجاة زقرها وقالها اتييب شي من المطبخ …ياربي محتاره ليش اتعمدت انه نحن نشوفهم ولا الله نساها اياهم
مع العلم ياخواتي على طول أ شغل سورة البقرة في بيتي او الرقيه الشرعيه
حسبي الله ونعم الوكيل ..اللهم انا نجعلك في نحورهم ونعوذ بك من شرورهم
الله يعينج اختي انا اقول تسفرينها على طول لا اييج زود منها ترى ماتعلمين بهن
حبيبتي الحمد لله انج كشفتيها من البدايه
ودام هاي سوالفها فاحسن لج ولعيالج انج تفتكين من شرها
والله يعوضج باحسن منها
يمكن مسويتلكهم سوا
انتي راقبيها ولا سفريها وهاتي لج وحده ثانية
ثاني شي اختي ليش تخلين الخدامه ادش غرفتكم وتفتح الكبت يعني انتوا عاطينها المجال..بقولج شي والله امي ماشاء الله عليها البشاكير يوم ايونا ماتخليهم يدشون الغرفه مووول وهي وحليلها تنظفها بروحها وتشل ثياب الوالد الله يخليه ورحها تحطهن في الكبت تقول اظمن ليش ايب الشر بإيدي..اقل شي تسوينه يوم بدش غرفتكم اوقفي على راسها يوم تنظف ولا شي احسن واريح
والله يحفظكم
وبتنكشف لج اكثر واكثر لو فيه شي
والله يكفيكم شرها