من يومين وحده كتبت انها ملجة وبعد 20 يوم تطلقت , في البدايه كانت الزوجه الاولى موافقه وعقب غيرت رايها و النتيجة ان البنية تطلقت .
السبب الثاني:
وحده كتبت عن ربيعتها انها متزوجه من سنه و ربت ويابت بنت والريال خير شر ما يسال عنها وعن بنتها, وانه دوم مطيح عند الحرمه الاولى , انا اللي قهرني في هالموضوع ردود الحريم اغلبهم تهجمو على الحرمة الثانيه و يقولون :اونها تستهال , محد قالها تاخذ واحد معرس.
خواتي ولا وحد فينا تحب تبني سعادتها على سعادة غيرها , والريال ذو شخصيه قويه ما راح يتاثر حتى لو تزوج 4 , بس للاسف اغلب الريايل ما يخافون الله, يظلمون زوجاتهم وما يعدلون بينهم وبين عيالهم , اعرف ان في حريم او الزوجه الاولى ساعات يكونون مظلومات بس ساعات هن يكونون ظالمات بعد.
انا اعرف وحده تزوجت واحد متزوج , معاشة بالكامل ,بيت ملك, سياره جديده اشتراه كله للزوجه الاولى , بينما الثانيه سكنها في الايجار و هي تصرف من معاشها و عندها سيارة مستعمله و الناس تعايرها وهي صابره عسب عيالها.
اعرف بعد وحده زوجها مواطن والنعم فيه وهي اجنبية وعندها الجنسيه , وزوجها هب مقصر معاها , بيت ملك, وسيارات, و كل شهر لازم يشتري لها عقد ذهب, وكل سنه يشتريلها مويايل يديد و يخليها تسافر لبلادها تزور اهلها و يشتري لاهلها هدايا بالالف لدرج انه اشترى لها بيت هناك عسب حضرتها تصيف فيه , بس الاخت جاحده للنعمه يوم تكون في بيت ريلها ما تقعد مع عيالها كله طلعات للصالونات والاعراس و القهر انها دوم تتكلم عن بلادها اونه بلادها حلوه ابغي ارد بلادي , مع ان الجيران يحسدونها على النعمه اللي هي فيه, حتى العيال يتمنون انها تقعد في البيت بس هي مخليه كل شي على الخدم.
بس يوم زوجها قال بتزوج وحده ثانيه قالتله عادي , و يوم تزوج تمت تصيح وتنقهر اونه ليش ؟ واللي اخذها مواطنه عمرها فوق الثلاثين موظفه ومحترمه بس سكنها في بيت ثاني بالايجار, بس هو ما تغير الريال ملتزم وكل شي يسوي حق الاولى وحق عيالها بس الزوجه الاولى ملزمه الا يطلق الثانيه مع انها ابد ما تدخل بحياتهم ولانها تخاف الله.
وفي واحد متزوج ثنتين الاولى مسكنها في بيت ملك وهي ماسكه كل معاش زوجهاعسب ما يصرف على حرمته الثانيه وعيالها , ولانه هو ريال شخصيته ضعيفه جدام الزوجه الاولى, تخيلن ان الزوجه الثانيه مسكنها في بيت ايجار بس ما يدفع و يوم يطردونها يي هو ويوديها بيت ثاني لين ما يطردهم راعي الايجار وهكذا وعايشة على صدقات الناس لان هو خير شر ما يمر عليها و لا يسال, و الحرمه الاولى دوم كانت تسوي مشاكل حق ريلها عسب يطلق الثانيه مع ان الاولى والثانيه عندهم عيال , وعسب الريال يفتك من مشاكل زوجته قال انا طلقتها وهو اصلن ما طلقها , والزوجه الاولى دوم تمر صوب بيت الحرمه الثانيه عسب تتاكد ان زجها ما يي حق الحرمه الثانيه, والحرمه الثانيه متحملة وساكته لان ريلها قال اذا اشتكيتي بطلقتج و راح اخذ العيال منج وهي وحليلها ما عندها احد , مستحمله الضيم لانها تموت في عيالها وما تبغي تيتعد عنهم.
في وحده بنت تقدم لها واحد متزوج من اهلها وهي كانت رافضه بس ابوها غصبها لدرجه انه ضربها , وجبرها على الزواج , وهي كافيه خيرها شرها, وحرمته الاولى طول الوقت كانت تضحك وتقول عادي خلي ياخذ وحده ثانيه , بس يوم العرس الزوجه الاولى سوت مناحه تمت تصيح اونه ليش يتزوج علي؟ ,
تراج انتي قلتي عادي؟@@. وعلى فكره ريلها من سنوات كان يبغي يتزوج لين ما لقى بنت الحلال لو ما تزوجها بيتزوج غيرها , وهي كانت دوم مقصره في حق زوجها.
خواتي مرات الزوجه الاولى تنظلم بسبب الزوجه الثانيه و العكس صحيح , و انا ما احتاج اني اعلمكم لانكم اكيد مريتو بتجارب وشفتو بعيونك .
بس بغيت اقول و خاصه للخوات اللي كانت ردودهم و قالو و تهجموا على الزوجه الثانيه اللي انا كتبت قصتها ها ,لو وحده من خواتج صارت الزوجه الثانيه وصار لها نفس الموقف ربت ويابت ياهل وزوجها مايسال عنها وراح عند الاولى , راح تقولين عنها تستاهل ؟محد قال لها تتزوج واحد متزوج؟ .
للعلم الارزاق بيد الله سبحانه وتعالى هب بيد البشر , يمكن الله كاتب لها تتزوج واحد متزوج حتى لو هي ما كانت تبغي , ولا انا غلطانه؟
و السموحه يا خواتي .
ومافيها شي لو الريال خذا وحدة عراس الأولى ،، أكييد بتكون مب راظتنه
ننحن نكتب عسب تنصحونا او تدعون لنا
مب للشماته
صدقتى الغاليه الله يوفقج