شو سويتي فالاربعين وحسيتي فعلا انج استفدتي منه لأصحاب التجرربه فقطط

السلام عليكم ورحمة الله وبركاته

شحالكن امهآآت

بما أني بجر .. و بدخل الثامن بعد كم يوم ان شاء الله..

بغيت اسأل كل وحده عندها عيال .. شو سويتي فترة الاربعين وحسيتي فعلا انج استفدتي منه وحسيتي بتغير للأحسن
بتقولن لي من أي ناحيه؟

من ناحية (البطن ) اهم شي
الجسم والرشاقه
البياض والنعومه
الخطوط والتشققات
الالتهابات (من اهم الاشياء بعد)
و الاهتمام بالمنطقه من داخل و من الخارج + الخياطه ..

وسؤال بخصوص المشد الاندونيسي .. من استخدمته وصدق حست انها استفادت منه..

بليز انا محتاجه اني اعرف لان محد يطيح من بطن امه يعرررف كل شي..
اانا يديده في هالعالم و ماعررررف شي

واكيد اللي مثلي يفكر وايد بهالاشياء

يله يا مجربات كل وحده اتخبرنا شو سوت حتى نحن البجريات نستفيد

جريب ان شاء الله بدش التاسع يعني بدا العد التنازلي والله يسهل علينا ياااااااارب

ما أحيد اني ركزت ع ( الجسم و الرشاقه ) فالأربعين الصراحه ,,
والحمدالله ما استوتلي التهابات , كنت استخدم الغسول و الكريمات اللي عطوني اياهن ,,
وبالنسبه للمشد ما استخدمته الا بعد الأربعين ,, ليش ؟ ماعرف امي جي قالت لي ,,
كنت استخدم مطاره ( اللي تحطين فيها ماي حار ) ريحتني وايد ,, و بعد كله البس دليغات و أدفي ريلي ,,
كنت يادوب اتسبح و اتسشور ع السريع لان البيبي كل شوي يبا يرضع ,, و اذا مافكرتي فشو بتلبسين فال40 لازم اشياء قطنيه مريحه ,, فيها فتحه من جدام حق الرضااعه ,,
اتفقي و يا حرمه تي تسويلج مساج بعد الربى ب10 ايام ,, نحن في دبي عندنا هنديه تيج البيت و تسوي لريولج مساج و ظهرج و تمسح البطن ,, طبعا عنندها خبره مب اي حد ,,
هي و بالنسبه للحركه اول اسبوع ( ع الأقل ) لاتتحركين وايد ,,
أنا رديت البيت و يلست اسبح بنتي كانت سنتين (اتحسب انه عادي مافيه شر ) ,, و أثرت فيه هالحركه تم ظهري يعورني ,,
حاولي اتمين منسدحه و مخالفه ريلج ع بعض ,,
الحمام ,, لازم اتريجين الماء كل 2-3 ساعات ,, انا ماكنت احس اني حصلانه بس المثانه تكون متروسه ,,
و ع كل دخله تغيريين البتاع كله و تستخدمين الغسول والخ ,,
ملح و ماي ولا مره سويت ,, بس مره جربت ايلس في ماي دافي فيه قطرات زيت اللافندر (مب العطري ) ,, ليش لافندر ؟ أونه يساعد ع التآم الخياطه ( واصفتنه لي القابله بعد الولاده ) ,, ماعرف لو له أي تأثيير لأني مره وحده سويته ,,
و بالنسبه للأكل كنت اكل اللي اشتهيه ,, مثلا شوربات و سلطات مب شرط اشياء دسمه ,, عصاير ,, كمية ماي ,, و حليب ,, ماعندي فكره عن المشروبات المحليه مثل حبة الحمرا و جي لانه ماكانت تعيبني ,, ماودرت الفيتامينات مال أثناء الحمل ,, استمريت عليهن لأني أعرف اني احتاجهن للرضاعه.
حق هالولاده خذت كرسي الرضاعه الهزاز من بيبي شوب والحين مستانسه عليه يمكن هذا يفيدج بعد ,, اليلسه عليه واايد مريحه ,, وضعيته فنانه حق الرضاعه ,, ظهرج سيده
نصيحه لوجه الله : من ال9 تمي حطي البتر كريم ع صدرج عشان الرضاعه ,, عن تشققات الحلمه و استمري عليه لين بعد الربى ,, بين الرضعات حطيه و قبل الرضعه غسليه

و ماكنت أعرف اني لازم احط فوده دافيه ع صدري من ثاني يوم عشان يطلع الحليب و أمي فديتها ماقصرت عطتني هاي التعليمات ,, وفعلا ساعدتني هالحركه كررتها كذا مره ,,

حاليا هذا اللي في بالي ,, ما احيد اني فكرت اف متى بضعف أو طالعت جسمي هذيج الفتره لأنه اعرف انه من وقت افكر جي ,,

الله يقومج بالسلامه ان شاء الله و يرزقج الذريه الصالحه ,,

تحياتي

ما قصرتي الغلا ع المعلومات ،، وفعلا موضوع مهم ،، وانا بجر وابا استفيد منكم ،،،

موضوع حلو ومفيد .. فالاربيعن يمكن أكثر شيء ركزت عليه جسمي لأن وأيد أتعقد من شيء اسمه كرش واحب أحافظ على بطني .. بداية من المستشفى أول ما حسيت عمري ارتحت شوي عقب الولاده وسبحت وكل شيء على طول حطيت المشد على بطني بس ما شديت وأيد طبعا خليته مرخي شوي .. ويوم رجعت البيت نفس الشي احطه دايما وأرصه ما أشيله بالإضافه أني أفرك بطني كل يوم بكريم زبدة الككأو إلي يشد الجسم بعد الولاده ،، طبعا وقت ما أكون طايحه ابطله عني لأنه يضايقني شوي وبس أحط بداله حصاه حاره كانت أمي دوم تسخنلي إياها بالإضافه إلى الحبه الحمره إلي ما كنت أحبها مول بس إشربها غصب .. و بالنسبه للماي وملح ماكنت أحب أقعد فيه كل يوم بس اخلي منه فالحمام ويوم أبدل أتغسل فيه بدال ماي الحمام .. والخياطه عندي ما طاحت طبعا وسببت لي التهاب + رائحه كريهه ف رحت العياده بطلت لي إياهم الدكتوره و عطتني كريم احطه و غسول والحمدلله ارتحت عقب .. و الحركه خفيفه ما كنت أتحرك وأيد إلا إذا بقوم أسبح أو أييني حد .. والاكل كل يوم لازم عيش و سمج عالغدا لأنه وأيد كان ينفعني حق الحليب الصراحه واااااااااااايد

اهتمي بعد بالتغذية لا تهملين هالجانب

انا بعد اريد اعرف والمعلومات اللي خبروني الين الحين هيه حق الكرش طبعا لانه اهم شي عندي بما انه وزني ما زاد بالعكس ضعفت
فلازم الكرشه تروح …

قالو لي اشرب شاي الاعشاب وقهوة النفاس و اللهوم ها كله حق تنظيف وترييح الرحم ويساعد انه يرد لحجمه الطبيعي
والحصى الحارة مهمه حق البطن تروح الكرش وتنزل الوسخ
حتى المطاره الحاره والمشد والمشي ورياضة البطن ……

وعن الاكل الدكتورة قالت استمر على حبوب الفيتامينات والكالسيوم لانه عندي نقص وهالحبوب بتخف من تلف وتساقط الشعر
والعيايز خبروني اني اكثر من السمك والجرجير والحلبة والحيب ها مال النخيل و الرهش كلهم يزيدون الحليب …
وغير الفواكه انا الحين يوميا اكل صحن فواكه مرتين باليوم …بسبب نقص الدم …واكثر من الجرجير ..

وفي التاسع خبروني اشرب مشروبات دافيه خاصه وقت الويع …ماركض على طول المسشفى وخاصه لاني بجر الولاده بتتاخر ….

وعن التشققات انا من دريت اني حامل اتفرك بلوشن فازلين زبدة الكاكاو وما طلعت لي خطوط الحمدلله الين الحين البطن سليم بس يقولون بتطلع
بعد الربى ومايندرى كلن على حسب مفعول الترطيب لجسمه ..انا عند خصري طلعت لي شخطه حمرا خخخخ لاني انسى احط هني لوشن ف يالشهر الخامس طلعت من انتبهت تميت احط لوشن هالمكان ما طلعت غيرها ولله الحمد

وبعد الاهتمام بالشعر بالزيوت انا الصراحه وايد اهتم بعمري بس ف يالحمل صرت مهمله شوي ادهن شعري مره بالاسبوع بس هع .. بس بعتم بالاربعين
وحق الجسم الخلطه الصابونية و النيل والكركم والحمام المغربي طبعا مب على طول بعد ماطيح الخياطه … وسكراب كاب وايد اوكي دومي استخدمه حتى الحين …

وطبعا آخر اسبوع من الاربعين لازم تردين لريلج عروس خخخـ …واكس للجسم كامل ..حمام مغربي … ماسك للويه ..حمام زيت للشعر ..تغيير صبغة الشعر وستايل الشعر …تشترين جمن قميص يديد … وجمن بدله وميني دريس يداد …اهم شي تكونين مثل مانتي بالنسبة لريلج لا تستوين عيوز هاي اهم نصيحه مسيفتنها في عقلي خخخخخخخخخ،،

لانه صج في بنات ينسون رياييلهم بعد الربى حرام والله …

وصح وفي نصيحه انا بطبقها ..قالوا ما احمل ورى بعض لانه يهلك ويتعب الجسم في المستقبل …لان الرخم لازم يرتاح بعد كل ولاده .. والدكتورة بنفسها نصحتني … يعني على الاقل سنة بين حمل وحمل ولا سنة ونص يعني فطمي البيبي عقب احملي …وجيه بتردين جسمج لطبيعته وبيرتاح الرحم ويتهيا لحمل يديد …

وبث