||| صالونة الباذنجان الهنديه بــقــارا بــيــقـن |||

من زمان البنات يدورون هالصالونه ^^

صالونة الباذنجان الهنديه

ونقلتها لكم ^^

المقادير :

سمسم / بصل شرايح / فول سوداني بدون قشره / كزبره حب / نارييل
فلفل احمر / كركم / ملح / كارياباك (الشرح فآخر الموضوع ههه) / سنود
بيليان حجم صغير / صبار منقوع فالماي (تمر هندي) / زيت
جدر / ملاس / خلاط / خاشوقه / تاوه / ملتين / سجين .. ههههههههه

الطريقه :

نقلي فالتاوه اول سطر من المقادير فوق .. و نخليهم على ينب لين ما يبردون

هذا الخلاط ..

نحط هالاشياء في الخلاط الحين و نخلط لين ما تنطحن كل المقادير عددددل .. لاااازم
وبعدين نضيف الكركم و الفلفل الاحمر و الملح و نرجع نخلطهم مره ثانيه ..

بتكون الخلطه بهالشكل ..

هذا الخلاط اللي اقصده .. شرات اللي نطحن فيه القهوه

نغسل البيليان عدل و نقص الغصن لاه هههه .. الاخضر لاه ^^
ونقص بالسجين من تحت على شكل + و نحشيها بالخلطه حاسبوو عن تنقص البيليااانه < عن تغنين بس هه و الكميه الباقيه من الخلطه نيودها على صوب

على نار متوسطه نحط في الجدر زيت بكميه ليست بالقليله ^^ .. يوم بيستوي الزيت حار نحط السنود عليه ..

الباقي من الخلطه نحطها عالزيت و نخلط لين ما تنخلط بالزيت والسنود ..

نحط البيليان الحين

ونصب ماي الصبار (التمر الهندي) عقب ما هرسناه بالإيد و نشخله ..

و نحط اوراق الــ ( كارياباك ) Kariapak .. فالدكان قولو حق الهندي تبون كارياباك و بييبلكم :clap:
يعني المكان اللي تاخذون منه الخضره .. المهم
لها رائحه زكيه و تخلي الاكل لذيييذ .. طبعا نحن نثلج هالاوراق فالفريزر .. احسن
ويوم نستخدمهم نغسلهم بالماي وبس

هنيه عقب ما حطينا ماي التمر الهندي و اوراق الكارياباك ..

واتمون تخلطون كل شوي عن تحترق الصالونه ^^ ,,
طبعا إذا تبون البيليان قصع صغار تقدرون تقصونه .. وما بياخذ منكم وقت على الضو
يعني بسرعه بيتوي إذا مقطع = ) ..

..

السنود

الفول السوداني ..

وهذا الشكل النهائي للــ بقارا بيقن bgara baigan .. الصالونه التي يعشقها كل اهل بيتي

معلومات عن البقارا بيقن ^^

هالصالونه تكون ملازمه للبرياني في اعراس الهند .. ويسوونها قبل العرس بيوم ..
في الهند .. الاغنياء يستخدمون الكاجو بدلاً من الفول السوداني ..
وعن تجربه ،، الفول السوداني احلى طعمه بوااايد عن الكاجو في الصالونه هذي !!
يمكن الاحتفاظ بهذه الصالونه لأكثر من يوم فالثلاجه ..
طعمها يستوي احلى في اليوم الثاني .. مادري شو السبب
إذا ما كنتو بتسوون برياني .. تقدرون تحطون قطع لحم صغار فالصالونه
وتؤكل مع العيش الأبيض .. ^^

ان شاء الله عيبكم الموضوع و حبيتو الصالونه و اتمنى تجربونها لأنها صدق لذيذه

منقووول

تسلم الايادي..هالصالونه ماروم اقاومها..ومن زمااااااااااااااااااان ادور طريقه مثاليه…يسلمووووو

سلمت يداكككككككككككككككككككككككككك

رووووعه

تسلمين الغاليه

يمي تسلمين

ما شاء الله حلوه الطريقة أنا أسويه بالطريقة الهيدربادية غير وايد عنه بس فيه نفس الخلطة ونفس الطريقة ممكن نسوي منه الفلفل بس ينحط تمر هندي داخل وعليكم بالعافية

احسه حلو مشكوره