الحقيقه اني البارحه كلمت صديقتي في التيلفون ودخلنا بسالفة الزياده وجي وسألتها أنا من باب الفضول ( جم يعطيج ريلج أو كم زادج)؟؟ ما أذكر السؤال زين بس كان تقريباً بهذي الصيغة فردت عليه ربيعتي وبنبرتها حزن على استهزاء ما فهمت لها بالضبط وقالت لي ان زوجها يعطيها قبل الزياده 500 درهم وينشف قلبها على هذي ال 500 اللي عطاها اياها وهي المسكينه ملت من كثر ما تذكره بالمصروف كل راس شهر وكانت تكلمني وهي مستحيه بس من الغصه اللي في قلبها قالت لي وبخصوص الزياده رد عليها وهو يضحك ويقولها احمدي ربج اني أعطيج هذي ال 500 ولا أصلاً انتوا الزوجات مصرفكم بس من المأكل والمشرب واللبس اللي يطلع لكم من كيس أزواجكم والمصروف اللي تاخذونه هذا بس مكرمه منا نحن الريايل حقكم من باب العشره وتربية اليهال ومشاركتي الفراش ::::
معقووووووووووووله أنا انصدمت يعني لو كل ريال يفكر جي شو بيصير والله ان ربيعتي تعاني معاه مع انه مش بخيل لكنه يتمنن عليها بها البيزتين اللي يعطيهن اياها وياليت لو يعطيها أول الشهر يعطيها تقريباً في تاريخ 17 أو 20 من الشهر وعلى قولته الفلوس بايد الحرمه فتنه والمفروض الحرمه ما تنعطى بيزات عشانها سفيه وتفر بيزاتها على الخرابيط :::
بس صدق بنات الوحده لازم يكون فيه معاش بايدها وهي المسكينه كل ما تسير السوق معايه ما أشوفها تشتري شي وتقول لي انها ما استلمت مصروفها من زوجها واتم تطالع الشي بس يحز في خاطرها كيف يهون على زوجها يخليها جي مع انه يحبها ويحب عياله وايد ويموت عليهم … أنا مستغربه منه واذا صارت عندها مناسبه يعطيها بس حسب اللي تبغيه يعني يقعد معاها ويسألها الميكب بجم والفستان بجم والتسريحه وغيره وغيره حتى انها تكره تحضر مناسبات حد من أهلها …. الله يعينها
عاد قلنا حريص بس مش لهذي الدرجه حتى لو بغت تاخذ لعبه حق واحد من اليهال لازم تشاوره …. والله شو:: عسب ما يزعل منها ؟؟؛؛؛؛
انتوا شو رايكم بسالفتها بذمتكم ما تبط الجبد وترفع الضغط حتى بألعاب اليهال بتشاور وياه حتى لو كان بالدوام تتصل فيه وتخبره حشا مش حاله هذي وأنا عيزت وانا أكلمها وأقولها ترا الريال لما يشوف الحرمه ساكته يعتبرها ضعيفه بنظره اقولها خذيه بالسياسه ولا تحسسينه انج تطلبين منه أو تشحدين … يحليلها متحسفه كثر شعر راسها عشانها ما اشتغلت قبل العرس وتحسد كل وحده تشتغل بس أنا احاول أفهمها ان ريلها أحسن عن ريايل وايد والحمد لله على الأقل يعطيها صح بمذله بس بعد يعطيها أحسن عن غيره……
وألحين كل شي صار غالي واذا خذت بامبرز على جم من علبة حليب على سيريلاك طارت عنها فوق 400 درهم لعنبو شو صاير بالدنيا وما عندها ياهل واحد عندها ما شاء الله ثلاث يهال لا وبعد حامل وتتمنى لو تقدر تروح الصالون وتسوي تنظيف للبشره او تقص شعرها أو تصبغ مثلها مثل أي وحده بس يحليلها ما يصفى لها شي من المعاش مع انها في بيت أهلها مغرقينها بالفلوس ابوها من صوب واخوانها من صوب وخوالها بعد من صوب بس شو تسوي الشكوى لله …. هي ألحين قاعده معايه في البيت عسب نظهر بعد شوي نتسوق ونلعب اليهال ..
بنات ترا البنيه من كثر غصتها قالت لي اني أكتب سالفتها هني في المنتدى وتطلب مشورتكم يعني كيف تتعامل مع زوجها وكيف تقدر تخليه يعطيها المصروف على الأقل من غير ما يذلها عليه …….
عزيزتي لازم أتكلم زوجها واتفهمه أن الحياة صارت غاليه و ما تكفيها البيزات ولازم يزيدها ومهما يكون تراها أم عياله والمفروض ما يتمنن عليها ومصروف الزوجه واجب على الزوج اتجاهه وطبعا يحدده طبيعة المستوى المعيشي في البلاد إلي عايشين فيه عيل ليش هم يطالبون الحكومه بزيادة الرواتب وهم روحهم ما يزيدون حريمهم إلي الوحده تتعب في تربية العيال والسهر
بصراحه الله يعينها وأتمنى تتغير أحوالها للأفضل
والله كسرت خاطريه ..
معقولة في ناس جذي يفكرووون؟؟؟ و بعدين منو قال ان مصروف الزوجة مكرمة من الزوج !!!!!!! مصروف الزوجة واجبه على الزوج .. مب مكرمة !!!!
أنا من رايي تاخذ ريلها السوق معاها بس يتمشون .. و ادخله محل محل و تراويه أسعار البضايع هالأيام عسب يشوف إن الخمسمية هالأيام ماتييب حتى نعال (عزكم الله) يمكن اذا شاف الأسعار يحن قلبه عليها و يزيد مصروفها …
لكن اذا بيعطيها شي زياده فهذي هي المكرمه … والريال المفروض يعتبر هالزياده اللي يعطيها لزوجته تقديراً منه لها وشكر على اللي تسويه له ولاولاده
وبالنسبه لربيعتج … انا اقول خلها تاخذ ال 500 بس تخشها عندها … وتودي ريلها السوق معاها وتشتري كل اللي خاطرها فيه … ولاتخلي شي فخاطرها…
وبصراحه .. نا انقهرت من ريلها
هذا شو يسوي في فلوسه اذا مايعطي زوجته وعياله؟؟؟؟
ادعولها يا بنات ان الله يهدي زوجها … ويزيد كرمه عليها
هي يابته لنفسها لانها سكتت من البدايه
الحين خلها تروح له و تعلن التمرد و تطالب بزياده
لا تسير تقوله ابغي 1000 بس
يا ماما هذي ما تسوي شي خليها تطلب اكثر
يعني تسهر لك و عيالك و تخدمك بعيونها و اخر شي 500 و تذلها !! شو حتى البشاكير ياخذون اكثر الحين ..
الوحده الحين بتسير الصاالون بتقول لريلها تعال والله ادف انا سويت وااكس و منيكير !! مب حلوة !!
انا ف بيت هلي و اخذ 5000 مصروف شهري ما اتخيل يوم اسير بيت ريلي يتمنن علي ب 500 بفرها ف ويهه قسم بالله !!
هو يطلب اعطيه لكن انا والله استحي اخذ فلس منه ..
الله يهدي زوجج ويصلح امرج معاه