سيدات المنتدى محتاجه نصيحتكم كيف اقوي شخصيتي بين الموظفات واخليهم يحترمووني يمكن لاني ارتكبت غلط اني تميت اعزمهم لبيتي وايلس اكل معاهم واسولف صاروا ما يسمعون كلامي ولا ينفذون قراراتي ويوم اشرح لهم اي غلطه يعلون صوتهم ولا كاني مديره علما اني مواطنه وكل الموظفات وافدات واذا احد عنده اسم كتاب ممكن اقراه واستفيد منه عطوني اسمه ….
خلي شخصيتج قوووية وحاولي تقراين كتب متعدده عن فنون الادارة لو تروحين مكاتب بتحصلين عددد كبييير من الكتب…
تعاملي معاهم بالحسني يعني مب بالتكبر ولا بالبروده التامه لانج محاسبة امام الله وامام الناس……خلج مره شديده ومرره لينه… حقوقهم لاتتنازلين عنها وطبعا اذا احد غلط على موظفينج وكانوا على حق دافعي عنهم وكرميهم وشجعيهم الكلمه الحلووه تفيد انصحيهم في لبسهم في اخلاقهم في تعاملهم بالنصيحه الاسلاااميه اي وحده عندها مشاكل خليها ترجع لج هم جي بيحسون انج تحمينهم ولكن اذا غلطوا لاتبردين مرررره ولاتشدين مررره
الشخصيه القياديه تنولد مع الانسان ما تنكسب
تتعلمين مهارات وتكسبين علم ومعرفه اما الشخصيه ما اظن تقدرين تطورينها وايد
لان تطورها يكون محدود
دايما يقولج في فرق بين المدير والقائد
ووايد اعرف ناس ما شاء الله عندهم هالشي بالفطره حتى قبل لا يمسكون مناصب
تشوفينها في بيت اهلها او ريلها الكلمه كلمتها والكل يشاورها او مسوي لها اعتبار
ربيعتي من كثر ما هيه قويه تصيح الموظفين بس بالحق طبعا
ومن خبرتي اقولج والله ان كنتي زينه تمادوا وياج ورمسوا عنج
وان كانوا يخافون منج بيشتغلون عدل وبعد بيرمسون من وراج
يعني فالحالتين بيحشون فيج بس عالاقل تكونين انتي المسيطره
مافي ناس قلوبها نظيفه مثل قبل اسلوب التعامل الودود ما قام ينفع لان الناس قامت تتمادى
انا اشد وايد وارخي بحدود و سياستي اني ما اتهاون مع حد ولا ادخل حد من الموظفين في امور حياتي الشخصيه
ولا في حياتي دخلت حد بيتي من الدوام الا الاصحاب المقربين جدااااا
ولما كنت انسال اذا متزوجه او لا او مرتاحه مع زوجي اومنو الي يصرف انتي ولا هو او او او الف سؤال
اقول موب شغلكم ومحد يخصه متزوجه ولا مطلقه ولا متزفته
الكل ينصدم من جراتي واحيان والله وقاحه في تسكيتهم لكن هم يجبروني اسوي جذيه لان لو سكت بياكلوني
الحين انتي خربتيها بس الحل بعده في ايدينج
تبين تردين لعمرج الهيبه صح
لو انا مكانج ببدا بالعقاب عسب يعرفون اني انفذ موب اتكلم بس
اجتمعي بالموظفين كلهم وذكريهم بواجباتهم ومسؤلياتهم والعقاب شو بيكون للمهملين
وقولي لهم بتبدين تعطين انذارات وبتوصل للفصل وقد اعذر من انذر
خليهم الحين يحسون انج جاده في هالشي وقولي لهم من اليوم ورايح
اي حد ما يسمع كلامج او ما يسوي شغله او ما يلتزم بالقواعد ع طول انذار وبدون نقاش
وكتابي موب شفوي لانج عديتي مرحلة الشفوي وما سوو لج سالفه وارفعي في الموظفه مذكره
بس ادبي وحده الكل بيخاف عقب وبيصطلب
وانتبهي تنزلين من هيبتج عند اي حد ولا تاخذين وتعطين ويا الموظفين وايد
في ناس يوم تعاملينهم اوكي يتمادون وهذيل من هالنوعيه
قرقرت وايد بس والله من قهري
خليني ايي شهر مكانج والله لا اعلمهن الادب من اول ويديد
الله يوفقج حبيبتي
لما كنت اشتغل عندي الشغل شغل وما اخلط بين العلاقات والشغل
يعني عادي اضحك وأسولف مع البنات بس وقت الشغل خلاص اقعد اشتغل و إذا كنت مع قروب أوزع التاسكات و في الوقت الفلاني يكون جاهز والحمد الله بالعكس وقت الجد جد
حاولي انج تكونين صارمة وقت الشغل وإذا خلص الشغل سيري للبنت وقوليلها انج تعزينها بس هذا دوام وملزومين ع الشغل وخلنا نحلل راتبنا
فتخلطين الحابل بالنابل ما أقول غير الله يعينج
بالنسبة للكتب عندج كتاب القيادة والعمل الجماعي
بالتوفيق
كم اشتاق لهم بس خلاص تعبت من الشغل بس للحين يتواصلون ويأي و يحترمونني