قصة الفتاة الوحيده وحيده

السلام عليكم ورحمة الله وبركاته
شحالكم خواتي عساكم بخير
اليوم بقولكم قصه امعوره قلبي واااايد وترددة قبل ما اعرض هالقصه
بس ابي مساعدتكم وشو نسوي

القصه حقيقيه
احنا انعرف ريال شيبه عنده خير والحمدلله هو وعياله
اتزوج وحده هنديه ما اعرف اذا ام اعياله عايشه ولا لأ المهم بعد ما خذه هالهنديه بعد فتره قالت له انها حامل بس للعلم الريال وااااااااااايد كبير فالسن المهم تمت هالهنديه في البلاد قريب التسع شهور فقالت حق ريلها انها بتسير بلادها علشان اتربي المهم الريال رضي انه مرته اتسير وسارت الحرمه وربت فبلادها وردت الامارات مع البنت المهم فرح الريال بلبنت علي انها بنته العيال ماصدقوا انه هذي اختهم فقالوا لازم ايسون لها تحاليل علشان ايعرفون اذا كانت هي اختهم ولا لأ خذوها للمستشفي وسوها التحاليل وكل الاجراءات وطلعت الطامه الكبري انها مب اختهم
يعني مب بنت الريال ويوم ردوا يبون يسألون الهنديه بنت امنوه شافوها شارده هي اوراقها وغراضها وتمت هالبنت عند الريال عشان بس ياخذ الاجر فيها بس المشكله واللي معور قلبي انا البنت اول شي رباها الدريولاللي كان عايش عند الريال هو اللي كان ايسبحها ويرقدها عنده بعدين راعي المزرعه يعني مثل ماتقولون من ريال لريال اوكيه مب حرام هي مهما اتكون ابنيه وهذا ريال خاصة هنود وباكستانيه محد يوثق فيهم بعد فتره ياي الريال وياب للبنت شغاله اتربيها وتهتم فيها بس اي اهتمام هذا
تضربها وماتسبحها كل يوم وتعالوا شوفوا لبسها اللي تلبسه حبيت اقولكم ان الريال يعطي الخدامه فلوس عشان تشتري لها ملابس بساي ملابس والله لو بلاش مابلبس بنتيه المهم هاخدامه كانت تاخذ ربع الفلوس تشتري للبنت والباقي هي تاكله لأنه لارقيب ولا حسيب عليها ودايما هالبنت ادور فشوارع وكل الناس ايعرفون عنها اصغير وكبير انا اللي اخاف منه انه عادي باجر اي ريال طايف ايشيلها ويفعل فيها هذيج الحزه شو بيكون مصيرها ما عندها حد تشتكي له اوحتي لوعرفنا وسرنا لشرطه علشان تاخذ حقا بس اي حق بتاخذه بلعكس الريال اللي يرعاها هو اللي بيتمشكل لانها ماعندها اوراق تثبت اي شي عنها ولا حتي بحرف واحد المهم البنت مرات عند بنات حمي وتلعب معاهم بس اذا شفتوا كيف حالتها صدقوني قلبكم بيتقطع عليها وهي ماشالله عليها جمال وحلوه وهي الحينه عمرها سبع سنوات بس والله ماتعرف لا تكتب ولا تقرا
بتقولون ليش مادخلوها المدرسه ما شي اوراق تثبت هويتها حتي نحنا دخلنا بس عشان تحفظ كم كلمه من كتاب الله كانت الخدامه ماتخليها اتي بتقولون وين اعيال الريال بس انا ماقول الا الله عليهم ودنيا دواره هم مايبونها ولا يرضون انها ادش بيتهم مع انهم خلاص هم يعتبرون المسؤؤلين عنها بس ابد ماشي رحمه والمشكله هم ايعرفون امنوه امها وابوها اللي فالهند بس مايودونها واذا قلنا لهم ايقولون احنا يالسين نفكر كيف انطلعها من البلاد علشان انوديها لأهلها بس اي تفكير هذا من كم شهرلدرجه من كثر مانحاتيها واخايفين عليها اتصلنا بدار رعاية زايد الله يرحمه علشان بس اتحصل الرعايه منهم بس حصلنا الرفض انا ماابي اي شي بس ابي حل للبنت والله حرام ابي حد يوصل لشيخ او حتي مسؤول بس انطلعها من البلاد ونوديها عند اهلها لأن لاسمح الله توفي الريال اللي يرعاها لانه ريال كبير وايد فالسن والعيال رافضينها رفض نهائي هي وين بتسير وين بتعيش قلنا بنتبناها بس اتبني حرام بالأسلام الله يخليكم ساعدوني وقولوا لي الحل بقصة بنت وحيده وهي صدق وحيده (هذا اسمها الحقيقي) ابي مساعدتكم الله يخليكم

والي ماعندها شي بس تدعيلها
انه الله يستر علي هالبنت بدنيا والآخره

والسموحه

الله يكون في عونها

فديتج اتصلنا لشرطه وقالوا اللي دخلها ايطلعها

ختية انا بعد اضم صوتي للاخت عروس2017 اذا حابة تكسبين فيها اجر بلغي الشرطة وارحميها من العذاب الي هية فية وهم بيتصلو بالجهات المختصة ختية الريال الشيبة عنده الي بيوقف معه واولهم عياله بس هاي الفقيرة مالها غير الله القلوب الرحيمة الي شراتج حرام والله حرام تخليها عندهم ساعة واحدة او تسكتين صدقيني عقب ماتتصلي وتتاخذ لامور الوضع الطبيعي بتقولي ياليتني بلغت من زمان وعقب هذا بيرد لج بالخير في عيالج واهلج وصحتج حبيبتي دخيلج بالغي الشرطة انا ام وعندي بنت في نفس عمرها هذا الي خلاني انقهر عليها

انا اعرف هذي البنت بس الله يكون في العون

الله يكون في عونها ، وحليلها مالها ذنب

والله ما عرف شو اقولج……. لا تتصلون للشرطه روحوا للشرطه قوقولهم سالفه البنت….

قوقولهم حرام فذمت منو هذي الريال شيبه……وعياله رافضينها لانها مب اختهم……وحاولول بعدكم منيه ومناك

كله ول ليهال شو ذنبها المسكينه…الله يعينها…رزقها عندالله