++ قصة ولادتي بحبيبي ولي العهد ++

السلام عليكم ورحمة الله وبركاته

اشحالكن خواتي الغاليات؟؟

اتولهت عليكن وااااايد

ورجعت لكن بعد هالغيبة والانشغال عشان أخبركن بقصة ولادتي

وقبل لا أكتب لكن القصة

وللخوات اللي ايحبن ايعرفن قصة ولادتيه الأولى

هالرابط فيه قصة ولادتي بغاليتي ميثاء

https://forum.uaewomen.net/showthread.php?t=266504

الحمدلله رب العالمين اللي رزقني حبيبي ولي العهد (محمد)

يوم الأربعاء .. تاريخ 28/10/2017 ..الساعة 06:00 المغرب

ومثل ما شاركتكن بقصة ولادتيه بنور عيوني ميثاء

حبيت أكتب لكن قصة ولادتيه بالغالي محمد

عسى الله يحفظه هو وأخته وأبوهم وايخليهم لي

المهم يالغاليات

كان عندي موعد لعيادة الحوامل يوم الإثنين .. تاريخ 26/10/2017

وسبحان الله

ما أدري ليش كنت حاطة في بالي أنه هالتاريخ بيكون يوم الأربعاء

لكن يوم الإثنين المساء .. استوعبت أني طوفت الموعد

وفي نفس اليوم في الليل .. على الساعة 12 .. حسيت بأوجاع خفيفة

فطلبت من ريلي ايوديني الطواري عشان أتطمن

ومن وصلت .. قالت لي الدكتورة هذا كان آخر موعد لج في عيادة الحوامل وهو أهم موعد

وعقبها فحصتنيه وقالت لي 1 سم

وعلى طول طلبت إني أسير وأقيس الطلق على جهاز التخطيط

وبين التخطيط أنه الطلق مرتفع

فطلبت مني أرد البيت وأرجع لها على الساعة 6 الصبح وأطلب تخطيط للطلق مرة ثانية

عشان ترجع تتأكد إذا ولادة ولا لا

رديت البيت .. حاولت أرقد .. لكن حسيت الويع يزيد .. فطلبت من ريلي ايشلنيه المستشفى

قريت سورة مريم .. وشربت زعتر .. وعقب ما صلينا الفير .. سرنا للمستشفى

وقبل لا أدخل قسم الطواري

مشيت ويا ريلي لفتين حوالين باركنات مستشفى الوصل (مشي سريع رغم التعب والويع)

المهم .. سوولي تخطيط الطلق .. وللمرة الثانية .. ظهر الجهاز أنه الطلق مرتفع

فحصتنيه الدكتورة وقالت ما شاء الله 4 سم .. وعلى طول شلونيه لقسم الولادة

دخلونيه غرفة الولادة .. وسبحان الله .. كانت نفس الغرفة اللي ولدت فيها بنوتتي فديتها

وسار ريلي وياب أمه

فديتها ما قصرت

الله ايطول بعمرها وايخليها لنا وعساهم عيالي سند لها في الدنيا

تمت تمسح على ظهريه وتدعي لي بسهولة الولادة

لكن فجأة .. اختفى الويع تماما وما كنت أحس بالطلق

وتميت طول الوقت كل ما يفحصونيه .. أحس بالإحباط .. 4 سم وراس الياهل ما نزل بالكامل للحوض

وقالوا لي في هالحالة .. ما انروم انحرض الطلق شرات ما سوينا وياج في ولادتج الأولى ولا انروم نفتح لج كيس الماي

وتميت على هالمعاناة لين عقب صلاة العشاء تقريبا .. وعقب شلونيه لغرفة ما قبل الولادة

وقالوا لي يمكن استعيلنا يوم يبناج على طول للولادة

وفي غرفة ما قبل الولادة

صليت وأنا على الشبرية (السرير)

وقلت دام أنيه مب ولادة .. فلازم أصلي فروضي

وطول الوقت وأنا أفكر في أمايه فديتها

لأنها شرات ما ذكرت لكن في قصة ولادتيه الأولى

اموصية الكل .. محد ايخبرها إذا وحدة من بناتها على ولادة

لأنها تتروع فديتها

رغم أنها اتسير ويا اللي يولدن وجيه .. بس بناتها تتروع .. سبحان الله

عشان جيه

وأنا في المستشفى

هي تتصل بي واترد تتصل وتتصل .. وأنا ما أرد

ويوم رديت اتصلت بها

سويت عمريه أرمسها عادي وأضحك وما فيه شي

وحتى ختيه .. اتصلت بي .. وأرمسها عادي ولا بينت لها أنيه في المستشفى

المهم

تميت على جهاز تخطيط الطلق في غرفة ما قبل الولادة

وعقب قالوا لي خلاص بنوديج لغرفة فيها حوامل للمتابعة .. لأنج الظاهر مب ولادة

فقلت لهم خلاص عيل ظهرونيه برد البيت

قالوا لي باجر الصبح بنحدد لج هالشي

نقلونيه لجناح ثاني وحطوني في غرفة عشان ايتابعون حالتيه

والصبح

ابتديت أحس بويع خفيف .. ايروح وايي

لكن ما حطيت في بالي أنه هذا بداية الطلق الفعلي

يت الدكتورة وحطت لي جهاز التخطيط

ويت يدة ريلي تقعد عندي وطلبت من أم ريلي أنها اترد البيت وترتاح شوي

وأم ريلي فديتها كانت رافضة تماما أنها اتودرنيه .. لكن ريلي ويدوته أصروا عليها

رغم الويع .. بس الجهاز ما كان ايظهر الويع الفعلي .. وشكلها الدكتورة سكرت ملفي عشان ايرجعوني للبيت

بس على الظهر .. ابتدى الويع يزيد .. وعلى الساعة 3 .. طلبت من الممرضة تنادي لي الدكتورة الموجودة

ويوم يت الدكتورة .. شافت الدموع في عيوني

قلت لها دكتورة والله الويع يزيد

فحصتنيه وقالت 6 سم .. وطلبت من الممرضات ينقلونيه بسرعة لقسم الولادة

وتمت اتضاربهم ليش سكروا ملفي

وأنا على طول اتصلت فريلي وقلت له خلاص أنا ولادة

دخلوني غرفة الولادة ووصلوا ريلي ويا أمه

وشلونيه لغرفة ثانية عدال غرفة ولادتيه الأولى .. وأنا متفيجة .. أقول لهم أبا غرفتيه القبلية

وهم يقولون لي هذيج فيها حالة ولادة

دخلونيه الغرفة

وقالت لي القابلة .. يوم اتحسين بويع .. اتنفسي وخذي شهيق وزفير

وحطي الأكسجين إذا زاد عليج الويع

وعقب يوم واااايد زاد الويع .. عطتني إبرة مسكنة

ويوم ابتدى مفعول الإبرة المسكنة

حسيت بالنعاس وبثقل في لساني

فقلت لريلي لا تتحرانيه بنام .. بس الإبرة المسكنة هي السبب

ويوم وصلت 8 سم .. طلبت القابلة من الكل يظهر لأنها بغت تفتح لي كيس الماي

وركبت لي الجلوكوز

ودخلوا ريلي وأمه ويدته .. هم واقفين من صوب .. والقابلة من الصوب الثاني

وريلي ايشد على ايدي وأشوف في عيونه الخوف علي

الكل يدعي لي .. يدة ريلي تقرا لي آيات من القرآن .. وأمه تمسح لي على ظهريه من فوق

وأنا كل ما ايزيد الويع .. أقول يااااا رب .. يسر وسهل علي .. ياااااا رب

والحمدلله دعيت لكل أمة الإسلام ولكل واحد وصاني

وعلى أذان المغرب .. والمؤذن يقول الله أكبر .. تميت أقول يااااا رب

وزاد الطلق وأنا أدفع وأدفع

وقبل لا ايخلص الأذان .. طلع ولي العهد .. محمد .. فديت ويهه

شفت الفرحة في عيون ريلي وعيون هله

وكالعادة .. عرفت أنه ريلي صور البيبي بالفيديو وصور كل شي في الغرفة

سألته كيف وانت كنت واقف عدالي اتشد على ايدي؟؟!!!

شكله عرف اينظم وقته ويستغل اللحظات عشان نحتفظ بهالذكرى الحلوة

ظهر ريلي على طول ايبشر أمايه .. وهي تمت اتصيح وقالت كنت حاسة بهالشي

وختيه تمت اتلومنيه واتقول على الأقل خبرينيه .. عشان أدعي لج

بس صدق .. الحمدلله على نعمة الولادة الطبيعية .. اللي اتخليج اتحسين بكل الآلام

وبالتالي اتحبين ضناج أكثر وأكثر

والسموحة منكن .. اتأخرت شوي عليكن

بس لأني تميت في المستشفى لين تاريخ 31 – 10 – 2024

لأنه ولديه فديته كان عنده بو صفار (درجة خفيفة) + الطهور (الختان)

والحمدلله يا رب

دعواتكن يالغاليات

أنه الله يحفظ لي ميثاء ومحمد وايكونون من الذرية الصالحة ويحفظ لنا أبوهم وايطول لنا بعمره

آااامين يا رب

الحمدالله ع سلامتج وسلامة البيبي ^^

يا ربي

أقرا وأصيح

فديت ميثوه وحمود أنا

فديتج والله خيتوه

ربي لا يحرمني منج

ما أعرف شو أكتب لج

لأني قاعدة أصيح

ما أحبج.. ليش ما تخبريني؟؟

الف مبروك ع ولي العهد .. وربي يحفظه لج وعقبااال ماا تشوووفينه متخرج من الجامعه ومعرس يااااااااااارب ..

والحمدالله ع سلامتج الغلا..

تستحقين السلامه ومبروكين على ميثاني ومحمد

مبروووووووووووك ماياكم ويتربى في عزكم يارب

والله يسهل عليناااااا

مبروووووووووووك