~~ قصـــة إمـــاـآراتيـة ~~

الجزء الثاني

ومرن أسبوعين على هالسالفه .. وانسيتها بعد … كنت هذيج الساعه في واحد من المراكز اشرب كوفي ويا واحد من ربعي .. وفجأه أشووف واحد من ربعي اللي كنت مرابعنهم بداية السنه يعني واحد من الشله الصايعه .. ف من الاحترام نشيت وسرت لين عنده وسلمت عليه وهو بعد وايد استانس .. فبدأ الحوار..

أحمد : تصدق قلت أكيد سعيد مابينش يسلم عشان جي ماييت صووبك ..

سعيد : لا مب ل هالدرجه عاد .. تعال بسألك عن الربع وينهم .. عنك .. وينه ناصر .. ما أشوفه احيده طبجتك ..

أحمد : شوو أقولك .. يا خويه ..؟؟

سعيد : عسى ما شر شي فيه .. قولي ..

أحمد : ياليت .. بعد .. المباحث زخته وهو في الشقه مالته .. وقبظو عليه والحين هو محبوس في السجن هو و سيف ..

سعيد : وكيف عرفو عن هاذيلا معنه سيف من صوب وهذاك من صوب .. وانته شوعنك ..

أحمد: والله ما ادري .. انا عني من طاحو هاذيلا في السجن .. بطاقتي فريتها وطلعت بطاقه تلفون ثانيه .. مافيه على المصايب وبفتح صفحه يديده ..

سعيد : زين تسوي .. بس أي خبر تسمعه اتصلي ,, على موبايلي وهذا رقمي …

أحمد : ان شاء الله يا سعيد … ومشكوور

وسرت عنه .. وانا افكر واقوول لوكنت وياهم جي بيستويلي ولا شوو.. وتتصلي سلامه احلى بدر ..
وأرمس وياها وانا فرحان… على الاقل تخفف عني هموم ربعي القبليين اللي طاحوو في السجن .. فقلتلها شو رايج .. أخطبج بالخميس .. وانا قلت حق اميه .. فردت عليه لا .. اصبر شوي ..مب الحين .. فقلتلها ليش وردت عقب بتعرف .. الايام اللي بتتكلم مب أنا والامر مابيطــول …
وبندت عنها وانا مب عارف ليش جي ترمسني ب الألغاز ..

وعقب 3 أيام ..أشوف رقم احمد .. وقلت عسى ماشر شوو مستوي بعد ..

أحمد : السلام عليكم
سعيد : وعليكم السلام .. شحالك احمد ..

أحمد : لا تسؤلني عن حالي .. الحاق شو مستوي ..

سعيد : شوو عندك بعد…. ارمس ..

أحمد : مابقى حد من الشله.. اللي طاح في السجن .. وراشد .. سار يحلل في المستشفى لانه بيسافر .. ما اعرف وين .. وويم فحص .. وظهرت نتيجت التحليل.. اكتشفو انه حامل الايــدز ..

سعيد : لا لا تقووول يا أحمد ..

أحمد : والله .. وهو نادم على هذيج الايام .. وانا ابا اسير افحص بس زايغ .. وابا اسير افحص ويا حد فقلت ليش مانسير انا وانته ..

سعيد : (وهومعصب). شو تقوول انته تباني افحص حق الايدز .. لا يا بوويه سير برووحك .. انا ورايه خطووبه .. تبا تسوي الخطووبه عزا شكلك .. وقم عن دربي يالله مع السلامه ..

وطلعت من البيت وسرت ايلس على السيفه .. وأشوف البحر وافر همومي .. بس شو نسوي هالمكتوب ..
والندم الحين مابينفع لو شو ..

وشوي واشوف سلامه يايه واستغربت منها كيف عرفت اني انا هنيه ..

سلامه : عيزت من كثر ما أتصل وكلما أتصل يعطيني مغلق .. فقلت يمكن القاه في المكان اللي نتجمع فيه ..

سعيد : واحساسج في محله ..

سلامه : بس شو سالفتك شال هموم الدنيا كلها على راسك .. قولي ولاتخليني أحن عليك شرات كل مره ..

وشفتها بنظره وعيوني كلها دموع ما اقدر ارمس..

سلامه : سعيد .. لاتخوفني بلاك ..أمك شي فيها قولي شو سالفتك .. ليش هالدموع .. قولي اللي في خاطرك ..عشان ترتاح ..

فقالها سعيد بكل شي .. من يوم ما اتصل أحمد لين ما وصل البـحر ..

سلامه : الله وياه ربيعك .. بس انته لازم تفحص ..

سعيد : نعم تبيني افحص ليش شاكه فيه اني حامل هالمرض.

سلامه : مستحيل اخذك ..عيل .. انا غبيه اخذك بدون ما تفحص .. ليش ان شاء الله ليكون تبا تنقل المرض عندي ..وتباني اتعذب شراتك ..

سعيد : اللي يسمعج يقوول فيه الايدز..

سلامه : عيل ليش زايغ هالكثر .. سير افحص .. ويوم بتفحص هذيج الساعه رمسني ..

وسارت سلامه عنه وخلته بروحه .. وهو متردد شو يسوي ..
اليوم الثاني اتصل حق سلامه بس ماردت عليه . فطرشتله مسج يوم بتفحص طرشلي مسج عشان ارمسك .. وتم على هالحاله لمدة اسبوع بس ماتحمل وهو اول مره مايرمس سلامه هالكثر .. فقرر انه يسير يفحص.. بس اتصل قبل في أحمد يبا يعرف شو نتيجت الفحص ..

سعيد : السلام عليكم .

أخو أحمد : وعليكم السلام ..

سعيد : هذا مب رقم أحمد .
أخو أحمد : هي هذا رقمه .

سعيد : انزين الاخو لو سمحت ابا اكلم أحمد .

أخو احمد : ههه ترمسه .. انته وين عايش .. عقب ما خرب سمعت العايله تبا ترمسه ..

سعيد : ليش ليكون فحص وطلع شي فيه ..

أخو أحمد : لا مافيه شي .. بس الشرطه زخوه لانه هتك بأعراض البنات .. كفايه انه فظحنا .. وين بيسير من عند ربه ..

سعيد : عيل بخليك .. ومشكور يوم بلغيتني ..

وصك الموبايل وسار يفحص .. وهو مرتبك . وكان خايف من انه الشرطه تزخه .. بس هو تشجع وسار المستشفى وطلب تحليل كامل.. وطرش مسج ل سلامه وقالها انه سايرأفحص .. والفليل بتشوفيني في نفس المكان اللي نتواعد فيه.. واستوى الليل وسار سعيد … وتريا بالساعه والساعتين بس .. سلامه مايت .. وتريا زياده بس شاف الوقت انه متأخر .. ما عرف قال شو السالفه بلاها مايت .. واتصلها .. كم من مره بس هي غالقه تلفونها .. ورد البيت . وطول الليل يفكر .. ويقول ليش مايت .. وفي نفس الوقت..كان زايغ من الفحص اللي سواه …
بس خلاص هو سوى الفحص .. واستوى الصبح ورد يتصل ل سلامه بس سلامه ماترد عليه … فاستغربت فقلت وين سارت .. ويووم ويوومين .. والمشكله اني عمري ما سالتها وين بيتكم .. لانه نحنا نتواعد في مكان واحد ..وحتى اني ماسألتها اذا هي تدرس ولاتشتغل.. بس هي كانت تسألني كل شي عن ربعي .. وعن بيتنا .. وعن كل شي في حياتي ..

و كملت اســـبوع كامل على هالحاله .. وانا ما اعرف شو مستوي .. أخافها تعبانه أو شي ..
فتذكرت التحاليل .. فقلت أحسلي أسـير أشوف الفحص.. يوم سرت المستشفى .. عطيتهم ورقة التحليل .. ف قالوولي ادخل داخل عند الدكتور .. وهني حسيت انه شي فيني … واتمنيت اني اموت قبل لا أسمع شوو قالي الدكتور.. قالي

الدكتور : لعبت كتير أوي .. بس انتا صوغير أوي .. وانتا دمرت حياتك لوحدك .. الدنيا يا ابني مش لعب وبس لأ ياابني .. بس دلوأتي توب لربنا الوحيد هو اللي بيغفر الزنووب .. والله معاك .. بس انتا لازم تبأ عندنا .. لاننا خايفين تنأل العدوى لحد غيرك …

سعيد : يعني خلاص .. حياتي راحت .. ومستقبلي ضاع .. ماشي أمل ..

وفجأه اتذكر اليوم اللي ابتديت فيه هالحركات لين اليوم … وأشرد بسرعه من حجرت الدكتور .. وهو كان يزقرني .. ورحت بعيد بعيد .. وأصيح .. وأصيح .. وعيوني تحمر ودموعي ما طيع توقف .. وفجأه اتصلت سلامه كأنها حاسه باللي استوى .. بس ما رديت..

بس لاحظت انها كل شوي تتصل .. يعني ماتوقف مول فقلت ليكون تعرف .. فقلت ليش ما أرد ..

سعيد : هلا وغلا .. وينج من زمان .. ماسمعنا حسج .. عذبتينا ..

سلامه : بس صوتك يقول العكس.. اللي يسمع صوتك يقول واحد مزجم .

سعيد : ها هيه شوي مزجم ..

سلامه : وشو عن التحليل .. طلعت النتيجه ولا بعدها ..