قول عمي الرجال مايسمع كلام زوجته لانها بتضيعه وعمي مايشك خيط في ابره الا برائي زوجته!

الله يعينج حبيبتي …!!!

هذي النصيحة الي أهداها ابوه هو أكبر أسباب خلاف يسبب بين الزوج والزوجه..هناك أمثلة كثيرة سببت خلافات في المجتمع منها شاور زوجتك وخالفها…تعرفين الحل معاه صعب جداً لأنه ثقافة البيئة الي عايش فيها سبب رئيسي في حصول فجوة بين الزوج والزوجه
ولكن كيف نقدر نردم هالفجوة…

1- طريقة المناقشة كيف هو بينج وبين زوجج هل بصوت عالي..هل بحماس شديد لازم تراقبين نفسج لأن الزوج ترسخ عنده لا تسمع كلام زوجتك فأنتي لازم تكونين صبورة إن كنتي تحبينه..وحاولي النقاش بهدوء وأعطيه فكره ان يسمع ما عندج ثم وجهي عمداً بدون ما يحس مثلاً قولي له: هذا كلامي وياليت تروح عند فلان ياليت اتشوفين من هو أفضل واحد يدور الخير لكم وتذكرين هالفلان لزوجج بالاسم عشان يثبت في ذهنه بس مب بشكل حماسي اتحسين هالفلان له معزة عندج وعند زوجج وراقبي زوجج يروح يشاور امنوه يوم يخالفج قوليله من هذا اللي ارتحت له طلبي اسمه اذا هالفلان وافق رايج خلاص يوم يحصل بينج وبين زوجج مناقشة وانتي متأكده ما بيسولج سالفه قوليله بصوت عادي وهادي يروح عند ناس لهم ثقه

2- هناك أهل اختصاص تقدرين تشترين كتب عن فن التعامل مع اشخاص يخالفونج منهم الزوج

3- عليج بقراءة سيرة امنا المؤمنين السيده أم سلمه رضى الله عنها وكيف أنها قالت لرسول الله صلى الله عليه وسلم أن يفعله في صلح الحديبية.. وذكريه لزوجج اذا حصل بينج مناقشة ذكريه بهذي القصة عن رسولنا الكريم وعن امنا المؤمنين ام سلمه بطريقه سلسله هاديه وحب يمكن تقدرين تكسرين الحاجز اللي بينج وبينه

4- افتحي مجال المناقشة على قد عقله لأن ألاحظ اختلاف كبير بين عقلج الكبير وعقله هو الذي يسيره سفينة الأهل

5- ذكريه بقصص أمهات المؤمنين زوجات النبي صلى الله عليه وسلم لأن الثقافة الإسلامية تلعب دور في بناء الشخصية

6- زوجج يحتاج إلى تغيير فكره وهذا يتطلب مجهود كبير منج لأن واضح جداً حبه لأهله طغى على حبه لج..فأنتي محبوبته ولكن لا يريد زعل هله فهو يعرفهم سيقاطعونه اذا خالفهم وهذا سبب رئيسي بأنه لا يؤيد رايج…

7- لا تقارني بين أولادج وأولادهم حتى لا تتعبين أكثر حتى لو هم يغارون من بيتج وعيالج فأفضل انج لا تفكرين إن الأمر فيه غيره لأن هذا قد يسبب لج تعب نفسي توكلي على الله وربي عيالج بما يرضي الله..وادعي الله أن يسخر زوجج لما يحب ويرضى فالدعاء بالهداية له مفعول عجيب

8- علمي نفسج وزوجج أن المشاورة لازم ما يكون عند واحد مهموم متشاءم حسود حقودشديد الغيره منكم عاصي يمكن يستفيد وهذا الله أعلم

الله يصلح بينج وبين زوجج ويبعد عنكم كل من يسبب لكم المشاكل

شوفي الغلا . . كل ريال لااااااازم فيه عيب . . وريلج عيبه عيب
أكثر الرياييل . . ما يحبون يسمعون شور حريمهم لأن يتحسبون
إن هذا ضعف ومنقود الريال يسمع شور حرمته ! شفتي الفقرة
الأولى اللي كتبتيها …؟ هاي بالضبط حالتي وياه أشوووور
عليه بشور مستحيل ياخذه (خاصة إذا ما كان أساسا مقتنع به)
بس يمشيه يوم اييه الشور هذا من برع وعاااادي ما أضايق
عمري . . لأني في قرارة نفسي أعرف إنه أكيد عرف في نفسه إن
رايي دايما (مب دايما دايما يعني ) يكون صح !

أهل ريلج شكلهم فاضين ما وراهم شغلة . . ابعدي عمرج عنهم
وزين انج ساكنة وياهم في نفس المدينة مب في نفس البيت بعد !
الله يوفقج ويعينج

اختي ما شاء الله عليج اسلوبج حلو، و حرصج على بيتج و عيالج احلى.
بس اللي لازم تعرفينه ان الريال ما يحب دايما يسمع لزوجته، انا دايما اقول لريلي شي و ما يسمع و بعدين يسمع لربعه و تكون نفس الرمسة اللي انا قايلتنها.
بس شوفي الغلط اللي انتي اتسوينه وبدون ما تنتبهي: دايما اتلومينه و اطلعينه غلطان و انتي الصح( انا ما قلت لك ….) و هو يعرف هالشي بس رجولته ما تخليه يعترف بالغلط، او ان اسلوبج ينرفزه و يخليه يلومج.
في حالتج انا انصحج انج ما اتحنين عليه ، حتى لو دس او خش عليج شي بيرجع و بيقولج لانه محتاج حد يسمعه و ما عنده حد غيرج. فكوني له كد هالمسوؤلية. و ان استوا شي و كنتي انتي حقانية اسكتي عنه لانه هو يعرف بس يبا حد يواسيه.
باين على ريلج انه وايد طيب و اهله يستغلونه، الله يعينكم ، لو قدرتوا ترجعوا وين ما كنتم احسن.
اما عن الغيرة من عيالج و شغلج فهذا شي طبيعي بين العوايل خاصة اذا انتم عايشين بسعادة.

كل الرياييل ما يحبون يسمعون كلام حريمهم حتى لو كلامهم هو الصح و لمنفعتهم
بس كلام ربعهم على الراس و العين

الله يعينا بس

الله يعينج يا قلبي تحميله شوي وان شاء الله بتتغير حياتكم للاحسن
اتمنى لج التوفيق والسعاده الله يخليلج عيالج وبوعيالج ^_^