كل الرياييل شرات بعض :: للتنبيه فقــط ::

وإلي خلاني أصر وانزل الموضوع هو حزني لألمها وتألمي لما أشوف دموعها وهي تقول ما عاد فيني دمووع

أرتمت بنفسها في جسدي وهي تبكي من خاطرها .. وقتها جسدي أرتجف وأقشعر من رجفات جسدها وتنهداتها

القصـة بسيطة بدأت من محاولة وثــقة وانتهت والحمدلله برحمه من الله عزوجل

اللهم ارحمنا برحمتك الواسعة يا رحمن يا رحيم

تقولي والدي وأخوتي ما يخلون حرمة ولا بنت في حالها ووالدتي مسكينة مالها كلمة فالبيت … وأنا خايفة إن الله يعاقبهم فيني وخاصة انها البنت الوحيدة في العايلة

رغم إنها والله العظيم محتشمة نفسها ومن البيت للجامعة ومن الجامعة للبيت ولكن "كما تدين تدان"

تقول صارت لي واايد تحرشات بس الله ستر واحس نفسي طمع لكل واحد رغم اني متغشية وفي حالي ولبسي وشكلي عاادي جدا

تقدملها واحد ما يقربلهم بس أبوها طاح فيه اونه هو اقل منها في الدراسة اعتقد عنده الإعدادية وشرد الريال وما رجع

بالصدفة في يوم من الأيام دشت المسن وشافت إضافة وضافته … وبعدها بفترة دخل راعي الايميل وطلع شاب
طبعا تعرفون سوالف الشباب .. جم عمرج .. وين ساكنة الغالية .. شو من القبايل أنتي .. ألــــــــــــخ
هي مو من طبعها تكلم شباب وأنا يوم دريت قلتلها حذفي إضافته على طوول الشباب لعيبين .. قالت والله هو الوحيد الريال عندي فالمسن … وحسيت من كلامه انه أخلاقه زينه ومب راعي سوالف لعب وخريط
قالت أصابع يدج مو مثل بعض ..

قلتلها الانسان لما يدخل في طريق الله ما راضي عليه في النهاية الله ما راح يوفقه ..

قالت يمكن هو إلي بيستر علي من عيون الوحوش
قلتلها ديري بالج تعطينه أي معلومات عنج أو أي صورة ..

المهم صالها مدة ما دخلت النت يمكن شهر
يوم رجعت دخلت المسن شافته شابك قام يقوللها ليش مش معبرتني ..
انا كله افكر فيج ..
انتي غير عن كل البنات الي ارمس وياهم
انتي ما رضيتي ترمسين وياي في التلفون وما عندج سوالف بنات هالايام
هيه واحليلها فرحت .. وكله تقول له مشكور …
قالها والله اني اعزج واحترمج
تمت على هاي الحال معاه يومين تقريبا .. هو يمدح فيها وهي تقول شكرا وهذا من طيب اصلك
ثاني يوم العيد .. دخلت عقب صلاة المغرب
وتم يتمدح كالعادة .. عقب هي قالتله شو تريد توصله بالضبط
قالها بصراحة
أنا أحبج وأمووت فيج وأريد اتصل فيج عشان أبارك لج عالعيد .." حبته القرادة "

قالت ما أقدر .. حدك عالنت والمفروض هالشي ما يصير

دقيت عليها بالصدفة على ثالث أيام العيد اسألها عن اخبارها وقالت لي السالفة .. وقلت لها لا تكلمينه
وطرشيله رسالة عالمسن قوليله إذا صدق تحبني تقدملي …

قلتلها هنيه بتعرفين نيته على حقيقته إذا هو يريدج صدق ولا لأ
وقلتلها مثلا لو وافق على رسالتج .. لا تتصلين فيه .. عطيه رقم حد من أخوانج يتكلم معاه ويقوله انه ناس دلوه عليكم ومن هالسوالف
قالتلي اوكي

راحت وطرشت له رساله .. توضح له إنها مب راعية لعب وحب عالنت وإذا صدق يحبها على قولته عشان أخلاقها يتقدم لها …. الــــــــخ

تقول مر اليوم الاول وما رد علي ومر اليوم الثاني ومارد

قلتلها حذفي ايميله بسررعة تأخره في الرد مفهوم شو معناه ..

قالت لي حرام عليج يمكن عنده ظروف

نسيت أقول لكم إنها متعلقة فيه لأنه يناسبها … ومثل ما قلت تريد الستر
هو اكبر منها بسنتين ويشتغل في مكان مرموق في العين ومن أحسن القبايل .. طبعا هذا على حسب كلامه وحلفه لها …

"الله اعلم ويما تحت السواهي دواهي"

اول امس راحت وسوت حركة استغربت منها .. خذت ايميله وضافته على ايميل اخوها وفتحت ايميلين عقب صلاة العصر تقريبا …

تدرون شو شافت .. شافت انه أون لاين على إيميل أخوها وأوف لاين على إيميلها

وأنصدمت .. يعني طلع لعيب وقص عليها ..

وشكله مسوي بلوك أو حاذف إيميلها .. ما أدري شو السالفة بالضبط
الحمد لله إنها ما طاوعته وكملت معاه والله كشف سوء نيته

هيه ما سكتت .. راحت ودخلت إيميل أخوها وسلمت عليه وتقولي وقتها النار في جوفي وأنا اكلمه بشخصية ثانية والدموع في عيني " حشى الدنيا ما فيها امان مووول "

قعدت تقوله عن اسم ومكان وهمي .. كبرت عمرها وغيرت مكان سكنها وقالت إنها تشتغل وذكرت نفس المكان الي هو يشتغل فيه خخخخخخخخ عشان تصدمة وتشوف ردت فعله

وهو عطاها معلومات عنه بعده ….

بس الصدمة إن معلوماته في المرة الثانية مختلفة بالمرررررررة عن المعلومات في المرة الأولى
لا والمصيبة انه حالف هنيه وهناك ..

استغفر الله العظيم .. لهاذي الدرجة

صار الاستهان باسم المولى سهل وبكل بساطة … واستخدامه في الحلف عشان بس يحققون ذاتهم وغرائزهم

نهاية الموضوع إنها صارت وحذفت إيميله وهي الحين تحمد الله إنها وصلت لين هنيه وما كبر الموضوع

نصيحة مني ومن كل إنسان شاف بعيونه او مر بموقف من هالمواقف
لا تصدقون حد .. الدنيا ما فيها أمان

الي نيته زينه " الباب يفوت جمل على قولة أخوانا المصريين"

ولا تعطون أي احد مهما كان صورة او معلومات صحيحة او أي شي لأنه الوحوش يمكن يستخدمونه طعم وقت الحاجة مثل موضوع الأخت كوكتيل " عرسي يوم الاربعاء والثاني يوم الخميس "

اللهم أسترنا على الأرض وتحت الأرض ويوم العرض عليك

زبدة الكلام .. لو أي احد قالكم احبج واموووت فيج وما أقدر استغني عنج وقلبي يتقطع من دونج وغيره من هالكلام … لا تعطونه ويه وتضعف قلوبكم قلوله اشرب من البحر ابرك لك :: لانها حركات مكشوفة يتمسكنون ليــن ما يتمكنون :: عفانا الله

الله يحفظنا جميعا من المكروره والســوء ويعطي كل وحده على نيتها