طبعا كل بنيه بتدخل حياه يديده ويا ريلها واهل ريلها اكيد تبغي تعرف اساسيات الححياه
وكيف تتصرف وياهم وبوجود ريلها واهل ريلها بما انها بتعيش وياهم بيت واحد
اكثر البنات في بيت اهاليهن مدلعات
كله رقاد ودراسه ووناسه 
وبس
بس عند الريل واهل الريل شي ثاني
كيف الوحده تهيأ عمرها لهالاجواء
كيف تعامل اهل ريلها
كيف تلبس يدامهم
كيف تكون حرمه سنعه في بيتهم عشان محد ايود عليها شي
كيف تكون ويا زوجها
وكيف تعامله وتهيأ له الاجواء المناسبه
كل شي بهالامور نتمنى نتعلمه منكم
واكيد راح يساعد بنات وايد
أولا ما بقولك سهل العيش ببيت أهل الزوج وعن نفسي أفضل كل زوجين يستقلوا ببيت بروحهم لكن ظروف الحياة تمنع ذلك
ثانيا كونك ببيت عائلة لزم تحترمي أهل البيت الذين أصبحوا الأن بمثابة أهلك وأكيد بلآحترام والمعاملة الطيبة والكلمة الحلوة والأبتسامة
بتصور هذا الكلام التقليدي المتعارف علية والكل يعرفة
لكن أحب أخبرك من قلب أم سوف تجتهدي لكسب أهل زوجك بكل الطرق التي ذكرتها سابقا وتجدي صد ومعاملة غير لأئقة وجفاء وبظروف مشاكل
وتصل مرات للقهر ——–
الأدب ثم الأدب ثم الأدب تعودي مهما مرت عليك مواقف لا تتخلي عن الأدب بالحوار بالدفاع عن نفسك حتى لو أحد غلط عليك
يمكن تقولوا سوف يفسر صعف هنا أقول لك النصيحة بات مظلوم ولا تبات ظالم وخاصة ببيت الزوج وبين أهله لأن مع الأهل سوف تكوني الخاسرة
لو خرجتي عن نطاق الأدب —- وعرفي أن الله هو من يكون بجوارك
والنصيحة الأهم ندخل بقلب صادق صافي لأن الكلمة حين تخرج من القلب تصل للقلب
ويكون كل عمل تعملية خالص لوجه الله وتأكدي ان لم ينفع مع العبد لا يضيع عند الرب
وحين تصعب عليك مسئلة بحياتك الزوجية صلاة ركعتين بجوف الليل ودعاء لله بيقين سوف تنفرج بأذن الرحمن — ولا تغفلي عن ذكر الله بأيام السعادة
حتى ينجيك من كل شدة —–
وكونك ببيت عائلة لزم تحترمي نظام البيت من حيث اليقظة والنوم لا ينفع الكسل مثل بيت الأهل جميل أن تكون الحرمة نشيطة خدومة نظيفة
تساعد أهل البيت تشاركهم ولا تتعالي —
والنصيحة اللي أقولها لبناتي دوم الذي يعطي هو من يكسب أكثر من الذي يأخذا
الله يوفق جميع الصبايا بحياتهم الجديدة ويكونوا نعم الزوجات
حاولي دايما ماتنسين فكره الاستقلال بعيد عنهم .. يعني متى ما صار مجال سويلج ملحق فالبيت او ابدي فالبنا اذا كانت الحاله الماديه اوكي
احترميهم وخلي اهتمامج بريلج اكثر شي .. مهما كان صعب تكسبين ودهم فالنهايه ريلج هو الوحيد اللي يهم تكسبين وده .. سبحان الله مب دايما تقدرين تكونين صديقتهم بس اهم شي ماتكونين عدوتهم
خلج مرحه وراعيه سوالف ومن تشوفين مشكله ابتعدي عنها وحاولي ماتتدخلين بين اهله
واهم اهم شي بعد انج ماتطلعين مشاكل بيتهم وتقولينها لامج او لاهلج .. احترمي خصوصيات البيت
وعن اللبس اذا في شباب طبعا جلابيه وشيله بيت .. واذا مافي شباب .. الجلابيه تكفي .. وفي غرفتج البسي اللي يريحج
انتي ساعديهم وقت الحاجه يعني اذا في عزيمه او شي .. اطبخي مره مثلا اكله وشوفي كيف بيستانسون .. وعقب فتره يعني عادي كم شهر خذي هديه حق عمتج بدون مناسبه .. الهدايا لها مفعول عجيب
طبعا ممكن يكون فيه قيود بعد الزواج يعني الحياة اللي كنتي عايشتنها قبل بتتغير لحياة ثانية لازم تتأقلمين عليها
اول نصيحة هي: كوني عفوية وعلى طبيعتج لا تتصنعين اي تصرف عشان يحبونج اهل ريلج
ثانيا مهما كان وضع بيتهم ومهما كانت عيشتهم انتي مش مجبورة تسوين مثلهم في كل شي
عادي كوني مثلهم في اشياء محددة تحسين انج لازم تلتزمين فيها لا تكونين كوبي بيست منهم
شرات ما يسون بعض الحريم
واختصار هذي النقطة طريقة عيشتهم فهميها من ريلج قبل العرس وقبل لا تدخلين بيتهم يعني سأليه
كيف حياتهم هناك في بيتهم وشو الأشياء اللي المفروض تتجنبينها …الخ
كوني معاهم في اغلب الاوقات مساعدة مش خدامة يعني اعرضي مساعدتج عليهم في المطبخ مثلا
أو في ترتيب شي معين او في استقبال ضيوف يايين عندهم اكرر مساااااعدة يعني مب يشغلونج وهم يالسين
اذا في بنات وخدم فالبيت
هذي نقطة مهمة وايد ووايد حريم يغفلن عنها كونهن يعتقدن ان هذا الشي في مصلحتهن
وايد حريم يتشكن من خوات رياييلهن وعماتهن حاولي بقدر الإمكان تكسبينهم بطريقة حلوة [ بالطيب والمعاملة الحسنة ]
سولفي وياهن واسإلي عنهن وساعديهن في بعض الأشياء
اللي بتقولج تجنبي خوات الريل قدر الامكان بقولج انا هذا غلط لأنج بتكونين في بيتهم
وبتعيشين وياهم وعيالج ان شاء الله اللي بتييبينهم هم عيالهم لو ابتعدتي عن خوات ريلج
محد بيوقف وياج منهن لو احتجتي وقفتهن
عاد باقي الاشياء الثانية اللي هي الترتيب والسنع والنظافة …الخ اكيد تعرفينها وناتجه عن اسلوبج فالحياة قبل العرس فطبقيها في بيت اهل ريلج
آخر نصيحة مني
انتي في قسمج الخاص في بيت اهل ريلج تملكين كامل الحرية في التصرف والحياة يعني اول ما تدخلين غرفتج
انفصلي نهائيا عن الاشياء اللي برى الغرفة الخاصة فيج
والله يوفقج ان شاء الله ويتمم زواجكم ع خير ويسعدج مع ريلج ويرزقج بالذرية الصالحة