كيف نجرد حياتنا – الجزء الثاني – فوضى السيارة

هلا مرحبا بكل البنات لي شاركن في الموضوع وكتبن تجاربهن مع الجرد ،، وأيضا أشكر البنات لي طبقن الجرد ولكن بدون كتابة ،، الشكر للجميع . وخلال قراءتي للردود الطيبة ،، لاحظت بعض النقاط التي تحتاج توضيح :
في الجزء الأول عن جرد الملابس ذكرت إنني أضع بعض الملابس في كرتون وأضعه بجانب الزبالة – أعزكم الله – وأنا ذكرت محتوى الكرتون هو عبارة عن ملابس أو أحذية لا استطيع أن أعطيها لأحد من المعارف أو حتى الجمعيات ولكن ممكن أن يستفيد منها شخص آخر ( في مرة من المرات حطينا دلال شكلهن حلو بس يبردن في كرتون وبعدين حطينا الكرتون عند الزبالة –الله يعزكم- وبعد شوي مر ريال من الجنسية الآسيوية وخذ الكرتون ،، يعني ما وحاله .. هو ممكن يستخدم الدلال حق الشاي في نفس الوقت ،، نحن تخلي الشاي فترة في الدلال ،، فإذا الدلة تبرد ما منها فايدة .. نحن نعطي علشان نفيد .

النقطة الثانية ذكرتها إحدى الخوات بإن ممكن كلامي يشجع البنات على الإسراف بصورة أو بأخرى … صحيح ممكن ،، بس أنا شو قصدي من الكتابة؟؟
التبذير ممكن يكون بمبالغ بسيطة وعلى فترات متباعدة ،، أحسن مثال : محلات بو درهم ودرهمين أو عشر دراهم ،، الوحدة تطلع شاريه بحدود ال 400 درهم وثلاثة أرباعه ما ينفع.
التخلص من الأغراض بالجرد بشروط وليس بشكل عشوائي ،، أنا ما أتخلص من ملابس تناسبني وشكلها حلو وما زالت جيدة ،، والأهم إني ألبس الملابس وتعطيني الشكل لي أنا أتمناه.

حياكن الله في الجزء الثاني من كيف نجرد حياتنا،اليوم بتناول فوضى السيارة
السيارة/الموتر مثله مثل أي شئ في حياتنا ،،لخدمة أهدافنا وأسعادنا وتيسيير أمورنا الحياتيةو المحافظة عليه وإستخدامه أفضل أستخدام هو المطلوب.وكل إنسان له رؤية خاصة بسيارته أو سيارتها؟؟ كيف؟؟
كل شخص منا يستخدم السيارة لغرض معين:توصيل للعمل،للنزه،مقاضي البيت والمشاوير،صلة رحم،تواصل،تجارة…إلخ.وبطبيعة الحال الوقت المستهلك في السيارة يختلف من فرد إلى آخر.
قبل بداية جرد السيارة:أسألي نفسج،ما هو المطلوب من هذه السيارة أن تؤديه؟؟كيف تحبين إن سيارتج تكون؟؟علشان تعرفين شو لي ممكن تحتفظين فيه في السيارة وشو الغير مهم ولا بد من التخلص منه أو وضعه في المكان المناسب.
وجرد السيارة له شقين: هههه بدينا الفلسفة ( ما عليه بنات تحملن الراعبي شويه ).
• الأول يتعلق بكل شئ في الموتر، الهيكل والمكينة ومصارين الموتر، الصيانة

1. بعد إنتهاء ضمان الوكالة،،خذي سيارتج لمكان ثقة ،، بالنسبة لي أسير محطة الإمارات لتبديل الزيت ،، أوقف الموتر وهم يتعبلوبه ،، عادة هذه شغلة الشباب ،، بس بنات ،، مب كل وحدة إخوانها الشباب الله يبارك فيهم يقدرون يودون الموتر بحكم ظروف معينة،، أحيانا ما يتسخرون!! أنا زوجي وإخواني كانوا دائما يودون موتري ،، بس سبحان الله مرت أيام إضطريت إني أسير ،، الموضوع مب مأساوي ،، عادي جدا.مثله مثل موعد الطبيب .. بس هذا تخصصه مواتر.وحطي مذكرة في الموبايل بعد ثلاث شهور ،، هذا للناس النسايه مثلي وللي يتناسى .

2. ولاقدر الله إذا إخترب شئ في الموتر فجأة وإنتي في الدرب ،، وقفي على جنب وإتصلي بالوكالة ،، وإذا كنتي في مكان بعيد أو في الليل ،، أولا أتصلي خبري هلج،، بعدين إتصلي بالشرطة .. هم في خدمة الشعب.لا تغامرين وتنزلين بتفحصين السيارة وإنتي ما تعرفين شئ !!! استهدي بالله واستريحي.
الأغراض لي تخص صاحب الموتر:وهذه سيتم تفصيلها لاحقا.
• الثاني:يتعلق بالموتر من الناحية القانونية:مخالفات/تأمين/تجديد
(للأمانة بنات أنا ما جددت موتري وهذا الشهر بإذن الله بجدده ،، لأن عندي موترين واحد يمشي في السليم والثاني متخشش لأنه بدون تجديد ).وإذا حبيتن تعرفن تفاصيل تجربتي مع المخالفات فالكن طيب وبعطيكن بالتفصيل الممل كيف رتبت وضعي.
1. أول شئ:أدخلي على موقع الشرطة في الإمارة وهيئة الطرق وإطلبي تفاصيل المخالفات على السيارة.
2. إذا كانت المخالفات صحيحة والمبلغ بسيط ،، إدفعي في أقرب مكان للدفع ،، في دبي ممكن الدفع في البريد والأجهزة الآليه .وطبعا بالبطاقة الإئتمانية لي ما أعترف بوجودها في الحياة 
3. إذا كان المبلغ كبير ،، تصرفي وقسطي المبلغ بس لا تهملين الموضوع ولا تأجلين … رجاءا.
4. إذا كان لج موتر بإسمج وبعتيه تأكدي من سلامة الإجراءات علشان ما تتعرضين لأي مسائلة قانونية بخصوص المخالفات وغيرها.
5. إذا سيارتج مب بإسمج ،، حوليها بإسمج إذا أمكن.
6. أمني السيارة حتى لو ما تقدرين تجددينها الحين مافي مشكلة ،، التأمين أهم حتى لو كان ضد الغير.

الأغراض لي تخص صاحب الموتر:وهذه سيتم تفصيلها لاحقا.

أول ما تبدين بتنظيف السيارة طلعي كل الأغراض وخلي السيارة فاضية بمعنى الكلمة ،، حتى تاير الإحتياط طلعيه ،،تخلصي من القمامة – أعزكم الله – وبعدين قسمي الأغراض الموجودة إلى مجموعات:
 الصيانة والسلامة:الصيانة في الدبة (كل الأغراض الخاصة بصيانة السيارة ما عدى الكتيب الخاص بتشغيل السيارة دائما وأبدا أحتفظي فيه في السدة الأمامية .. هو المرجع الرئيسي والأساسي للموتر).

 ألعاب الأطفال: إذا كورة أو تنس مثل ما ذكرت في السلة وراء في الدبة.وإذا ألعاب تركيب في مخبا السيارة وراء الكرسي.

 والأشياء الثانية كل وحدة وعلى حسب ظروف أستخدام السيارة.أنا أحط الأغراض لي محتاجة تبديل أو لازم أتخلص منها جدام على الكرسي لي جنب السائق علشان أتذكر وما أتكاسل وأٌقول : الحين وين فيه أفج الدبه وأظهر الأغراض .. حشى مب دبة كنها سفر… هههههههه.

 بعد ما نخلص ترتيب السيارة من الداخل ،، يفضل أخذها لمحطة غسيل السيارات وطلب تنظيف كامل بالبخار من الداخل والخارج … تطلع سيارة معاريس،ولكن إذا تعذر ذلك فنبدا النتظيف من الداخل وإلى الخارج ،، ممكن تنظفون السيارة في البيت خلال الإجازة والكل يشارك .. قبل كنا نلعب بالماي وننسى الموتر ههههههه .حلو إن يكون عندج بروش ومكرافه صغيرة في الدبة ،، تنفع للتنظيف السريع.

 حاولي بقدر الإمكان إنج إدخنين السيارة بلبان أو عود خشب ( مب معطر لأن الزيوت تتطاير وتترك أثر مب حلو وخصوصا على الجلد). وطريقة الدخون تكون بإنج تقبضين المدخن بيديج وما تحطينه على السيت حتى لو لحظة .. أو ممكن تعطرين بكل بساطة.وفي حركة حلوة ممكن تسوينها .. تعرفون البودرة لي نرشها على السجاد ولها ريحة تجنن .. نثروها على السيدتات وتحت شويه بس وبعدين بالمكنسة الكهربائية نظفوا السيارة وريحتها بتكون مثل ريحة غرف نوم المعاريس .. عقبال ما شوف البنوتات الحلوات معرسات .. يا رب 

 بعض الأحيان تكون السيارة هي بيتج الثاني ،، تقضين فيها وقت وايد بحكم الشغل أو المشاوير ،، أنا أستغل وقت الجامعة لأن الدرب طويل فأسمع دكتوري العزيز صلاح الراشد على طول الدرب ..فالناس لي تحب تسمع موسيقى ،محاضرات،قرآن على شكل أشرطة أو سيديهات ،، تخلصي من العلب البلاستيكية ( الغطاء) وخذي حافظة أقراص صغيرة في العرض ولكن تحمل عدد كبير من الأقراص ورتبيهن على حسب السهولة بالنسبة لج.وكذلك الأشرطة في إلها حافظة على شكل شنطة ومقسمة من الداخل.
بسأل وجاوبن بصراحة:تعرفين المبلغ الموجود حاليا في سيارتج؟؟ومكان الخردة؟؟
أنا أسأل لأني مريت بنفس التجربة،، قبل لا أنسى بكتب طريقة وايد نفعتني ،، إذا في مجال إحتفظي بمبلغ بسيط 50-100 في السيارة وخشي المبلغ في دفتر السيارة ( المانويل) للضرورة .. أحيانا تقصرين على الدرب .نرجع للسؤال،،أول شئ قرري شو بتستخدمين للخردة في السيارة،، ممكن حصالة صغيرة برقم سري،، علبة تنفتح وتتسكر بسهولة ،، حصالة من الطين صغيرة ،،كوب جديم بس شكلة مرتب ممكن تحطين فيه الخردة وهذه وايد تنفعنا وخصوصا للمواقف .. يا ما حصت أدور حد يخردلي عسب الموقف  وأهم شئ حق الكرك .. ما يوز تخردين 100 عسب 2 .ولا شو رايكن بنات؟؟
أنا عندي مثل السلة من الجلد وشكلها حلو بس ما تتسكر ممكن تحطين فيها الموبايل أو الخردة وعلشان ما أظلم الخدم بس أحتفظ بخمس دراهم خردة.

وضع بعض القوانين علشان نضبط الترتيب في السيارة:
1. يفضل دائما وأبدا عدم تناول الطعام في السيارة ،، وخصوصا إلي عندهم أطفال،، بس إذا حكمت الظروف أو حابين تغيرون جو شوي وتاكلون شوارما في الموتر ههههههه ما عليه ،بشرط التخلص من باقي الأكل والأدوات مثل الصحون،الأكواب،الشوك وحتى منقاش الأسنان بعد الإنتهاء منه وذلك بوضع المخلفات – عزكم الله- في كيس بلاستيك ورميه في أقرب سلة مهملات.

2. تهوية السيارة بعد الأكل ،، لأن ريحة الأكل داخل السيارة تكون صعبة وخصوصا إذا المكيف يشتغل وتركنا الموضوع لثاني يوم ،، أكيد مريتن بهذه التجربة ،، شئ أبدا غير مريح وخصوصا الصبح الواحد طالع للمدرسة أو الدوام فلابد من العناية.

3. يفضل الإحتفاظ بكيس بلاستيك ( مثل أكياس الجمعية أو الكيس الأزرق العادي ) في سدة السيارة وخصوصا للي عندهم أطفال ( أرجوا وضع الكيس في السدة وليس تحت السيت أو دعسه في الجوانب ،، لأن الأطفال الله يحفظهم يحبون يبحثون في كل مكان وممكن البلاستيك يكون مؤذي وخطير في بعض الأحيان ،، فالرجاء الإنتباه.
4. وقت الذهاب للتنزه وخصوصا البحر ،، ممكن تاخذين دبة المسافي أو أي غرشة بلاستيك وتعبينها ماء عادي وبعد ما يركبون الصغار والكبار كذلك وتكون ريولهم برع ،، تصبين الماي وتغسلين ريولهم بهذه الطريقة وايد بتوفرين في تنظيف السيارة لأن رمل البحر صعب ( عنيد يحب يتلصق بالأوادم).

5. في دبة السيارة إحتفظي بعدد سلتين ،، وحدة للأغراض لي دائما تحتاجينها في طلعات الأطفال مثل : الكرة ،الريشة،التنس ،…الخ.والسلة الثانية للأغراض لي تشترينها سواء من الجمعية أو المول ،، بنات بهذه الطريقة الأغراض ما تضيع ،، صارت ويايه أكثر من مرة إن كريم أو روج يطيح من الكيس وأنا أتخشش تحت الأسيات أدور،،ممكن تحطين جوتي الرياضة في هذه السلة.وبالنسبة للناس لي يستخدمون نفس السيارة لمقاضي البيت وخصوصا السمك : في بوكس من الفلين الأبيض مثل الثلاجة تحطين فيه السمك وله كفر وما يطلع ريحة ويحافظ على نظافة السيارة وتقدرين تستخدمينة أكثر من مرة .. عادي ينغسل ويتنشف.

6. احتفظي بمناديل مبلولة مثل ديتول أو أي شركة أخرى ،، بصراحة خطيرة في التنظيف تقريبا تنفع لكل شئ.

7. إذا عندج شنطة الإسعافات الأولية خير وبركة ،، حطيها في أبرد مكان في السيارة وما تكون في مكان مكشوف وكذلك العطر ما نعرضه للشمس بقدر الإمكان.وإذا ما عندج ممكن بكل بساطة تحطين مناديل ديتول ولصق جروح عادي وإن شاءالله ما تحتاجونهن ابدا.

8.
بعض البنات يلبسن كعب بس ما يقدرن يسوقن السيارة بالكعب،، نصيحة لله يا بنات الصحة والسلامة أولا وأخيرا،، أنا ألبس كعب وأسوق عادي،بشرط إن النعال –اعزكم الله-له ربطة من الخلف يعني ريولي ما تطلع وقت ما أقود السيارة ،، وإذا النعال –أعزكم الله – مفتوح من الخلف ،،شو تسوين يا راعبي؟؟؟ بكل بساطة ألبس شبشب محترم .. وأول ما أوصل المكان المقصود أبدل نعولي … إختي تتضايق من هالحركة ،، المهم إني أنا مرتاحة منها وأسوق الموتر على راحتي ..

9. ما في داعي تمسكين الموبايل وإنتي تسوقين السيارة ،، حطي السماعة و الموبايل حطيه على جنب في باب السيارة ،، يكون له مثل الجيب هو الأفضل.وهذا ممكن يتفصل في محلات زينة السيارات وما يكلف ،، أنا خليت أخويه يفصل لي واحد وأحط الموبايل أول ما أركب الموتر.

والسموحة على التقصير … حبيت أنزل الموضوع عل وعسى يستفيد أحد منه وباجر بإذن الله بنزل بعض الصور التوضيحية.