كيكه روح الاتحــاد @ من ابداعاتــي

السلام عليكم ورحمه الله وبركاته

قصتي مع كيـكه روح الاتحــاد ..
وصلنا فاكس بالدوام من مؤسسه حكوميـه مسوين معرض ومسـابقه حلويات لليوم الوطني 40
فحبيت اشارك وياهم وشاركت بطبيقين ,,
سويت كيكه عليها شعار روح الاتحــاد ,,
والحمد لله ما فزت بالمسـابقه ,,

الكيكه لذيذه وهشـه وتذوب بالحـلج ,,
ومجربه من كتاب اجنبي اخذت الطريـقه ,,

بسم الله نبـدأ

المقـــاديــر :

1 بيضة
ملعقه فانيليا
ثلاثة أرباع كوب سكر
كوب ونصف دقيق
رشة ملح
ثلاثة أرباع كوب ماء
ثلث كوب زيت
2 ملعقة صغيرة خل (ضروري)
ملعقتين حليب بودرة
1 ملعقة كبيرة بيكنج باودر
1 ملعقة صغيرة بيكربونات صودا
4 ملاعق كبيرة كاكاو بودرة

الطــريقه :

في وعاء بنحط البيضه + الفانيلا + السـكر ونخفقها

نضيف عليها الزيت ونخفق .. وبعدها نضيف الحليب البودر ..

ضفت اهني الشوكولاته البودر مع ملعقه الخل وكميـه من الماي ,,

الكل بيسـالني ليش اخترت الخل في هالكــيكه ,, الخل مع البكنج صودا يتفاعلون ,, ويسون انتفاخ للكيـكه مش طبيعي ,, بس نحاول ان ما نكثر الكميه اللي مذكوره لاني كثرتها ممكن تخلي الكيكه طعمها مر ..
الكميـه اللي ذكرتها مناسبه للخليط ,, وتعطيه انتفاخ مناسب مع نعومه وهشااشه ..

نجهز الطحــين ونحط عليه البكنج صودا + رشه الملح + البكنج بودر ونبدا نحط الكميـه على الخليط ونخفق بدرجه متوسـطه مع اضافه كميه الماء ,, بالتدريج حتى انتهاء الكميـه ,,

اهني انتهيت من الخليــط .. وصار جاهز للخبـز

يبت صينيه مستطيله ,, وبطنتها بورق الزبده ,,

صبيت الخليط فيها ,,والى الفرن على درجه حرااره 280 درجه ولمده تقريبا نص ساعه ,, وبعد النص ساعه من وجودها بالفرن حبيت اتاكد اذا الخليط جهز ولا لا فغرزت عود خشب عشان اتاكد انها ناشفه ^^

الحمد لله صارت جاهز ,, وطلعتها من الفرن وخليتها تبرد لمده 10 دقايق ,, ولين ما تبرد جهزت الكـريمـه ,,

جوفوا الصوره اهني كيـف منتفخـه وطعمها يمي يمي ,, وهشـه من الخاطر .. تذوب بالحلج

يتــبع ,,,,

في هالاثناء جهزت كريمه الزبده وسامحوني لاني نسيت اصورهــا

اللي بنحتاجه للكـريمه :

2كوب زبدة طريه بحراره الغرفه = 4 اصابع زبده (100 جرام)

كيـلو سـكر بودر ( 1000 جرام )

1/3 كوب كريمة الخفق ماكتوب او كريمة خفق غير محلاه

1/4 كوب شورتنج (سمن نباتي)

الطريقه في انـاء بنحط الزبده والشورتنج ونخفقه ,, وبعدها نضيف السكر بالتدريج وفي الاخير نضيف الكريمـه ,, لازم تكون الكريمه مش جامده وايد ولا سايحـه وايد يعني حـلوه للتزيـن ,,

اهني حضرت الكيـكه وحشـيتها بنفس الكريمـه وغطيتها بطبقه خفيفه من كريمه الزبده ,, وحطيتها بالثلاجه لمده نصف ساعه تقريبا

لحد ما تعدي النصف ساعه .. كنت مجهزه قبل عجينه الايسنج للفرد
الله يذكرها بالخيـر الاخت لطيـفه ( شو كولاته UAE)

هذا رابط الموضوع الاصلي ,,

قسمت العجيـنه لـ 4 اقسام ولونتها بالوان علم الامارات

وبما ان الكيـكه مربعه فأحتاج الى 4 جهات للعلم ,,

فرشت ورقه زبده ,, ورقيت العجيـن ,, بشكل علم الامارات ^^

واهني بعد النصف ساعه طلعتها وغطيتها بالكريمه مره ثانيه بس هالمره الطبقه سميتكه اشوي ,, لاحضوا في الصوره اللي فوق كانت مبينه انها خفيفه بس في الطبقه الثانيه لازم تكون كثيفه اشوي ,,

وبديت ارض العجيـن باطراف الكيكه ,, من الجوانب ,,

انتهيـنا من الجوانب ,,

في كيس التزين حطيت الوان علم الامارات استخدمت اعواد الخشب ,,
عشـان يعطيني دمج الوان بالكـريمه للتزيـن ,, وعبيت الكيس بالكريـما

الحـركـه الاخيـره اللي سويتها اهيه ..
شعار روح الامــارات سويته على الورد وطبعته ,, وغلفته حراريـا ,,
بس نتأكد من نظافه الورقه قبل كل شيء ,,

وحطيتها على ويـه الكيــكه وزينت اطرافها بنفس الحركــه

وصـارت الكيــكه ,, بالشـكل هذا ,,

اشويه الكريمه ذابت عني ,, مع اني كنت اغسل ايدي بالثلج وانا ازين الكيـكه عشان ما تذوب بس ما حبيت اخربها وكملتها ,,

نراعي ان المكـان لازم يكون بارد حتى الادوات اللي نستخدمها لازم تكون مجمده ,,

وبحمد لله ,, خلصت قصتي مع الكــيكه

واكثر ما استانست فيه اني فزت بالمسـابقه

وراح اطرح الموضوع الثاني للبسكويت اللي فزت فيه ,,

اذا عجبكم موضوعي ادعولي الله ايسر لي اموري ويحقق لي اللي في بالي ,,

واي استفسار حاضرين ,,

اختكم

تريزووور

سلمت يمناج اكثر من رووووووووووووعه ماشاء الله تبارك الله

مابتسوين لي شراتها؟