لاعت جبدي من هالأشكال

بنات انا عندي مشكله ماعرف شقايل احلها …

من فتره يمكن 3 شهور .. كنت سايره البنك .. وانا طالعه شفت وحده من الجنسيه العربيه ..

يتني وقالتي ممكن توصليني لهالمكان .. الجو حر وانا حرمه كبيره .. المهم انا كسرت خاطري وقلتلها

اوكي اركبي .. وصلتلها المكان اللي تباه .. ويوم كانت في السياره كانت تقوللي اذا تعرفين وحده تبا وحده تساعدها في البيت من طباخ او تدريس اولاد وخبريها عني .. قلتلها ان شاء الله ولا يهمج .. وبعدين قالتلي انزين عطيني رقمج عشان نتواصل ..

وانا من الربكه ومن غبائي عطيتها الرقم و مبلغ بسيط ..

نزلت الحرمه من السياره و سرت الدوام ..

ومن يومها .. اففففففففففف دوم ادق لي تقوللي شو حصلتيلي وحده اشتغل عندها .. اقولها رقمج عندي اول ما احصلج وحده انا بدق لج ..

المهم .. بعد شهر تقريبا .. دقت مره ثانيه .. قالتلي تبا ملابس جديمه .. قلتلها ان شاء الله و عطيتها ..

وبعدين من شهر اشوف ارقام اتييني غريبه .. وكلهم من ناس محتاجين مساعدات ..

البارحه دق تلفوني ويوم رديت تطلعلي وحده من نفس الجنسيه تقوللي فلانه عطتني رقمج و تقول انج انسانه طيووبه و تحبين تساعدين .. وانا ابا ماكينه خياطه ب 800 درهم ممكن اتساعديني فيها ..

عااااااااااااد انا منيه فولت .. قلتلها .. اذا ابا اساعد حد بساعد من نفسي .. ما ابا حد يطلبني وتتشرطين بعد .. وصكرت التلفون ..

والله انا معصبه من هالاشكال .. يخلون الواحد يفكر مليون مره يساعد احد هاللأيام ..

لاعت جبدي كل يوم داقتلي وحده تباني اساعدها .. شوشايفيني ؟؟ يالسه على بنك ولا شو؟؟

مليت من الاتصالات اللي مالها معنى .. ولا تقولولي غيري رقمج .. مابا اغيره بسبت هالأشكال ..