للكســـــــــولات الباحثات عن الجمـــــــــــال . موضوع لعيــــــونكم

عاد أنا ضربت الرقم القياسي في الكسل من ربيت…….. بس مادري شو ياني يمكن صحوة نفس وقلت يا بنت الناس اطالعي بشرتج اشقايل اندمرت وانتي ولا بهمه لازم تسوين شي

بصراحه غرت من اللي حوالي ما شاء الله عليهن الله يحفظهن كل وحده بشرتها أحلى من الثانيه وهن أكبر عني بوايد وأنا اللي في عز شبابي هامله نفسي بسبب الكسل!!!!!!

عسب جيه سويت انقلاب على عمري من راسي ليييييييييييييييييييييين ريولي وقلت لازم العيد يكون عيدين وافرح ريلي فديته لأنه مل من كثر مايعطيني في الويه وأنا ماشي احساس

مب مني الكسل ذابحني شسوي؟؟؟؟؟؟ المهم………….

بديت بكورس لشعري وبشرتي وجسمي

أول كورس بخبركم عنه اللي استخدمه لبشرتي لأن هذا أول شي بينت نتيجته وعقب إن شاء الله بخبركم بنتايج الكورسات الباقيه…….. لا تزيغون من كلمة كورس ترا بالنسبه للبنات اللي لهم بارض حق الخلطات ولا شي ما شاء الله عليهن

بسم الله نبدأ:::

الصبح:

1- امسح ويهي باسكينول وعقب اغسله بصابونه البابايا (ترس في الجمعيه وأنواع اشكثر)
2- احط تونر من سيباميد (بصراحه وايد احب استخدم منتجاتهم ومريحتني)
3- احط لوشن من ماركة HR اسمه HYDRA GENIUS للبشره الجافه والمختلطه يخلي البشره رطبه طول الوقت كلمة روووووووعه شويه عليه…….. (كل ما اتوضا احط منه)

بالليل:

1- امسح ويهي بالاسكينول واغسله بصابونة البابايا
2- امرر على ويهي مكعبات ثلج من حليب رينبو (مخلتنهم عندي في ثلاجة الغرفه عسب ما اتعايز خخخخخخ) واتريا لين ماينشف الحليب
3- عقب ماينشف الحليب (بتحسين البشره انشدت) احط قشطه أي نوع على ويهي واخليها لين ماتنشف (بعد مخلتنها عندي في الغرفه)
4- اغسل ويهي بماي عادي عقب امسح عليه بماي ورد بارد واخليه لين مايجف روحه ما امثه بفوده ولا بكلينكس
5- عقب ماينشف ويهي احط تونر
6- احط ع ويهي كريم الدوكين فورت ويا رتن ايه مخلوطين ويا بعض (خلطتهم في غرشه وحده وفكيت عمري)
7- احط على رموشي زيت لوز ويا كبسولات فيتامين E

وسلامتكــــــــــم

ترا البرنامج واااااااااااااااااايد سهل والسوالف اللي احطها فالليل احطها وأنا مجابله النت والله ما احس بالوقت

النتيجه شووووووو يا حلاوااااااااااات؟؟
بشره مشدوده وبيضا وخدود مورده………… بالنسبه للصفاء بشرتي وااااااايد تحسنت بس ماقول إن لون بشرتي صار واحد لأني أعاني من كلف بسيط بسبب الحمل وباقي لين الحين بس الحمد لله خف واااااااايد وفتح لوني واااااااايد

النتيجه تبان خلال 3 أيام تقريبا ومن أول يوم بتحسون بالفرق وبتستانسون وبتكملون… أنا باديه بهالكورس من 3 أسابيع تقريبا ولين الحين مستمره عليه… بس جريب بوقف استخدام الدوكين فورت لأن اللي اعرفه إن كثرته مب زينه

ملاحظه: زيت اللوز ويا كبسولات فيتامين E مابينت نتيجتهم لين الحين لأني توني بديت من كمن يوم

إن شاء الله أكون افدتكم ومابغي منكم إلا دعوة بظهر الغيب إن الله يسر أموري
وإن شاء الله من تبين نتيجة الكورس اللي استخدمه حق جسمي بنزلكم موضوع يديد