ولدي يالس في امان الله وفي حصه معينه غيرو اماكنهم ويلسوهم قروبات
عقب الحصه قام الطالب ( اصلا ما ايلس عدال ولدي وهوه عدواني ) وتهجم على ولدي وعضاه في معصم اديه عضه قويه حتلى ربعه خلصوه
اتصلو فيه المدرسه عقب ما حطو جريب الساعه ثلج اديه كانت وارمه عند المعصم
وشاق اديه من قوة العضه
المشرفه قالت انا بعاقبه وبحرمه ثاني يوم من دخول الفصل يعني يعزلونه في غرفه بروحه
ويعطونه مهام
طلبت منها رقم اهله رفضت
قلت لها انتي اتصلي فيهم قلت انزين
هذا كان بالاربعاء
بالخميس نهاية الدوام رمستيها وقالت انها ما اتصلت بهله وخلاص جذه خذ عقابه
انا ما اقتنعت بصراحه
الولد ما اتعاقب عقاب يخوفه انه يكرر هالشي اخافه يرد يضرب ولدي وعارفه ولدي ما يضرب
مب المفروض
انها تطلب امه او ابوه وانا اكون متواجده والولد وولدي ومفروض اهله يرمسونه
وجدامي ويحذرونه من انه يكرر هالشي
شو رايكم
نويت بالاحد ارفض ولدي يدخل الصف الا يطلبون ولي امر الطالب اللي عض ولدي
ولين الحين اثر العضه موجود وواضح
وفيه شهود
خبروني شو اسوي
ارضى بس بعقاب المدرسه اللي سوه احرموه يدش الصف
والا اطلب ولي امره ويرمسونه عشان يخاف
؟؟؟؟؟
لازم أسيرين المدرسه
وأتشوفين طلاب في الصف وتسأليهم عن السبب هم بيجابون
ولو طلبتي ابوه او امه بعد بيتم صغير
ويمكن هذا الولد يتيم او ابوه قاسي او ماشي اهتمام بالبيت
حبيبتي مرة استوت لي نفس المشكلة
ولدي انضرب في المدرسة …. واصريت احضار ولي الامر
وطلع الولد يتيم الام ويت زوجة الاب وضربته قدامي
اقسم بالله اني بكيت على الياهل وندمت اني طلبت ولي الامر
وترجيت زوجة الاب تهده ………….. اه يا قلبي على الطفل
وتوقعي من الاولاد كل شي حبيبتي
انا كان هذا رايي بس هلي ورباعتي احتشرو عليه
اني لازم اييب امه او ابوه
خلاص بتوكل على الله وما بطلب حد من هله
وانا طلبت من المشرفه
تصالحهم
هيه قالت بتصالحهم يوم الاحد
^^ الله يهديهم يارب يتمون صغاريه
والله اني ضحكت على الموقف لانه صار لي العكس خخخ
خيييير عن تتحرين ولدي اللي عاض ولدج لااا خخخ
شوفي الغاليه أولا ما ذكرتيلنا جم عمر ولدج ؟؟؟
أنا بخبرج بموقف صار لي مع ولدي الله يحفظه .. ولدي شيطون اشوي الله يصلحه ان شاء الله ..
في البيت و في وجودي ما يضارب بس اذا غبت ممكن يتضارب مع عيال عمه بس ضرابه عاديه يعني ما تسبب أي عاهات أو شي … بس مره في المدرسه انصدمت انهم متصليين فيني وقالولي ولدج عاض ولد و نبغيكم تكلمونه وتنصحونه يودر هالطبع .. سألتهم شو هو السبب اللي خلاه يعض الولد قالوا بدون سبب !!
أنا انقهرت مع انه ولدي كي جي 1 بس بعد ما أبغيه يتعود يعض ربعه ولا أبغيه يضربهم ..
على طول شليييييييييييت عمري ورحت المدرسه لأني أبغي أحط حد لهالسالفه وما أبغيها تتكرر …
رحت وشفت الولد اللي هو عاضنه وشفت العضه معلمه في الولد فديته … والله غمظني …
و طبيعي أنا ما أرضى هالشي يصير في ولدي فما برضاه يصير في عيال غيري …
كلمت المعلمه وقالت لي انه بدون سبب جذه بس غضه .. ويوم سألت ولدي قال انه يغايظه و ولدي على طول ما شي تفاهم عضه .. المهم هزبته جدام المعلمه وقلت لها لاااااااااازم تعاقبينه انتي من يغلط وقفيه مده معينه كعقاب لانهم هم عندهم سياسه ممنوع عقاب الطفل و لا حتى يهزبونهم !!
أونه عسب ما يكره المدرسه .. المهم بعد ما اتفقت وياه على أسلوب عقاب يا دوري في البيت ..
أول شي سمعته محاضره طويله وعريضه وهو هناك اعتذر للمعلمه وفي البيت تم يبوسني ويقول آخر مره وما بسوي جي مره ثانيه بس بعد كنت مقهوووووره من الموقف وخليته يوقف نص ساعه بزاويه في الغرفه ..
و الحمدالله ما كررها من عقبها موووووووووول …
بس اللي استنتجته انه ولدي كان يقعد احذال واحد مشاغب و طبعا صار يقلده و هالموقف خلاني أكتشف هالشي وكلمت المعلمه وقلت لها ما أبغي ولدي يقعد احذال فلان وهي بروحها قالت لي صح هو يقلده !!
اليهال يحبون التقليد وينجذبون للشخصيات الفوضويه اكثر … فهالشي بعد المفروض المعلمه تتصرف به وما تخليهم يتمادون و تحاول تحط المشاغبين مفرقين مب مع بعض عسب ما يزيدون بعض …
باختصار عزيزتي أنا بقولج شي .. لو ولدج صغير وهم بعدهم ما يفهمون فحرام انتي تكبرين الموضوع ..
بس لازم المدرسه توصل هالشي لأهله علشان يعالجون الموضوع ويتابعون ولدهم ويعرفون هو شو يسوي في المدرسه عسب ينصحونه ويكلمونه في البيت و منها الياهل اصلا بيخاف لو درى انه فضايحه بتوصل للبيت.. بس مب حلوه انج تتواصلين ويا أهل الياهل انتي وتحتشرين وياهم ترى هو ياهل و ما تدرين شو نظرة الأهل يمكن يتضايجون منج أو انهم ما بيتقبلون الموضوع أو بيطنشون أو غيره بس اذا يت من المدرسه بيكون شي ثاني …
و الله يحفظ لج ولدج بس علميه يدافع عن نفسه اذا حد ضربه لازم يضربه عسب اليهال ما يستقوون عليه ^^
و السموحه طولت عليج ^^