والله انا سالفتي سالفه… الله يسلمكم انا مثلي مثل أي وحده عندها صديقات من ايام الروضه…
وهاي البنت تمت تدرس وياي فنفس المدرسه لين ايام الثانويه… وخلال ايام الدراسه من الابتدائي لين اول اعدادي كانت وياي بنفس الصف.. لكن بعد هالمرحله انتقلت لصف ثاني…
كانت علاقتي وياها زينه .. بس ما اقولكم ووايد وايد ماخذين على بعض.. كانت في حدود لصداقتنا… واللي اتذكره انها كانت دايما تحط اللوم علي لاني وايد حساسه ومن ادنات الشي ازعل.. بس هذا كان طبعي…
ومن عقب ثالث اعدادي صرنا وكأنه ما نعرف بعض.. وما اعرف اذا مني او منها.. بس احس انها كانت تتهرب مني…
والمشكله اني كنت احب هالبنت واااايد ما تتخيلون لاي درجه… ومتى اخرمره سلمت عليها؟؟!!!!
في حفلة تخرجنا من الثانويه العامه… وقالتلي لاتقاطعيني وخليني على بالجٍ… انا استانست بها الكلمتين.. وبعد نتايج الثانويه دقيتلها وباركتلها.. ونفس الشي قالتلي لا تقاطعيني .. قلتلها انتي بعد تعرفين رقمي واتمنى ادقين اطمنيني عليج…
كل واحد منا راح بطريق.. هيه فجامعه وانا فجامعه ثانيه… وفي اخر سنه دراسيه وفي فترة تدريبي.. شفت امها وعرفتني وكنت اوصللها السلام.. وبعد فتره طلبت رقم موبايلي وما تتخيلون اشكثر طرت من الفرحه وكنت اتريا اتصالها على أحر من الجمر.. لكن ما اتصلت 
وخلصت دراستي وعزمتها على عرسي بس ما يت….. وحصلت رقم موبايلها واطرشلها مسجات بين فتره وفتره بس يالله ياللله ترد…
اكيد بتقووولووون شو نسوي..؟؟؟
المشكله خواتي اني مب قادره انسى هالبنت او اشيلها من بالي… وااايد احبها وااااااايد (لايروح بالكم بعيد.. احبها مثل اختي واكثر) ودايما اشوفها باحلامي …
ما اقدر اتصللها و اكلمها.. لاني مااحب افرض نفسي على حد…
شو اسوي… بشو تنصحوني…
احسدها انها عندها ربيعة شراتج بس يمكن ما عندها وقت ومشغولة في بيتها وعيالها او دراستها …
والله حبيبتي هب عيب انج ادقين عليها
السموحه يعني اذا هي مافيها خير وهانت عشرة العمر اللي بينكم,,,,
خلج انتي احسن عنها لا تحسبينها من ناحية افرض نفسي عليها او على غيرها مابين الربع والخوات هالكلام
ومثل ما يقولون مااتهون العشره الا على ……………..؟!؟!؟
والسموحه ع الكلام ممكن يضايق بص هاي النصيحه من وجهة نظري
لوكل مشكوره اختي على مرورج… وصدق هالايام ما تحصلين وحده قلبها على ربيعاتها مثلي 
المهم مايتم شي فخاطرج ؛)
تحيتي لج سيس