سافرت انا وزوجي والشغاله وبنتين عمرهم 3 سنوات وسنه
ورتبت رحلتي كالتلي
اول يوم :سيلانجور في صن واي بيرميد
3 أيام : رحنا بالطيران الداخلي الى جزيرة بيننج
6 أيام : كوالالمبور
ببين لكم عدت امور
كثير من البنات يقولون روحوا صن واي لاقون وهذا اصلا اسم فندق مو مدينه
صن واي لاقون موجود في ولاية سلانجور وكوالالمبور جزء منها
بالنسبه لكوالالمبور وبما اني كنت عندي بنات صغار سكنت في تايم سكوير والي يميز هال الفندق ان في مول ضخم وفي ملاهي في الطابق الاخير تقدرين تاخذين تذكرة بس عند الدخول
وتستخدمينها طول اليوم ممكن تتمشون في المول وتردون الالعاب عادي التذكرة مفتوحه لج خلال اليوم كامل ،،،
كوالالمبور :
1. حديقة الطيور ( الحديقة جدا ضخمة ويستانس فيها اليهال الطيور مفتوح عليهم وتقدرين تتصورين وياهم )
2. مقابلها حديقة الفراشات (حلوه بس حديقة الفراشات الي في جزيرة بيننج فيها فراشات اكثر )
3.مرتفعات جنتج ( طلعنا الصبح للحديقة الجو فيها بارد وروعه وتصعدين لها بالتلفريك
العاب للكبار والصغار وفيها مول كبير والعابها خارجيه وداخليه في المول وتذكرة الدخول تختارين تبين الالعاب الخارجيه أو الخارجيه والداخلية ،، تاخذين للعيال جاكتات لانه برد
والسحاب تشوفينه يمر عليج سبحان الله كانج داخله )
4.المتحف الاسلامي
5.رحلة في البحيرة
6.زيارة البرجين التوأم (فيه مول كبير للماركات ، ومطعم لبناني في الطابخ الاخير )
7.المنارة.
8.ملاهي ماينز + سوق الماينز وهو سوق متوسط المستوى
9.شارع العرب كلها مولات بس زحمه ما حبيت اسكن فيه لان عندي عربيات البنات صعب اتحرك فيه فحبيت اسكن في التايم سكوير من الفندق الي سكناه نقدر نروح مشي لشارع العرب اقل من 10 دقايق
** من الفندق نشوف من الغرفة البرجين التوأم والمنارة .
بين سيلانجور و كوالالمبور ما في مسافه طويله تقريبا ساعة الا ربع بس المناظر الطبيعية تخليج ما تضايقين من الطريق .
** الحديقه المائية في فندق صن واي لاقون وعداله فندق صن واي بايرميد فيه مول كبير
————————————–
جزيرة بيننج
1.حديقة الفراشات
2.حديقة القرود (بس تمشي فيها قرود في كل مكان احس وقت تروحينها العصر لانها كبيره يتعبون اليهال)
3.حديقه الفواكه (وايد حلوه على جبل يعطونج جولة في الحديقه وبعدين تاكلين بوفيه فواكه وعصير )
4.متحف الالعاب (هو متحف صغير يضم تماثيل للالعاب ،، ما يستاهل الزيارة كثير اذا كانوا عيالج صغار وايد ما يفهمون )
5.حديقة الطيور (ما انصحج فيها قديمه وما فيها طيور وايده ما تقارن بحديقه كوالالمبور)
6.المولات (مو حافظه اسمها بس الدريول ممكن يوديج ، قصيت شعري في صالون عندهم روعه القصه يقصون بالموس )
7. السوق الليلي (مقابل الفندق الي سكنى فيها مال الماركات التقليد )
** سكنا بالهوليدي ان كان حلو يطل على البحر وفيها احصنه تدليك بارشوت دراجات
8. الهضبه (تطلعون فوق بواسطه قطار صغير بس زحمه وبناتي تمن يصيحن من الزحمه وكنا واقفين ما ارتحت فيها ولو ان المكان فوق حلو بس مع العيال تضايقت ،، اعتقد احسن شي تروحون لها من بدري الصبح قبل الزحمه )
9.حديقه التوابل (جدا روعه والتوابل طبيعيه عيبني المكان ،هي مثل مزرعه على تله صغيره
اخر الهضبه كوفي يطل على البحر انصحج تشترين الزيوت العطريه للمساج لانه طبيعي وريحته روعه )
لا تنسون تاخذون مظلات لان المطر يا ينزل اول الصبح او نهاية اليوم فكوني جاهزة
بحاول احط صور بكره واي استفسار انا حاضرة
بالنسبه للصرف انا حجزت الطيران عن طريق موقع الاتحاد للطيران
والفنادق حجزتها عن طريق موقع دليل ماليزيا ، واتصلت على الفنادق قبل السفر لتاكيد الحجز
اسعارهم معقوله جدا ،،، تقريبا نفس الامارات
*** السواقين ممكن تتفاهمين وياهم ياخذون على الساعة 25 رنجت يعني تقريبا 150 او 120 لليوم كامل يمشيج ..
إن شاء الله الخوات يستفيدون
بس ياريت تخبرينا كيف تعاملتي مع العيال خصوصا في الطيارة وهناك أثناء التنقل وأكل الصغار
من خبرتج….
وحجزنا في جنتنغ اول 3 ايام
وعقب بنسير سن واي لاقون وعقب كوالالمبور
وما اني حامل ما قدرت اسير الجزر
ان شاء الله بعد ما اربي بسير ويا بناتي
ومتخبلة على جو جنتنغ وااايد انا ادور البرد
وباجر بسير آخذ لحمده لبس شتوي هذا اذا لقيت لووول
وان شاء الله نستانس فالرحله
لبنتج بس اشتري لها جاكيت مو من النوع الضخم زياده ، بناطيل جينز جوتي
حاولي تاخذين سكارف من النوع الصوف لانج حامل اخاف تتعبين ،، يبيعون عندهم
سكارفات صوف
المشاركة الأصلية كتبت بواسطة ريشة 
إن شاء الله الخوات يستفيدون
بس ياريت تخبرينا كيف تعاملتي مع العيال خصوصا في الطيارة وهناك أثناء التنقل وأكل الصغار
من خبرتج….
بالنسبه للطيارة حجزت طيارة روحه ورده بالليل فالحمد لله كانوا راقدين
بالنسبه للتنقل شريت عربانه خفيفه من مذر كير للسفر وتقدرين تركبين من ورا مثل ستاند
يوقف عليه الياهل الاكبر عشان ما يتعب من المشي
اما الاكل فكنت اشتري من السوبر ماركت للريوق حليب خبر وجبن ،، وعصاير
الاشياء الخفيفه وكل الاماكن الي نتمشى فيها يكون فيها كوفيهات او بقالات اقدر اشتري لهم منها مرات كوكيز او كروسون ،،،
والغدا والعشاء عادي اطلب لهم ويانا عيش او بطاطا مهروسه لان العيش اكثر وجبهاتهم هي والخضار ،،،
كوالالمبور كان اسهل لي بالنسبه للاكل من بيننج لاني الفندق الي سكنت فيه تايمز سكوير كان فيه سوبر ماركت كبير فيه كل شي ،،،