كثير أمهات يترددن مايعرفن متى يبتدن يدخلن أكل للبيبي
حد يقول الرابع…
حد يقول السادس…
حد قبل الرابع بعد…
حاليا كثير دكاترة ينصحون بتأخير الأكل عشان سمنة الاطفال المنتشرة،، لكن بعد صراحة الطفل بيجوع اذا اعتمدتي بس على الحليب وبتضطرين تشربينه حليب اكثر عن حاجته وبعد بيسبب سمنة فظيعة خاصة الرضعات الصناعية
بنقل لكم كلام دكتورة عيالي شو قالت لي بالضبط (اللي بالاحمر) وأنا بزيد بالشرح،، طبعا شرحي معتمد على كتب دكاترة متخصصة في اكل الرضع ومن خبرتي وخبرة امهات انا جربتها مع عيالي الله يحفظهم:
1- الجهاز الهضمي للطفل مكتمل قبل ولادته،، يكون غذاءه حليب الام فقط واذا ماتقدر الام حليب رضع صناعي
2- الانزيمات المسؤولة عن هضم الطعام في الجهاز الهضمي تكتمل عند بلوغ الطفل شهرين او شهرين ونص،، دليله خروج لعاب الطفل من فمه،، في هذي المرحلة ممكن ادخال الاغذية البسيطةفي الهضم مرة يومياً(قد فنجان قهوة صغير) واللي ماتثير حساسية ويكون قوامه لين مثل: ارز الاطفال، التمر المنقوع في ماء ساخن ربع ساعة ومصفى بمصفاة ناعمة،، الجزر المقشر والمسلوق والمهروس بالخلاط، موزة مقشرة ومهروسة بالشوكة لين تسير سايلة،، تعطين الطفل نص رضعته او اقل عقب الوجبة عقب تكملين له رضعة الحليب
من الشهر الرابع ممكن تدخلين وجبتين باليوم(كل وجبة قد فنجان قهوة صغير) وادخال خضروات جديدة مثل الكوسى، البطاط، البطاطا الحلوة، البصل الاخضر المطبوخ مع ارز مصري، تفاحة مقشرة ومسلوقة ومهروسة ونفس الشي كمثرى ، افوكادو ناضجة تهرسينها مع شوية حليب، وضروري ادخال الماء مع كل وجبة في هذي المرحلة،، يعني عطيه وجبة وشربيه ماي من زجاجة الرضاعة
3- بطانة المعدة المسؤولة عن هضم اللحوم والدجاج والسمك والبقوليات تكتمل في الشهر السابع
بس يفضل الابتداء بالدجاج والسمك وصفار البيض
والعصاير تدخل في هذي المرحلة بس مخففة بالماء مثل عصير التفاح وعصير الجزر وآخر شي يدخل عصير البرتقال والنسبة تكون ثلث عصير وثلثين ماء، استخدمي زجاجة الرضاعة الصغيرة مرة باليوم عشان ماتسببون سمنة للأطفال،،
وطبعاً ممكن ادخال منتجات القمح والشعير والشوفان (يحتوي على الجلوتين ممكن يسبب آلام حادة لبعض الاطفال قبل الشهر السادس) وانواع الفواكه المختلفة خاصة المشمش المجفف تنقعينه في الماي وتهرسينه يقوي الدم،، ويفضل تجنب الفراولة لانها ممكن تثير حساسية ومن الخضرة الطماطم النية و الباذنجان ممكن يثير حساسية،، ويكون قوام الأغذية من الشهر السادس اكثف بشوي،، يعني هرسي بالشوكة مب بالخلاط لين يسير مثل قوام الفول المدمس المهروس،، عشان يتعود الطفل على عملية البلع بعدين للمواد الصلبة، والكمية فنجان صغير لوجبة الفطور مع ماي،، نص كوب صغير لوجبة الغدا ولوجبة العشاء مع ماي طبعا،، والحليب بيسير 3 رضعات باليوم بس،، بالليل بعد الساعة عشر لاتعطينه حليب عطيه ماي بس لين الساعة 6 الصبح عطيه رضعة حليب
والشهر الثامن الى التاسع ادخال اللحوم الحمرا لانها اصعب في الهضم والأجبان والبقوليات لانها تسبب غازات غير محتملة للاطفال الاصغر وممكن ادخال حليب البقر في هذي الفترة بكميات بسيطة مع المهلبية والسيريلاك،، وممكن تقديم الطعام على شكل اصابع في مرحلة التسنين مثل اصابع الجبن اصابع الخيار المقشر اصابع الجزر المسلوق والخبز
5-عند اكمال الطفل السنة من عمره تكون كليتة اكثر قدرة على تحمل الملح،، هذي الفترة ممكن ادخال الملح والتوابل والسكر والعسل وبياض البيض وباقي المواد الغذائية اللي مادخلتيها قبل لانج خايفة من الحساسية في طعام الطفل،، عادي ياكل من اكل البيت,, والحليب مرتين باليوم 200 مل كل رضعة لحد عمر خمس سنوات
نصائح عامة:
كل صنف جديد تدخلينه للطفل انتظري عليه ثلاث ايام على الاقل قبل ادخال صنف جديد ثاني
بعد ماتتأكدين ان الاصناف اللي ادخلتيها للطفل ماتثير حساسية ممكن تمزجينهم مع بعض وتقدمينه للطفل
جنبي طفلج اي مادة غذائية تثير الحساسية في احد افراد العايلة لين يكمل الطفل السنة من عمره (تقريباً اغلب الحساسية تكون وراثية)
اي صنف غذائي جديد قدميه للطفل اول النهار لان الحساسية القاتلة ممكن تتأخر في الظهور لحد اكثر من 6 ساعات،، فتكون عندج فرصة ملاحضته في النهار وادخاله الطوارئ فوراً اذا لاحظتي عليه تنفخ او احمرار خاصة حول العينين والانف والفم إذا تأخرتي ممكن ينتفخ حول رقبته ويضغط على مجرى التنفس ويقطعه،، وبعض اعراض الحساسية تكون ابسط بظهور طفح جلدي او اسهال،، في هذي الحالات وقفي الصنف المثير للحساسية البسيطة لحد اكتمال الطفل السنة وللحساسية الشديدة لحد مايكتمل الطفل خمس سنوات وتقدمينه بكميات جداً بسيطة تتأكدين ماترجع له حساسية من هذا الصنف
ومشكورة على المعلومات القيمة
المشاركة الأصلية كتبت بواسطة مسحاريه 
العفو الغالية
عادي اختي تعتبر بنتج اربع شهور الله يحفظها
بس ابتدي معاها بالتدريج لان معدتها مب متعودة على الاكل
يعني ابتدي معاها اكل مرة باليوم في وسط رضعتها قد فنجان قهوة صغير من ارز الاطفال او تمر او جزر
بالتدرج اللي ذكرته في موضوعي
حاولي تجنبين الاكل الجاهز بس احتفظي بكمية منوعة عندج في البيت في حالات السفر او الطلعات او التكاسل تسخنين الجاهز وتعطينها بعد ماتتأكدين من حرارته وطعمه،، مرات يكون الطعم فاسد حتى لو العلبة او المغلف مسكر عدل،،
استخدمي الملاعق المخصصة لسنها يكون طرف الملعقة لين وينثني شوي
اول ملعقة لا تترسينها بس نص ملعقة وخليها تتذوق واحتمال كبير تطلع الاكل لانها بعدها ماتعرف تبلع بس عادي كملي عطيها وحاولي بالملعقة ماتخلين شي يطلع على حواف فمها
وكلنا نحرص على ان آلياهل يأكل على خفيف وبالتدريج
ودمتي بخير