متضايجه من دوامي

بدخل بصلب الموضوع
وبالنهايه باخذ النصائح بعين الاعتبار
السالفه يا اخواتي الحبيبات انه انا اداوم من سنتين وشي بشركه خاصه بالقسم ولا كاني اداوم .
ولاحد يتكلم معاي ولا يسولفون ولا يضحكون ولا شي
انا اتكلم عن البنات الموظفات
لانهم دايما يتيمعون ويسولفون ويتريقون وانا يسوولي طاااااااااف ولا حد يقولي تعالي ولا شي
كل البنات من جنسيات عربيه باستثناء وحده مواطنه والبن كود ملي عندها
المواطنه يايه من اكثر من ثلاث شهور
اما الثانيات يعرفون بعض لانهم مداومين قبلنا
فمره راحت تتريق معاهم وحطت صوره الريوق وكاتبه انه ريوق تايم بالدوام فتاجئت ؟ لا قالتلي تعالي ولا شي
ومره كان عندنا مناسبه بالدوام لليوم الثاني ، فحطت بالبلاك بيري صورت ايدها متحنايه ، قلت حق عمري وانا بعد بروح اتحنى لانها تحنت يعني نكون شرات بعض ، فيوم الثاني شافت ايدي متحنايه قالت شو تغارين مني ليش اتحنيت سرتي اتحنيتي ؟ قلتلها لا شفتج تحنيتي تحنيت!
انا بالقسم حالي حال نفسي اداوم اكمل شغلي واروح يعني ما اتكلم وايد ورايحه وراده شراتهم ومتيمعين ومسويين شله ويسولفون ويسولفون ويضحكون عادي وبصوت عالي والرياييل يسمعون .
وهالبنت قالتلي ليش ما تسولفين وايد اقولها مشغوله
وانا صدج مشغوله كله شغلي بالتارجيت
وهم يشتغلون شويه وبقيه اليوم سوالف
واذا طرشت برودكاست من الدوام تقولي يلا اشتغلي مصخره !

واذا بتقولولي ليش ما اقعد اسولف معاهم ، اغلب سوالفهم حش بخلق الله ، وانا ما يعجبني ، وطالما هالشي غالب على بقيه السوالف ما بقعد
يعني جربت وقعدت مره بس ، وحده يابت طاري واحد معانا بالدوام ، هذا فلان كان جي جي وجي ، والريال بالوقت اللي كانت تسولف عنه بشكل سىء كان تاب من الشي اللي سواه وعرس وياب بنت ، من بعدها قلت ما بقعد مره ثانيه وياهم، وشي طبيعي اللي يسولف عن الناس بيسولف عنك.
وطبعا كلهم يمرون عدالي ولا وحده تسلم
قلت برايهم لا يسلمون
كم مره سلمو على عدد الاصابع
بس البنت المواطنه كانت تسلم عقب طاف
قلت برايها

وعندي السوبرفايزر مالي اسولف معاه من فتره لفتره وانا اشتغل
ولا هو مرات يسولف من التيم كله عشان يطلعنا شوي من ضغط الشغل
ومره كان يدربني على شغله فوحده من الشله قالت اشحالك قالها تمام قالت كيف المخلوقه تشتغل ؟ تقصد علي وطبعا قالتها بالانجليزي الرمسه لانها السوبر فايزر اجنبي .
والبنت الثانيه وياي بالتيم تهاوشت وياها لانها تعق شغل علي وخبرت السوبر فايزر
وطبعا هي الغلطانه
وما تكلمني
وحتى ما تسلم علي
ومع البنت الثانيه بالتيم مالنا " هم بنتين وانا الثالثه" تضحك وتسولف مع انهم قبل اتهاوشو ، ابي ادخل معاهم بالجو طاف، ما يسوولي سالفه فاضطر اني انسحب .
حتى المديره " وهي مواطنه"ردت من الاجازه وخطفت من عدال مكتبي ما سالتني اشحالج ولا شي
وكل القسم سالته اشحالكم وشو اخباركم ، وبعضهم بالاسم
بعديييين كانت عندها شغله مع السوبر فايزر سبحان الله يمكن الحين شافتني قالتلي اشحالج قلتلها الحمد الله تمام . ما ادري انا حاطه مخفي نسبته ميه بالميه عشان جي ما شافت؟
عشان جي من بعد هاليوم تخطف تسلم ما ارد السلام اسويلها طاف .
ومع شله البنات تضحك وتسولف وانا طاف، بتسالني عن الشغل وبس وتروح.ومرات ما تسال، الشغله عندي لا ما تكلمني انا تروح عند السوبر فايور تقول ابى جي وجي ، والثانيين اذا عندها شغله عندهم بتكلمهم شخصيا .
اكيد مافي شي اسمه "صداقه " بين اللي بالدوام ، وهذا اكتشفته مع الخبره
يعني قلت ابا ارابع وحده من الدوام وكنت على نبياتي وماكنت ادري انه اخطر علاقه اللي تصير تعارف داخل الدوام، فوحده دوم تتصل تستفسر عن شي وهي بقسم ثاني ومواطنه ، ومع الايام قالت عطيني البن كود وانا ماا دري ورا كل هذا مصلحه، لانها لا كانت تطرش برودكاست ولا تسولف ولا شي بس حاطتني زينه عندها باللسته، مع الايام سويتلها دليت ، اتصلت اليوم الثاني من تلفون الدوام تقول انا سويتلج ديليت بالغلط ، انا طوفت موضوع لاني انا سويت ديليت قلتلها بعطيج البن كود مره ثانيه ما عليه ، عقب فتره راحت هي سوتلي دليت ، ولا صارت تتصل عندي بالدوام شرات اول ولا شي
الا سبحان الله دقت يوم تبي تسال عن شغله بالدوام بس اونها عندج الشي الفلاني " سؤال برع خارج عن نطاق الشغل" قلتلها لا قالت انزين عندي سؤال عن شغله شيكيلي عليها
ولا كيف كان اسلوبها ، صباح الخير، كيف الحال ؟
وقبل كيف كان ، والشي الغريب انها ما صارحتني شو الغلط اللي سويته وليش تتكلم وياي بهالاسلوب الجاف .
ما بي اكون ربيعتهم شرات ما هم ربع ويظهرون ويا بعض برع الدوام ، لكن على الاقل في اسلوب معامله زينه، وانا ما اشوف انهم يعاملون زين من اول يوم داومت، تهميش في تهميش حتى بالشغل، خلوني سنه ونص على شغله في مكتب بطابق والقسم كله بطابق، اي شي يصير بالقسم ولا حد يكلمني ، حتى السوبرفايزر ما يتصل ويسال ،كل الاخبار اخر من يعلم ،بعدين تميت احن عليه قال اتريي لين فلانه تروح اجازه بخليج مكانها ويا الصيف واخيرا وليس اخرا بعد سنه ونص دشيت القسم وخذيت مكانها والحمد الله شغلي احسن عنها بوايد وبشهاده سوبرفايزر التيم .
نفسيتي الحين زفت في زفت لدرجه شغلي صرت اخلصه بطىء واحس باحباط ، ومستحيل اكمل معاهم بالقسم ، والسي في مالي بديت اقدمه في اماكن وايد بتريا بس بمكان يقولي تعالي بتوكل على الله وبروح بدور مكان ثاني حتى لو عاملوني افضل من الحين بوايد انا خلاص كارهتنهم كلهم فردا فردا..

واكيد بتلوموني على شخصيتي ، الصراحه انا من النوع الخجول وشويه انطوائي ، لكن اللي يضايقني موظف او موظفه اشتكي واتكلم واعبر واعطيه بالويه ، بس اللي شراتي مواطنات ما احب اتصادم معاهم .

حبيت افضفض لاني حاسه اني وصلت حدي.

حبيبتي الله يعيينج

ربي يوفقج أختي

وما عرفت هل تبغينا نساعدج أم بس تبغين تفضفضين ^^

بس من الي شفتـه انتي اصلا ما يعيبج كلامهم وحواراتهم فما في داعي تزعلين لإنج ما تجتمعين وياهم ^^!

بالنسبـة للاخت الي تسلم وما تردين عليها

ترى الغالية تؤثمين

رد السلام واجب بين الأنثى والأنثى والذكر والذكر

وبين الجنسين المختلفين عليه اختلاف

قال النبي صلى الله عليه وسلم:

"خمسٌ تجب للمسلم على أخيه:

رد السلام، وتشميت العاطس، وإجابة الدعوة، وعيادة المريض، واتباع الجنائز".

فحتى اذا شالة في خاطرج من صوبها لا تدخلين الدين في الموضوع

ولا تعاملينها شرات ما هي تعاملج

كيف ترضين لها الي ما ترضيينه لنفسج !

عاملي الناس بأخلاقج مب بأخلاقهم

لإنج تحاسبين عن نفسج مب عنهم

والله يوفقج أختي وعليج بشغلج ووقت الفراغ قضيه في شي يفيدج

مثل ذكر الله الإستغفار ختم القرآن وتنمية مهاراتج

رياضـة خفيفـة بين الأوقات

صلـة الرحم بارسال مسجات أو اتصال وغيره كثير

اللهم علّمنا ما ينفعنا وانفعنا بِمَا علّمتنا وزدنا علْمًا يا رب العالمين

حبيبتي الله يعينج بس تصبري

يمكن لو حاولتي تندمجين بشي يسليج بتطلعين من هالكئابه

ونصيحة دايما خلج متفائله والابتسامه في ويهج ومنطلقة

ترا انا انصحج وخاطري تكون عندي هالمواصفات..انا داومت من اسبـــوع مب متاقلمة فالموضع واحس اني ضايعه
عندي قدرة على العمل والابداع بس لاني )مب اجتماعيـه ومب وقحه واستحي )احسـهم يتحروني مااقدر اشتغل !!ويقللون من قيمتي

الله يعين

و عليييكم السلاام ورحمة الله وبركاته

اهم شي قلتيي كل الي بخاااطرج و ارتحتي سبحان الله طبعج شراتي قبل يوم كنت ادرب ما كنت ابد اسولف ويا البنات ابد ابد بس اللهم الصبح اسلم عليهم و كل وحده ويااالثاانيه او أنهن يسون شله وييا بعض. وقت البريك ما أسير وياهم ليش لانه سوالفهم غير وبعدين بس لو وحده منهن ما تحضر يبداا الحش فيهااا ما يخلون شي الصراحه اريييح لي ما اخطلت وياا احد و الحمدالله كاافيتهم خيري و شري

من ناحيتي اقولج اشغلي نفسج بالاهم و ما عليج بس حاولي ااتكونين سطحيه وياهم

نفس اللي عندي بالضبط
وشاغله نفسي بشغلي
وعلاقتي معاهم شغل بشغل ، هذا في شغل وياهن هم بصوب وانا بصوب
بس ما عندي وحده اسولف معاها او اقعد معاها حتى اذا بنطاق الشغل او حتى تاخذين وتعطين اخر الاخبار في اي مكان مب شرط شغل حتى حق ربع ساعه ماعندي .

بحاول اختي ومشكوره على نصيحتج

ما تحكمين على عمرج من اسبوع، ترا التثبيت بعد ثلاث شهور اللي اعرفه، بس شوفي عندكم التثبيت متى، وخلال هالفتره اعرفي شغلج وتمي اسالي .

ومب اجتماعيه : خلج اجتماعيه مع اللي دايما تتعاملين معاهم وخل كلامج بحدود نطاق الشغل فقط، واللي يتجاوز كلامه او كلامها تعذري بشي وروحي ..

مب وقحه : الشغل ما يحتاج وقاحه، يحتاج يكون عندج كيف تبدين رايج بقوه ، اقرئي كتب ، وبطرشلج اسامي كتب على الخاص .

تستحين : مطلوب في الدوام حدود، واذا المستحاه عائق بينج وبين شغلج ، تعلمي كيف تتخلصين منها ، مثلا تتعاملين مع كستمرز، ومن بين الكستمرز ريال لازم تتصلين عليه وتتكلمين معاه، وانتي تستحين ، هنيه لازم تتخلصين من المستحاه وتتصلين ووتكونين مركزه شو بتقولين بالضبط. " هذا مثال"

لانه السوبرفايزر يقيمون كل شي .