محتاجة حد يطمني

بقولكم السالفة من البداية عشان تفهموني ..

شوفوا انا من وانا صغيرة الاحظ التفرقة الي يسويها ابوي بين امي ومرته الأولى

يعني ما نشوفه الا كم يوم في الأسبوع يقعد يمكن ربع ساعة أو أقل ويروح وإذا نطلب منه

شي يالله يسويه ويقعد يذل ويذل ..

وكله ضرابة وسب والخ المهم من زمان انا بصراحة ما أحب أبوي وما أكرهه يعني أحس وجوده

في حياتي وعدمه واحد لأنه ما حسسني بمشاعر الحنان والامان وما حسسني إنه ابوي الي يحبني ويخاف علينا

لين تقريبا 2024 صارت مشكلة وايد كبيرة بسبب وحدة أبوي تعرف عليها ونهاية هالمشكلة ان ابوي طلق أمي ..

المهم ان امي خبرتني الخبر وانا سويت عمري منصدمة مع اني من داخل كنت فراحانة والله ! وقلت أخيرا بيطلع من حياتنا

تخيلوا ما يقدر مشاعرنا ما يهتم فينا ما نعني له شي ما يشاورنا ما الخ ..

عاد مرت السنين ونحن انتقلنا بيت ثاني وطبعا انا كل شوي أحس بمشاعري تجاه أبوي تقل يعني الحين أحس اني فعلا ما أحبه !

وهالشي مو بايدي ويوم طلق امي قال اونه انا اوعدكم اني ما ابعدكم عن امكم والخ من هالكلام والحين اونه بنى بيت وناقصه الأثاث

ويقول باخذكم هاك البيت وما يهمني أمكم اتي وياي ولا لا .. وامي رافضة تروح هاك البيت لأن هو كاتبنه باسم عياله الي من مرته الأولى

ومو ضامنين نعيش فيه ولا ننطرد منه ويطالبونا فيه ، واخوي ابوي لاعب في راسه عدل واخوي كله يغلط علينا ويسبنا ويغلط على أمي

وايد وما يحترمها وحتى احيانا يسب ويلعن وانا مقاطعتنه من أكثر من ثلاث شهور بسبب هالشي لأني ما اتحمل اشوف حد يغلط على أمي

وأسكت بكل بساطة ! المهم الحين ابوي يلمح ويقول باخذكم لهاك اليت عقب ما انا اخلص دراستي يعني عقب سنة وانا حلفت بيني وبين نفسي

ما افارق امي وقلت لها انا مستحيل اعيش وياه لو تنطبق السما على الأرض وما بخلي الإنسانة الي اهتم فيني واروح مع الي ما حس فينا !

وانا صج خايفة ابوي يجبرني او يسوي شي عشان يبعدني عن أمي .. وأخوي اناني ما يفكر الا بعمره ويقول لأبوي متى ننتقل والخ ..

مادري شسوي وقلبي معورني من كثر ما أفكر وخايفة أخلص دراستي عشان ما انتقل بعيد عن أمي مع اني وعدت نفسي ما ابعد عنها لو شو

يصير حتى قلت لأمي ان هو مطلقنج واذا بغاني اسير وياه انا برفض ولو جبرني اروح المحكمة واقول لهم اني اببي اعيش ويا امي

والله ارتاحت نفسيتي 3>

الله يجازيكم يارب ولكم الأجر والثواب