مساعدة بخصوص القهوة العربية والشاي الاحمر ؟؟؟

السلام عليكم أخواتي الكريمات …
لو سمحتو غيت افضل طريقة و المقادير بالظبط لصنع احلى شاي أحمر , شاي بالزعفران , قهوة عربية جزيتم خيرا باذنه تعالى .

ما اتوقع فيه بنت مواطنة ما تعرف تسوي شاي وقهوة …!!

بس فديتج ما عليه الظاهر توقعاتي غلط

سمعي الغلا

اول شيء اشتري قهوة عربية برازيلية مطحونه .. خذيها حمرا من اي مطحنة لأن ادري انج ما بتقدرين تحمسينها بروحج وتطحنينها

الحين الطريقة

تصبين لتر وربع ماي .. ترا الربع هذا بيتبخر

او اشتري ابريج القهوة المعروف حجم وسط وصبي الماي اقل من نص البريج بشوية ..

حطي الماي على النار لين يفوح

قصري ع النار للأخييييييييييييير ,, وحركي الابريج بحيث يكون نصه ع النار ونصه بعيد عنها ..

الحين حطي فنجان ونص قهوة .. على الماي

وخليه يغلي على مهل بس كوني قريبة علشان ما تطفح القهوة ..

إذا ارتفعت القهوة حركي الابريق بسرعة عن النار واول ما تهدا القهوة رجعيها

بتلاحظين القهوة مسوية رغوة مثل رغوة الصابون .. خلي القهوة ع النار لحد الرغوة هذي ما تختفي

لأن اختفاء القهوة يعني نضجها ..

بعد ما تختفي الرغوة .. طفي النار وغطي الابريق..

وانتظري دقيقة ونص .. في هالفترة هاتي الدلة او الترمس اللي بتحطين فيه القهوة وطبعا يكون مغسول ونظيف ..

حطي فيه شوية زعفران وملعقة شاي صغيرة هيل

وبعدين هاتي الابريق وصبي منه القهوة بس يكون مرفوع بحيث تشوفين لون القهوة

صبي القهوة لحد ما تحسين ان لون الماي اغمق وتغير وقفي الصب

لان اللي بنصب عقب هو ( الدحنة ) وهذا ما ينشرب .. عيب انه يكون مع القهوة ..

وسكري الدلة وجذيه خلصنا القهوة

على فكرة في الشتاء تقدرين تحطين كمن حبة مسمار ( قرنفل ) طبعا ما تحطين لا هيل ولا زعفران مع القرنفل ..

الحين الشاي الاحمر

طبعا الناس يسوون الشاي بطرق مختلفة ,, المعروفة اكثر شيء هي تصبين ماي حار في الكوب وتحطين ورقة شاي وتخلطين وتحطين سكر

بس هذي طريقة ما يحبونها الناس

في بيتنا نسوي الشاي السليماني في الابريج ع النار

نفس الشيء ليتر وربع ماي ..

ونص كوب سكر ..

و4 حبات شاي ليبتون

اول شيء نغلي الماي

بعدين نحط كوب السكر ,, وننتظر لين يغلي الماي مرة ثانية

بعدين نحط ورق الليبتون طبعا بعد ما نقص التاق او الورقة الصفرا ونخلي المزيج يغلي 3-4 دقايق .. لين تطلع ريحة شاي قوية

بعدين نحط زعفران في الدلة ونصب الشاي <<<< إذا نبا شاي بزعفران ..

أو نحط كمن ورقة نعناع في الدلة ونصب الشاي <<<< للشاي بالنعناع

طبعا نسوي يوميا شاي اخضر وشاي سليماني .,. وشاي حليب الصبح ( نفس الطريقة بس نذوب الحليب في الماي قبل لا نحط الماي ع النار تقريبا 3ارباع كوب ) ..

وفي الاخر ,, ترا هالكميات حق عايلة كبيرة … نقصي الكمية إذا لج إنتي وريلج بس

والسموووووووووووووووووحة

الاخت ما قصرت

ماااااافيج حييييييييله

ماشاء الله عليكم والله ما تقصرون ( الغالية انا مش مواطنة ) , جعلها الله في موازين حسناتك باذن الله , شكرا عالطريقة الحلوة .