مسافرات أوروبا استفساااار عاجلجهاز القارمن

السلام عليكم،، خواتي استفسار بكم تأجير السياره من فيينا؟
وهل يوجد في سيارات التأجير جهاز القارمن اللي يعرض الخرائط؟
وهل يوجد بالسياره تلفزيون أو أفضل نشل معانا عشان العيال؟
طيب شو أفضل نحن ناخذ جهاز من هني أو هناك أفضل؟
وبخصوص تجريج الكاميرات واللاب توب.. شو عشان الفيش مالتهم والكهربا تختلف أو ممكن نمشي الحال..
والاستفساار الأخير

شو المطاعم في فيينا- سالزبورغ- كابرون- زيلامسي- اللي ممكن تناسب العياااال..
واللي سافرت مع العيال.. ندمتي أنج شليتي أغراض وايد لهم؟ أو أن هناك كل شي متوفر مثل البامبرز والحليب وغيره..
مشكووورااااات.. والله يوفق الجميع..

والله ما عندي اي فكرة …. انشاء الله البنات بيفيدونج الغلا …………. واتمنى لكم رحلة موفقة ….

شحاااااااااالج اختي ام سيف بسم الله نبدأ بالنسبة للسيارة على حسب الي تبغونه يعني اذا تبغين سيارة فيها قارمن او لاااا بس ترا بدون قارمن ارخص انصح بالقارمن لانه مهم وااااااااايد . بالنسبة للتلفزيون ماعندي فكرة بس احنا ناخذ معانا الديفيدي وبالنسبة للكاميرا لازم تاخذين فشية من اهنية لان كهربتهم غيييير . والمطاعم احنا نطبخ بروحنا بس مرات ناخذ من الماكدونلدز الي في زيلامسي وفي مطعم هندي وتركي في زيلامسي وحلااااال وبالنسبة للبامبرز والحليب متوفر بس طبعا اغلى من اهنيه .. احنا انأجر سيارة من ميونخ وعدنا واحد يعطينا بسعر زيييييين والسموحة

هلا ام سيف نحن مسافرين عايله كبيره وويانا يهال بخبرج عن تجربتنا
استاجرنا سياره اوبيل فان 9راكب مع جهاز الجارمن ومباشره من المطار بكل سهوله تستلمينها من الترمنال 1 قسم تاجير السيارات وتحطين الاغراض واليهال وعلى الفندق
الرجعه نفس الشي تدحبينها اغراض وتركبين لين المطار في الترمنال 1 تسلمينها وتحطين اغراضج في الترولي وعلى التشييك بس نحن ودينا سيتات الاطفال ويانا اوفر من التاجير
الحليب اخوي مفطوم وما عندي فكره احسن شليه معاج.. البامبرز متروس هناك
الشارجات لازم ابو اثنين وما اعتقد تحتاجون تلفزيون للسياره وايد العاب على الطريج وقفوا وخلوهم يلعبون وبكل مكان مطاعم ووجبات خاصه للاطفال

عندي سؤال نحنا مستأجرين سياره فولكس واجن ل9 اشخاص وقالوا انه اتضم الشنط بعد يعني 8 شنط بس انا مب متخيله كيف الشنط ويانا لانه اتعرفون العرب كيف شناطهم هل حد جرب عشان يخبرنا تجربته

مرحبا الغاليات .. صح أن الرد متأخر بس أحب أشكركن على الردود و ألف شكر للمعلومات القيمة يا خواتي كابرون وxouaexo
أنا سافرت وكانت الأمور سهاله ولله الحمد..
في فيينا ما تحتاجون سياره لأن الأندر قراوند أسهل وأسرع طريقه للتنقل..
طلعنا بعد فيينا مدينة سالزبورغ النمساوية بتاكسي ومن هناك توجد مدينة ألمانية اسمها فرسلنق.. تبعد 10 دقايق بس واستأجرنا السياره منها لأن الإيجار هناك أرخص.. خنا أودي Q7 وارتحنا في التنقل بها والقارمن منها وفيها، وحملنا فيها 4 شنط.. طبعا ما خذنا كرسي الأطفال ما احتجناه..
االكهربا اشتريت قابس كهربائي اللي فيه فتحتين لأن فعلا مثل ما قالن الخوات ما عندهم الكهربا 3 فتحات..
بصراحه ما حصلت الحليب اللي تشربه بنتي وهو بروجرس في زيلامسي ولو كنا في فيينا يمكن نلقاه.. بس ندمت أني ما خذت معاي..
بخصوص المطاعم.. في زيلامسي ماكدونالد ودايما نطلب فيليه سمج.. وتوجد مطاعم عربيه بقرب فندق جراند.. وغالبا اذا ما صادفنا مطعم عربي تطلب معكرونه وبيتزا..
وبالنسبه لأغراض الأطفال شليت شنطه خاصه لهالشي وما ندمت.. وبخصوص تبديلهم يا كثر التبديل بصراحه!! لازم تشلين احتياطج في ملابسهم..
أجهزة الكهرباء أنا خذت غلاية الماي الكهربائية والكوايه ونفعن في الأماكن اللي ما تتوفر لج هالأشياء..
لكن بصفه عامه اذا قدرتوا تقللون الشنط تراه في صالحكم.. سبحان الله يمكن تضطرون تسافرون بالقطار أو شي فما تتلعوزن..
أختي حزينة زايد..
دشي موقع يورو كار ودخلي بيانات وهمية للتأجير لنفس السياره وبيبين عندج هالسياره كم شنطه تتحمل..
ولا تنسون الليسن الدولي.. اطلعونه من هيئة البريد ما ادري بالنسبة لمدينة العين خلصنا هالمعامله في البريد..
وبالتوفيييق..