مشكلتي فالدوام

السلام عليكم ورحمة الله وبركاته
مساكمـ/صباحكمـ ورد

ع كثر ما احل مشاكل خلق الله يوم ايي عند مشكلة تخصني عقلي ما يشتغل هههههههه
المهم بخبركم مشكلتي فالدوام وابا اقتراحات او حلول

مشكلتي هي مسئولتي الأجنبية فالدوام الله يفكني منها, طفرت منها ومن اسلوبها ومهما اشتكيت انا وربيعتي عليها
ماشي فايدة كله يقولون صبروا وبتنطرد, السنة بتخلص ونحن عن نفس الموال كل يوم في مشاكل وياها
كله تتأمر علينا يا تيينا لين مكاتبنا ولا اطرش ايميلات واذا خاطرها تتكلم باسلوب مش حلو بتحط كل الموظفين
اللي تعرفهم في الايميل.
وصلنا لين المدير العود وماشي فايدة والحين انا تعبت نفسيا من الضغط ومن الاسلوب, بروحها نفسيتي مب ذاك الزود
وهي كل شوي تسير وتقول حق الناس هاذيلا ما يشتغلن وكله يحوطن ومادري شو مع انه محد كثرنا منكرف فالقسم
خلت كل الموظفين اللي نتعامل وياهم يتأمرون علينا ونحن بنات البلاد والمكان مكاننا!!!

شو الحل وياها حد عنده اي اقتراح عشان نوقفها عند حدها؟ ابا اشتغل بهدوء مابا كل يوم اييلس بس احل مشاكل هي السبب
فيها, لاعت جبدي واستويت مالي خاطر اداوم.

ومشكورات مقدما

يوم كنت موظفه كانن الاجنبيات يعرفن ان المجلس موظفنهن عشان المواطنات يتعلمن منهن و هالشي كبر لهن روسهن
و مش الكل بالعكس الاغلب كانن يقولن ماندري ليش المجلس يابنا وانتن كفاءاتكن احسن منا!

هالفتره صارت المقارنه بين المواطن و الاجنبي من حيث الخبره و اثبات مكان اكثر من سابق عهدها مع العماله العربيه

جربي كلميها مباشره.. و فهميها انها يالسه تخلق جو سلبي في الدوام و هالشي مؤثر على اداءكم و نظرتكم لها .. موضوع انهم يصبروكم و هيه غلطانه شفناه عندنا ههه

للاسف عندهم سياسة الاجنبي "لا تزعلوه"

!!!!! هم أصلا الأجانب المستقدمين ذيله عندهم خبره! أتصور ان أمريكا ماتصدر خبراتها بسهوله!!! مثل الوافد اغلب اليشتغلون يكونون

فاشلين في بلدهم … عشان مااظلم مب الكل .. بس لاحظت هذا الشي … في ناس مايحصلون وظائف في بلدهم يحصلون هني …..

ومرات يمكن المواطن ارحم …. عشان على الأقل متفهم ويريد مصلحته … الثانين يريدون فلوس ويشاتمون عشانها .. واذا حصل تطور

بيكون بعط بغض في النفوس!

فالاحسن اختي مادام عليها شكاوي ومب بس انتي … تواجهينها بس مع احترام منصبها عشان مايصير زعل … ساليها ليش اسلوبها معهم جي

وسوي عريضه … بكل الموظفين المشتكين عليها … وارفعوها ورفضوا العمل الا في حال طارت

في ناس يفكرون الأجنبي احسن .. بس مب صحيح مب كلهم متفهم ومثل الاعلام مايصور …

في منهم عاديين…. مثلهم مثل غيرهم

في لي ربيعه تمدح مديرتها الاجنبيه اكثر من المواطنه عشان المواطنه ماعملتها بعدل حسب كلامها مثل الاجنبيه

ولكن هذا الشي بالصدفه يصير … مب الكل واحد …

الله يكون في عونج

سيِّدُ الاسْتِغْفار أَنْ يقُول الْعبْدُ : اللَّهُمَّ أَنْتَ رَبِّي ، لا إِلَه إِلاَّ أَنْتَ خَلَقْتَني وأَنَا عَبْدُكَ ، وأَنَا على عهْدِكَ ووعْدِكَ ما اسْتَطَعْتُ ، أَعُوذُ بِكَ مِنْ شَرِّ ما صنَعْتُ ، أَبوءُ لَكَ بِنِعْمتِكَ علَيَ ، وأَبُوءُ بذَنْبي فَاغْفِرْ لي ، فَإِنَّهُ لا يغْفِرُ الذُّنُوبِ إِلاَّ أَنْتَ .

المسئولة المباشرة ان كانت مواطنة او اجنبية خلي اسلوبج وتعاملج معها راقي وحتى لو في تجمعات بنات ماله داعي تتكلمون من وراها

لانها لو ماتعرف تحس وصدقيني التربية والأخلاق تصنع الانسان قبل العمل حتى لو الموظف مهمل وظيفيا يكفي ادب الحوار والأخلاق لهم دور

بالتعامل ,,, ونصيحة لج لاتدوريين حل ولاتشتكين وهي اذا تكلمت خلوها تتكلم دام واثقة من نفسج خلاص ليش تدورين حل ,,,,

طرشيلها بالايميل اغنية اديل
there is a fire starting in my heart
هههه
امزح
خل تولي هي الي بتتعب