مشكلتي مع ريلي الغالي

مرحبا حريمات بنوتات شحالكن بغيت اشاوركن في موضوع افكر فيه دوم انا حرمة مزوجة من ثلاث سنوات ريلي الحمدلله ما عليه كلام ومب مقصر فيني ابدا الله يحفظنا من العين عندي ولد وبنت وعمري 27 سنة باختصار مشكلتي اني موظفة تقريبا من ثمان سنوات المهم ريلي ما يفرق بين راتبي وراتبه مع ان بطاقتي مال البنك عندي ولان هو عليه ديون ويصرف بيزاته كلها ع البيت واعرف بالضبط وين يصرفها بس عقب ما يخلص راتبه يعتمد ع راتبي ريصرف ع البيت وعلي فكرة هو مول ما يقصر يعني من اطلب منه يشتري اي من بيزاته يشتريه لي اياه على طول بس شو الفايدة اذا هو عقب بيرجع لراتبي ويشتري اغراض البيت احس اني اموت من القهر لان تعبي يروح ومب قادرة اجمع لنفسي شي كلما جمعت مبلغ صرفه خاصة ان راتبي اعلى من راتبه وبصراحة انا ما اثق فيه وايد خاصة اني اكتشفت انه يخونني مع وحدة كان يحبها عقب سنة من زواجنا بس ما استوى امبينهم نصيب ومع انه اعتذر لي وقطع علاقته فيها وتغير واستوى يموت فيني وفي الارض اللي امشي عليها ويلبي طلباتي كلها بدون نقاش واستويت انا حياته ودنيته كلها يا جماعة نصحوني شو اسوي هل افصل راتبي عن راتبه خاصة ان راتبه ضعيف وعليه ديون ويشرح لي بالضبط فشو يصرف ولا اخلي الوضع على ما هو عليه واخاف اندم عقب ويدور ع وحدة ثانيه يصرف عليها

الله يعدكم يارب.

أنا أجوف لو تقعدون وتتفاهمون على البيزات. واتخصصي لج مبلغ بروحج. وتشتركي بجمعيات والبيزات الي بتجمعيها خليها عند امج او اختج او اي حد ثقه. وما اتخبري اي حد عنها ولا حتى زوجج. وجي بتجمعي بيزات لج. الواحد ما يضمن شو كاتبه القدر.

خالتي ريلها يموت عليها تخيلي حرمه كبيره ويقول لها عدالنا حياتي وعمري
فجأه طلع متزوج بالسر وماكانت مهتمه بناحية البيزات. ومن المشاكل ماكان عندها بيزات
ها من جم سنه الحين ردت لزوجها. بس قامت تجمع بيزات محد يعرف عنها ابد
وماشاء الله الحين تقول لاعيالها الاثنين
اختار البنت وكل شي علي. معنها ما تشتغل.
وها كله ريلها ما يعرف عنه شي.

حتى لو تشترين ذهب واتخليه عندج. كل شهر اشتري طقم خفيف.

اختي دام تعرفين ظروفه الاحسن انج تشاركينه ف المسؤوليات ولا تخلين البيزات تحط حواجز بينكم لين ما تخلص ديونه واذا قدرتي تيمعين مبلغ كل شهر لين سنه وتسدين ديونه منها تشلين عذره وعقب تقدرين تعتمدين ع راتبه وتيمعين راتبج لنفسج . . ان شاء الله البنات يفيدونج اكثر

تبين تفصلين راتبج هذا حقج بس عيشي على قد راتبه يعني ما تحملينه فوق طاقته دام تعرفين كل شي عنه وعن وضعه
اذا تبين الحق جي ام انج تجمعين راتبج وتحملينه فوق طاقته ما يجوز
والافضل انج تفصلين الراتب بس تشاركين معاه بمبلغ معين يعني ربع الراتب والباقي تخلينه لج

لا حبيبتي كله و لا فلوسك

لأنه لو مادياته ارتاحت مرات يرجع لعوايده القديمة

عالاقل تلقي انتي قرشين ليك و لاطفالك مستقبلا

قوليله انك مثلا بتخصصي مبلغ بتدخرينه او مثلا بتشري بيه ذهب لظروف الزمن

فهميه ان نص راتبك مثلا تبيه لك انتي ،، الصراحة بالذات مطلوبة في هالوقت بالذات

خصوصا فيما يخص الفلوس ، لأن ياما حريم كونوا رجالهم من الصفر بعدين

تزوجوا عليهم و خانوهم وجابوا هدايا لحبيباتهم من فلوس زوجاتهم المسكينات

المهم كوني حريصة على مالك و تفاهمي معاه

يعني مدلعنج ب معاشه وماقال بخش من وراها فلس

و متضايقه انه ياخذ من معاشج عشان يوفر اغراض البيت؟ يعني مب يلعب فيهم
مب يكشخ لا
يلبي احتياجاتج الي طغت ع معاشه

اختي ابعدي عنج الشيطان
حلالكم واحد واذا صج مب قادره عالوضع
عطيه كاش بس تحملي العواقب لوتغير عليج
لانه مافكر بعمره عشان يوفر اساسياتكم