مشكلتي مع وحده من بنااات الدوام كانت اربيعتي

فديييييييييييييييييييتكم بنااااااات شكراً لكل وحده كتبت لي ودعت لي خلااااااااص حلييييت مشكلتي والله هذا بفضل الله وثم دعواتكم ودعواتي
ما توقعت كل شي ينحل بسرعه وارتاح منها ومن شرها صدق ما قدرت اتحمل وقلت لازم اسوي شي وسبحان الله بعد استوا شي ثاني يعني كل الي كنت ابيه صار الحمدلله

اليوم انا ما داومت واتصلت فيني وحده من البنات الي معاي في المكتب والي استوو اربيعاتها مثل ما كتبت في الموضوع وقالت لي وكانت مضااايجه انا خلاااص ما اكلم ميثه كله تبي اخبار المكتب قلت امووون قولي الصدق هي ما ترمس عنج قالت والله شو اقولج انا ما ارد عليها الحين ولا اكلمها حتى اطرشلي مسجات واسوي لها طاف وقالتلي انها ترمس عني حتى من قبل ما تستوي سالفة النقل يعني مثل ما اتوقعت كانت ام ويهين وقلتلها هي شو اتقول عنهم وسبحان الله طلعت ميثو خبييييييييييثه يعني اتقولي رمسه واتسير اتقول لها نفس الرمسه صددددق انصدمنا واايد والحين بس باقي الثانيه اتعرف هي كييييف
واكتشفت واتأكدت انها من زماااان ماسحه صوري فككككه الحمدلله . . . انا كلمت ناس من الشرطه ودوامي وكلمناها خافت واكدت لنا هالشي وأصلا هي جبانه علا كلامها ها كله بس تبي حد اكبر عنها وهم يوقفونها عند حدها وهذا الي صار وهي انا بعد هددتها بطريقه غير مباشره بفضايحها الي ادخلها سجن وخااافت واكدت ان ما في شي عندها فما اتوقع عندها وحتى لو عندها ما بتسوي شي
سبحان الله طلعت علا حقيقتها وكلنا انصدمنا من السوالف الي كانت اتقولها يعني هي كانت ترمس علينا كلنا ومب مخليه حد
ونصييييييييييييحه لكل بنت تحذر وتستفيد من الي صارلي والله ان الي صارلي درس اتعلمت منه
وشكراً مره ثانيه

السلام عليكم
أول مره اكتب في هالقسم واتمنى اتساعدوني
صح السالفه طوييييله بس لازم اتعرفون من البدايه
قبل سنتين دوامت في دايره حكوميه واول ما داومت اتعرفت علا وحده بسميها اهني ( ميثه ) وخلتني استوي اربيعتها كنت اشوفها طيبه وكانت دووم تتصل فيني واتسولف وياااي واتكلمني عن الدوام فاستويت وااايد ويااهاااا وحتى في الدوام كنت كله معاها
والمكان الي رحته مافي موظفات وايد يعني بس مكتب واحد فيه 3 وفي الشفتات فيه حريم كبار
كنت اداوم الصبح وهي بعد بس ما كانت اداني المسؤوله الي في المكتب وكانت دوووم اتحط عليها واتقول انها كله اتفر الشغل عليها ودايما تذمر من الشغل مع ان ما في وايد شغل وكانت من النوع الي واااايد يعلق ويحش ويتمصخر عالناس بس من وراهم ويدامهم غييير اتكوون
عرفت هالشي فيها بس كنت اقول كل حد فيه عيوب وهي هاي عيوبها
هاااييج المسؤوله اشوي دفشه واتحب تعتمد على موظفاتها وكله اتفر الشغل عليهم بس هي بطبيعتها طيبه وانا اتعاملت معاها بس هي هذا اسلوبها الي خلا ميثه تكرها
ميثه كانت اصغيره عمرها 25 بس ما يبين عليها وهي مطلقه اتزوجت شهرين واطلقت وعندها ولد
المهم استوت مره مشكله عووده بينها وبين هالمسؤوله فنقلتها شفتات
هي انقهرت واايد وتمت اتحن علي عشان اداوم شفتات معاها
وما كنت ابي لين ما يت فتره سوو دوام حلو حق الشفتات يومين دوام ويومين اجازه فرحت علا طوول طلبت نقل ورحت في نفس شفتها وكنا البنتين الوحيدات في الشفت وكنت كللله ويااهاا علا طيبتها وسوالفها معاي وما تحب نتفارق دقيقه نتغدا نتعشا نتريق مع بعض حتى كانت مرات اتمر علي البيت اتشلني ونروح الدوام مع بعض بس لاحظت شي يديد فيها كنت يوم اقولها علميني شغل الكونتر كانت ما تعلمني عدل وكله تشتغل بروحها واتخليني كله معاها علا نفس الكونتر وتشتغل هي
يعني كله اتبين لهم ان هي اتعرف الشغل وهي بس شاطره وهم دوووم الشباب كانوا يمدحونها علا انها شغوله
انا كنت اشطر عنها في شغل المكتب يوم كنت اداوم رسمي واتعلمت بسرعه
بس اهني لان الشغل يختلف وهي ما كانت تبيني اتعلم
حتى الشباب تموا يقولون انتي كم شهر اهني بعدج ما تعلمتي المهم مره هي كان عندها مرضيه واحد من الشباب قلتله علمني وعلمني عدل وعرفت شغل الكونتر
ولان نحنا البنتين الوحيدات في الشفت كان في شغله ثانيه بس نحنا ما نشتغلها كله الشباب بس مرات يوم يزيد انروح وهي ما كنت اتحب انا اتعلم فكانت كله بروحها تشتغل وما تعلمني
وكنت بروحي احاول اشتغل
وكنت اشوفها كله اتحب تضحك مع الشباب وتسولف وانا ما كنت جي
مره احيد واااحد مادري شو قال لي بس هي سكتت وتمت تضحك معاه حتى بدال ما ادافع عني وعاتبتها علا هالشي وقالت لاا ما كنت اقصد وآسفه
اهني اكتشف انها من النوع الي فيه انانيه في الشغل بس واتحب اتبين اني هي الاحسن والاشطر
لان يوم اكون برا الدوام معاها عاديه اتكون وكله اتحب اتسولف معاي واتكون معاي فطوفت هالشي بس قلت مستحيييل اداوم معاها خلااص لانها مصختها وما رمت استحمل هالطبع الي فيها
فقلت برد اداوم صبح احسن لي وكان عندهم نقص فكلمت مساعد المدير ووافق اني انتقل الصبح وهي كانت بتطلع اجازه سنويه وقلت ما ابي اتم بروحي مع الشباب
اشتغلت في المكتب وكنت بروووحي اشتغل والحمدلله ارتحت وااايد وتعاملي كان كله مع المدراء فارتحت واايد وخلاص كنت امقرره اتم اهني واصلا المدير ما طاع ارد شفتات
قلتلها بعدين انا ما برد شفتات اضايجت اول شي وبعدين رضت تمييت اوكي معاها وكنا انطقم مع بعض يوم يصادف دوامها صبح وكله اكون معاها وحتى كل الموظفين والموظفات لو جافوني مره وهي مب موجوده يسألوني وين طبجتج عنج اليوم
المهم بعدين انتقلت قسم ثاني اشوي بعيد عن هالقسم واترقيت قبلها وقسمنا كان حلو وكنا اداره عامه على القسم الي هي تشتغل فيه والي انا كنت اشتغل فيه وانا كنت في الهيد اوفيس
هي وايد كانت مضايجه من شغلها عالكونتر ومسؤولينها كل واحد اخس عن الثاني وكانت كاسره خاطري وايد وكنت كله اقول تعالي قسمنا كانت اتقول لا مابي وايد شغل عندكم لان هي ما تحب الكمبيوتر ولا شغل المكتب وما تعرف له عدل
وكانت تكره كل البنات الي في الاداره كلها واي وحده حلوه ولا صغيره تكرها واتحط عليها واتعيب عليها وحتى تتمصخر يدام الشباب في الدوام واتحش فيها وياهم
يعني كانت اتعرف مثلا عن اشياء خاصه عنهم في البيت
مثال فلانه امها مصريه وكله يضربون مرت اخوهم واتسافر مع اخوها علا احساب اربيعته
مثال ثاني اففف وبين تبا وايد مصدقه عمرها عندها x6 كله ماسكه السويج بايدها واتسوي روحها تنسى اتسكر ليتات السياره – فلااانه ترمس فلاان انا جفتها معاه في السياره
-فلانه خاله وامصدقه عمرها وتتميع يدام الشباب
وهالكلام كله عن البنات الي يشتغلن معاي
وكم مره كنت اقول حرام عليج والله انهن طيبات واتقول لااا انتي طيبه وما تعرفينهم
فكانت بس اترابع الحريم الكبار واتسولف مع الشباب
مثل ما قلت لكم ( ميثه ) اتحب دايما اتكون هي الملفته وهي الشاطره وهي الاحلا وكله تتحرا انه شباب الدوام ميتين عليها مع انها وااايد عاديه وشي طبيعي الشباب يضحكون معاها لان وايد عاطتنهم ويه ولاصقه فيهم
ومرات تقهرني حركاتها وكنت اشوفها من بعيد مثلا تعطي بوسه في الهوا لواحد من شباب الدوام ياي من بعيد ومرات اتسولف معاهم وااايد وواااايد جريئه بس انا كله كنت اجوف هالاشياء من بعيد لبعيد وكنت اقول لا ما بظلمها هي مب قصدها شي وهي طبعها جي جريئه اشوي وتعتبرهم اخوانها لانها متعوده عليهم
كنت اسمع رمسه من البنات الي معاي يقولون اربيعتج حركاااات واترمس فلان وفلان وتطلع وسمعتها داااون
وكنت اسكتهم وما ارضى عليها وادافع عنها فكانوا مووول ما يرمسون يدامي
وكله كنت حاطه فبالي انهم يقولون عنها جي لانها ما تسولف معاهم ولا تكلمهم ويتحرونها خقاقه
وهي ماعندها هالحركات واقول ميثو مسكينه وعلا نياتها
ليييين ما يبتها عنا المكتب لان واااايد اتأذت مع مسؤولينها في القسم
كلمت مسؤولي واترجيته اييبها عنا وحسنت صورتها وااايد وقلت انها شغوله
وانا ووحده معاي بالمكتب اسمها ( وفا ) بنطلع اجازه دراسية ولازم حد ايي مكانا لان هم كله يعتمد علينا وكنت اقوله فلانه تقدر تعتمد عليها
المهم يبتها وسوينا امر نقل لها
هي استانست لانها خلاااص ما كانت تستحمل الشغل اهناك ورضت
طلعت اجازه دراسيه المفروووض اذاكر فيها بس هي كله كانت تتصل فيني وتسالني عن الشغل وانا اقول لها وارد عليها واقول حرام اربيعتي ولازم اعلمها لانها ما تعرف شي وكانت اتحش في البنات الي ما ادانيهم وتكرهم واتقول انهم مضايجين ليش هي يايه وما يعلمونها شي
واتحش فيهم حش
هالفتره بديت اضايج وقلت انا كان المفروض افكر قبل ما اييبها عنا لاني مب ناقصه للقيل والقال والضرايب وبتعور راسي من كثر ما تحش فيهم
مروا اسبوعين وداومت انا واربيعتي الثانيه الي معاي بنفس المكتب وكانت طالعه معاي بعد اجازه دراسيه وكنت مستاسه ان ميثه اربيعتي بتكون معاي في المكتب
يوم رديييت حسيتها متغيره وما تسولف معاي ومرتزه عالمكتب بعد ما كانت كله في الكونترات من كونتر لكونتر وآخر فتره قالوا ماشي شغل يلس في الممر يوم شي شغل بنزقرج
يعني كانت وايد جايفه عمرها وسلمت بطريقه عاديه وشفتها عاااادي اتسولف معاهم الي كانت اتحش فيهم وتكرهم وتضحك معاهم جنهم ربع من زمان انا اهني اضايجت وااايد من معاملتها لي وبنفس الوقت استغربت وااايد كييف اتحش فيهم ليل ونهار والحين اربيعتهم بس ما بينت لها شي
وكنت بعد اعاملها مثل قبل وعلا انها اعز اربيعاتي وكنت اقول لها وااايد اشياء عني واسراري وهاي أكبر غلطاتي
المهم قلت لكم استغربت منها كيف اوووكي معاهم في المكتب بس استغربت اكثر ان يوم شفتها وقت الريوق وكنت بس انا وياها وقلت لها شو اتحسين الشغل اهني مرتاحه قااالت اوووه مالت علا ويه فلانه وفلانه بس عادي مستحملتنهم واحسن عن هناك وتمت اتحش فيهم وهم لانهم علا نياتهم شراتي شكلهم وايد ارتاحولها وكانوا يخبرونها سوالفهم وهي تفضحهم عندي ونا ساكته واقول برايهم
في ثلاثه في الدوام خطبوني طبعا مب نفس الفتره
بس كل مره كنت اخبرها صح ما كنت اباهم بس اقول لها وتبوز واطلع الف عله فيهم واتقول لا اتوافقين خله يولون حسيتها اتغار بس بعد قلت ما بظلمها يمكن هذا رايها فيهم بس هي خلتني اتأكد انها اتغار مني من آخر مره خبرتها عن فلان خطبني اتغيرت 180 درجه ومووول ما اتكلمني في المكتب وكله اتسولف مع الي الي ماكانت اتحبهم ولين اليوم اتحش فيهم وفاضحتنهم عندي وعند الشباب بعد
يوم شفتها جي قلت خلها برااايها وهي كيفها الحمدلله عندي وايد اربيعات ومب محتايه لها
كنت الصبح عقب ما اخلص شغلي كله ارمس في التلفون مع اربيعاتي في الجامعه والثانيات الي وايد وياي وكانت تمووت قهر وكله تقول بسج منهم
تدرون بناات هي كيف يوم اتكون معاهم اتبينلهم انها ما اتسويلي سالفه بس يوم انكون ارواحنا اتكون اووكي وياااي واتسولف بس من اتكون معاهم تلبسني ونفس الوقت اتغاااار يوم اكلم بنات ثانيات ولا اربيعاتي يمرون المكتب وكله اتقول عنهم خقاقات ومادري شو وانا ادري انها اتقول هالرمسه لانها اتغار وهاي حالتها اذا جافت وحده حلوه وطيبه
هالفتره بديييت افكر واايد اقووول هاي ليش جي اتعاملني وكيف الي تكرهم تستوي اربيعتهم بس من وراهم اتحش فيهم وبعد قلت هي اكيد جي ترمس من وراي
من اهني قمت احذر منها وااايد وبديت اندم ليش كنت اقولها اشياء خاصه فيني وبعد انا وهي كنا عادي اطرش لها صوري واطرشلي صورها
المهم خلال هاييج الفتره كنت اروح الجامعه ووحده من اربيعاتي سألني أي قسم اداومين وقلتلها قلت وياهم وحده اسمها ميثه من —- قلت هيه قالت هاي كيف قلتلها اني قبل كنت وايد وياها بس الحين لا قالت اتحملي منها ترا هاي راعية مشاكل بطلت عيني كيف وشو اتعرفني عنها
بنااات كنت اشوي بصيييح قالت لي سوااالف فضييييعه واااايد يعني من أيام المدرسه لييين ما عرست واطلقت استغربت انا يعني شو اقول والله استحي اقول سوالفها لانها صدق مجرمه بعد مب بس صايعه
وقالت ان سمعتهاااا وااايد خااايسه بين الشباب خاصة بعدين البنات الي كانوا وياها في المدرسه والكليه وقالت تبين اتصدقين كلمت ولد خالتها يدامي وحطته اسبيكر وتم يرمس عنها وقال اسامي شباب معانا في نفس الدوام هي اتكلمهم وتطلع وياهم لدرجة انهم يتبادلون صورها حتى وهي مع واحد من ربعها
ما تتخيلون كيييف انصدمت وتميييت اصيييح وهي كانت موووول ما اتبين ان عندها هالسوالف مووول ما يبين عليها ولا كانت اتخبرني كله اتبين لنا انها مسكينه وبريئه وتصرف علا امها واخوها وخواتها وولدها
بتقولون ليش اصدق اربيعتي الي وياي في الجامعه وقالت عنها هالرمسه انا ثدقتها لاني واثقه فيها
وسبحان الله في هالفتره الله يبيني اجوفها علا حقيقتها
كنت رايحه اجتماع وصادفت واحد من الموظفين الي في قسم ثاني ونحنا دووم شغل بينا وهو وااايد يحترمني وانا احترمه وانا اعرف خواته لانهم اربيعاتي قالي امنو الموظفه اليديده الي كلمتها هذاك اليوم قلتله ميثه بنت فلان الي كانت في القسم الفلاني وكانت قبل اداوم في —–
قااال ميييثو وقالي شكلها وقال ليكون اترابعين هاااي قلت ليييييييش قال استغفر الله هاي سمعتها في الحظيظ ولا تماشينها عشان محد يرمس عنج هاااي استغفر الله مو امخليه حد مو مكلمتنه وطالعه معاه من الدوام وبرا الدوام
اهني انصدمت زياااده قلت له اووكي وروحت
بعدها بكم اسبوع كنت اكلم اربيعتي وحده ثانيه وبعد تمينا انسولف ويبنا سوالف الدوام وقاااالت هاااي كانت معانا في المدرسه قلت وكيف كانت زينه طيبه قالت شو تتمصخرين انتي هاي راعية مشاكل ومن النوع الي اتخرب وتجلب كل يوم كانت ويا شله من جي ما عندها اربيعات واحيد كان في وحده وااااايد معاها سوت مشاكل بينها وبين ريلها وانتقمت منها كانت اتغازل ريلها مع ان اربيعتها الروح بالورح كانت وحتى اطلقوا بسبتها
انا اهني خلااااص صدق صدق انقهرت كيف كنت ارابع هاااي وبديييت اخاف وااايد منها
اتغيرت في الدوام واااايد حتى مع الي رابعوها اتغيرت وقمت ما اسولف معاهم وايد بس تميت ويا وحده
وكنت وااايد مضايجه منها
هي سوت مشاكل وااايد في القسم وواحد من الموظفين اشتكى عليها عند المدير لانها كانت ما تعرف تشتغل عدل ها اول شي وكله اتقول ما عرف وثاني شي اي شي يستوي عنا في الشغل مثلا في اشياء سرية ترقيات محاكمات وغيره من الامور السريه اتوصلها لموظفين ثانيين وكانت تعطيهم اوراق في ملفاتهم وهذا اكبر غلط فمساعد المدير سوا كتاب بنقلها
يوم استوا الكتاب المدير أمرني أنا بطباعة الكتاب عشان يوقعه وقالي بيني وبينج ما ابي أي حد يعرف عن النقل الا يوم يستوي قلت له انشالله وهذا واجبي المهم سويت الكتاب ولا بعد من طيبتي كنت مضايجه واقول حراام عليهم ليش ما عطوها فرصه ومسكينه هي ما تدري
عقب ما اتوقع الكتاب واتعمم وطبعا اربيعاتها الي وياي في المكتب الي دوم ميثو اتحش فيهم وهم ما يدرون خبروها عن اني انا كتب النقل
فهي اتحريت اني انا الي امسويه الكتاب وطرشتلي مسج اني خاينه ومادري شو وليش ما خبرتها وانا مب اربيعتها قلت لها انا ما يخصني المدير قالي اكتب اسوي هالشي وبعدين هذا شغلي وهو اكد علي ما اقول حق حد وهذي اسرار الشغل ما اقدر اطلعها خاصة ان المدير اكد علي ان محد يعرف الخبر
وانا يا بنات ادري حتى لو ما سمعت كلام المدير وخبرتها عن النقل
تدرون هاي كان عادي عندها ومن قهرها بتكلم المدير وبتقوله هي تبي تنقلني خبروني فعشان جي انا بعد ما خبرتها
المهم من هذاك اليوم وهي ترمس من وراي واتقول عني نذله وخاينه مع اني ما ضريتها بشي وهي مقهروه ليش قمت اطنشها وابتعدت عنها آخر فتره وبعد انقهرت لاني ما كنت اخبرها عن الي يستوي في المكتب وكانت آخر فتره تتصل وكله اتقول ليش ما خبرتيني وانا ما احب اسوي فتنه ولا اطلع اسرار الشغل وفي ناس الحين معاها في القسم الثاني الي هي فيه يقولون انها دووم اتسبني واتحش فيني واتقول انا براويها هاي بس مب الحين بعدين خلا تهدا الامور بنات انا عقب ما سمعت عنها وعن سوالفها مادري بديت اخاف صح انا مب متزوجه عشان مثلا اتخرب بيني وبين ريلي مثل ما سوت مع اربيعتها القبليه بس بعد عادي هي اتسوبي شي ثاني بدون ما ادري اناا رمستها من وراي قاهرتني وابا اسكتها بس مب عارفه كييييف
الي قاهرني زياده ان البنات الي الحين وياي في المكتب وايد يحبونها ومعتبرينها اربيعتهم ما يدرون كيف هي فاضحتنهم قبل وحاشه فيهم لين ما شبعت ما يدرون انها يدامهم بويه ووراهم بويه ويدرون انها كانت اربيعتي والحين ما اكلمها وكل يوم ميثه وميثه يحليلها فديتها واناا مااا اداني اسمع اسمها اتضايج واايد والله ندمانه علا كل دقيقه يلست معاها فيها واعتبرتها اربيعتي ندمانه وااايد
حتى علاقتي اختربت مع هالثنتين الي كانوا معاي في المكتب احس انهم شراتها ودايما يبون يقهروني يوم اييبون اسمها بس انا ما ابين لهم ولا ابين لها اني مضايجه وانا صدق مب متحسره لاني ودرتها بس قاهرتني رمستها وخايفه لان هالاشكال عادي اتسوي اي شي مب عارفه شو اسوي
فكرت اشتكي عليها بس المشكله هم يبون ادله وانا ما عندي . ..
خبروني بنااااات كيف اتعامل معاها والله احس بضيييج يوم اتذكرها واضايج اكثر يوم اجوف الي معاي في الدوام مغترين فيها والله يعلم هي شو اتقول عني عادي اتألف سوالف ن عندها لان هي ها طبعها
فكرت اخبرهم واقول لهم عنها وكيف كانت ترمس عنهم بس يمكن ما يصدقوني ومرات اقول اخليهم علا عماهم ومصيرهم بيعرفون
والله مو من طبعي اهتم لهالاشكال واول مره اصادف خيانه وحده من اربيعاتي اول مره انصدم جي هاي من السوالف الي سمعتها عنها اخافها تضرني ابا اوقفها عند حدها بس ما عرف كيييف
بليييز خبروني شو اسوي عشان اتم مطمنه انها ما بتضرني بشي خاصة ان صوري عندها وهي عقب السوالف الي سمعتها عنها ينخاف منها ؟ ؟؟؟

أشكر كل الي اتعاطفوا معاي وكتبولي . .

توا وصلتني هالرساله عالخاص

شو رايكم بنااات انا ما ابي ادخل المسؤولين في الدوام
انا قررت أشتكي عليها في خدمة الأمين وكفايه انها هددت انها تبي تنتقم وهم بيتصرفون معاها وبتخاف
خلاااص والله بعد ردودكم ما اقدر اسكت كثر ما سكت

حااسه فيج لاني مريت في هالموقف
بس انتي الله يهديج مبين من حركاتها انها وحده ررايحه فييها >>اطرش بوسات حق الشباب !!

زين يوم انج ودرتيها ولا تعطينها سالفه بالمرا
انا يووم صرالي هالموقف خفت وكنت احاتي وايييد بس ما علييييج ان شالله مابتسووي شي ولووو سوت ما عليييج محد بيصدقها لانه هالاشكال صدقيني محد يصدقها خاصه انه سوالفها كل حد يعرفها
والله يحفظج وان شالله ما يصير لج شي
الله يحفظج

فديييتج والله مشكووووره خففتي الضيج الي فيني . . . انا بعد يوم خبرت اربيعتي الي وايد وياها قالت ما عليج منها محد بيصدقها لان الشباب يعرفون سوالفها
وبعد في شي ثاني اتعرفين اني يوم ودرتها واااايد في دوامي من الموظفين والموظفات يوم يسألوني شخبارها اقول ما اكلمها ولا اعرف عنها شي يستانسون ويقولون احسن لج واصلا وااايدين حسوا اني ابتعدت عنها لاني قبل كنت واااايد وياها وبعدين لا

يااالله ..!!!
شوهالناس عفان الله
والله ماعرف شو اقولج
الله يكون في عونج ان شاءالله
واذا حاطة شي في بالها ان شاءالله ينجلب عليها

اكيد مابيصدقونها الناس اللي تعرفج واتعرف اخلاقج مابيصدقونها
لكن الناس اللي تغار منج وتحقد عليج بتصدقها حتى لو يعرفون انج على صواب
وهي علة خطأ
انا مريت في موقف مشابهه لهالموقف سبحان الله الناس اللي تحبني وتعرفني ماصدقت
لكن الناس اللي كان في قلبهم حقد من زمان صدقت معنهم يعرفون الحقيقه

طنشي كل شي بس صورج اكبر مشكلة صورج… والله ما أعرف أشو أقولج بس لازم تسترجعين صورج من عندها

اللله يفرج همج يارب
بالتوفيق